ދެ ރަށެއްގެ ގޮނޑުދޮށް ހިމާޔަތް ކުރުމާއި އެއް ރަށުގެ ބަނދަރު ހެދުން މޯލްޑިވްސް ޓްރާންސްޕޯޓް އެންޑް ކޮންޓްރެކްޓިން ކޮމްޕެނީ (އެމްޓީސީސީ)އާ ހަވާލުކޮށްފި އެވެ.
އެއީ މ. މުލައް ގޮނޑުދޮށް ހިމާޔަތްކުރުމުގެ ދެވަނަ ފިޔަވަހި އަދި ރ. އުނގޫފާރު ގޮނޑުދޮށް ހިމާޔަތްކުރުމުގެ މަޝްރޫއު ގެ އެއްބަސްވުމުގެ އިތުރުން މ. މަޑުއްވަރި ބަނދަރު ހެދުމުގެ މަޝްރޫއު އެވެ.
މަޑުއްވަރީ ބަނދަރު ހެދުމުގެ އެއްބަސްވުމުގައި މިނިސްޓްރީގެ ފަރާތުން ސޮއި ކުރެއްވީ މިނިސްޓްރީގެ ޕާމަނަންޓް ސެކްރެޓަރީ ޒީނިޔާ އަހުމަދު ހާމީދެވެ. އަދި އެމްޓީސީސީގެ ފަރާތުން ސޮއިކުރެއްވީ އެ ކުންފުނީގެ ސީއީއޯ އާދަމް އާޒިމް އެވެ.
މި މަޝްރޫއުގެ ދަށުން 38،800 ކިއުބިކް މީޓަރަށް (މެދު ދިޔައިން ފެށިގެން 3- މީޓަރު ހަމަވާ ވަރަށް) މަޑުއްވަރި ބަނދަރު ފުންކުރާނެ އެވެ. އަދި 54،093 ކިއުބިކް މީޓަރަށް (މެދު ދިޔައިން ފެށިގެން 4.0- މީޓަރ ހަމަވާ ވަރަށް) މަޑުއްވަރި ބަނދަރަށް ވަންނަ ނެރު ފުންކުރާނެ އެވެ.
މީގެ އިތުރުން 92،893 ކިއުބިކް މީޓަރު ސަރަހައްދަކަށް ބްރޭކްވޯޓާ، 600 މީޓަރު ބޮޑު ހިލައިގެ ބޭރު ތޮށި ޖެހުން އަދި 122 މީޓަރ ރިވެޓްމަންޓް ޖެހުމުގެ މަސައްކަތް ކުރާނެ އެވެ. 51,086,661.84 ރުފިޔާ ހަރަދުކޮށްގެން ކުރިއަށްގެންދާ މި މަޝްރޫއަކީ 480 ދުވަހުގެ ތެރޭ ނިންމުމަށް ހަވާލުކޮށްފައިވާ މަޝްރޫއެކެވެ.
ގޮނޑުދޮށް ހިމާޔަތްކުރަން ހަވާލުކޮށްފައިވާ އުނގޫފާރުގެ ގޮނޑުދޮށް ހިމާާޔަތްކުރަން އެމްޓީސީސީ އާއި ހަވާލުކުރީ 11.1 މިލިއަން ރުފިޔާ އަށް 180 ދުވަހުގެ ތެރޭގައި ނިންމުމަށެވެ. އެ މަޝްރޫއުގެ ދަށުން 120 މީޓަރުގެ ބޮޑުހިލައިގެ ބްރޭކްވޯޓާ އާއި 110 މީޓަރުގެ ބޮޑުހިލައިގެ ގްރޮއިން ޤާއިމްކޮށް ގިރާ ސަރަހައްދުގެ ގޮނޑުދޮށް ވެލިން މުއްސަނދި ކުރެވޭނެކަމަށް އެމްޓީސީސީން ބުނެ އެވެ.
މުލަކުގެ ގޮނޑުދޮށް ހިމާާޔަތްކުރަން ހަވާލުކުރީ 39 މިލިއަން ރުފިޔާއަށް 450 ދުވަހުގެ ތެރޭގައި ނިންމުމަށެވެެ. އެ މަޝްރޫއުގެ ދަށުން 343.03 މީޓަރުގެ ބޮޑުހިލައިގެ ރިވެޓްމަންޓް ޖެހުމާއި 539.9 މީޓަރުގެ ބޮޑުހިލައިގެ ބްރޭކްވޯޓާ ޖަހައި ގިރާ ސަރަހައްދުގެ ގޮނޑުދޮށް ވެލިން މުއްސަނދި ކުރާނެ ކަމަށް އެމްޓީސީސީން ވަނީ ބުނެފަ އެވެ.
