ޝަރުއީ ދާއިރާގެ ތަމްރީންތަކަށް އިންޑިޔާގެ މިނިސްޓްރީ އޮފް ލޯ އެންޑް ޖަސްޓިސްއާއެކު ޖުޑީޝަލް ސާވިސް ކޮމިޝަން (ޖޭއެސްސީ) އިން މެމަރަންޑަމް އޮފް އަންޑަރސްޓޭންޑިންގ (އެމްއޯޔޫ) އެއްގައި ސޮއިކޮށްފި އެވެ.
މި އެމްއޯޔޫގައި ސޮއިކުރުމުގެ ރަސްމިއްޔާތު ކުރިއަށް ގެންދިޔައީ މިއަދު ޑިޕާޓްމަންޓް އޮފް ޖުޑީޝަލް އެޑްމިނިސްޓްރޭޝަންގަ އެވެ.
ޖޭއެސްސީގެ ފަރާތުން އެމްއޯޔޫގައި ސޮއިކުރެއްވީ ކޮމިޝަންގެ ރައީސް އަދި ރައްޔިތުންގެ މަޖިލީހުގެ ތުޅާދޫ ދާއިރާގެ މެންބަރު ހިސާން ހުސައިން އެވެ.
އަދި އިންޑިއާގެ މިނިސްޓްރީ އޮފް ލޯ އެންޑް ޖަސްޓިސްގެ ފަރާތުން އެމްއޯޔޫގައި ސޮއިކުރެއްވީ އިންޑިއާއިން ރާއްޖެއަށް ކަނޑައަޅުއްވާފައިވާ ސަފީރު، ހައި ކޮމިޝަނަރު ޝްރީ މުނޫ މަހާވަރް އެވެ.
ޖޭއެސްސީން ނެރެފައިވާ ނޫސް ބަޔާނެއްގައިވާ ގޮތުން، މި ފަހަރު ސޮއި ކުރެވުނު އެމްއޯޔޫގެ ސަބަބުން ރާއްޖޭގެ ޝަރުއީ ދާއިރާގައި މަސައްކަތް ކުރާ ގިނަ ފަރާތްތަކަށް ފަންނީ ތަމްރީނާއި، ތަޖުރިބާ އިތުރުކުރުމުގެ ތަފާތު ފުރުސަތުތަކެއް ލިބިގެން ދާނެ އެވެ.
މީގެ ކުރިން ރާއްޖޭގެ ފަނޑިޔާރުން ތަމްރީނު ކުރުމުގެ ގޮތުން އިންޑިއާގެ ނޭޝަަނަލް ޖުޑީޝަލް އެކަޑެމީއާ އެކު އެމްއޯޔޫއެއްގައި ސޮއިކޮށްފައިވެ އެވެ. އެއީ 2020 ވަނަ އަހަރުގެ ތެރޭގަ އެވެ.
މިއަދު ބޭއްވި ރަސްމިއްޔާތުގައި ކޮމިޝަންގެ ރައީސް ހިސާން ވިދާޅވެފައިވަނީ އެމްއޯޔޫގައިވާ ކަންކަން ތަންފީޒު ކުރުމުގައި ދޭން ޖެހޭ ފުރިހަމަ އެއްބާރުލުން ދެއްވާނެ ކަމުގެ ޔަގީންކަން އަރުއްވާ ކަމަށެވެ.
އިންޑިޔާގެ ސަފީރު، ހައި ކޮމިޝަނަރު ޝްރީ މުނޫ މަހާވަރް ވަނީ ފަނޑިޔާރުންނާއި ކޯޓުތަކުގެ މުވައްޒަފުންނާއި، ޖުޑީޝަލް އެކަޑަމީގެ މުވައްޒަފުން ތަމްރީން ކުރުމަށް ކޮމިޝަނާއި އިންޑިއާގެ މިނިސްޓްރީ ގުޅިގެން މުސްތަގުބަލުގައި ކުރެވޭނެ ކަންތައްތަކުގެ މައްޗަށް އަލި އަޅުއްވާލައްވައިފަ އެވެ.
