އެމެރިކާގެ ކުރީގެ ރައީސް ޑޮނަލްޑް ޓްރަމްޕް ފްލޮރިޑާގައި ދިރިއުޅުއްވާ ގެކޮޅު ބަލައި ފާސްކޮށް، ގެންދިޔަ ލިޔުންތަކުގެ ތަހުގީގު ވަގުތީ ގޮތުން ހުއްޓުވުމަށް އެދި ކޯޓަށް މަައްސަލަ ހުށަހަޅަައިފި އެވެ.
ޓްރަމްޕްގެ ވަކީލުން އެދުނީ އެފްބީއައިއިން ގެންދިޔަ ލިޔުންތަކުގެ ކަންކަން ބެލުމަަށް މިނިވަން ގާނޫނީ ވަކީލެއް އައްޔަނު ކުރުމަށެވެ. ޓްރަމްޕްގެ ގެކޮޅުން ތަފާތު 11 ސިއްރު ލިޔުން ގެންދިޔަ އެވެ.
ވަކީލުން ތުހުމަތު ކުރާ ގޮތުގަައި މިއީ ސިޔާސީ ބޭނުމަށް ފެށި ތަހުގީގެކެވެ. ސިޔާސީ ބޭނުމަށް ގާނޫނު ހަތިޔާރަކަށް ހެދުން ހުއްޓާލުމަށް އެ މީހުން ގޮވާލި އެވެ.
އެމެރިކާގެ ގާނޫނުން ރައީސުންނަށް މަޖުބޫރު ކުރަނީ ހުރިހާ ސިޓީތަކާއި މަސައްކަތާ ގުޅޭ ލިޔުންތައް އަދި އީމެއިލްތައް ނޭޝަނަލް އާކައިވްސްގައި ރައްކާ ކުރުމަށެވެ.
އެކަމަކު އޮފިޝަލުން ތުހުމަތު ކުރާ ގޮތުގައި ޓްރަމްޕް ވަނީ އެ ގާނޫނާ ހިލާފަށް ގިނަ އަދަދެއްގެ ލިޔުންތައް ނައްތާލައްވާފަ އެވެ.
ޓްރަމްޕް ވިދާޅުވީ ގާނޫނާ ހިލާފު އެއްވެސް ކަމެއް ނުކުރައްވާ ކަމަށާއި އެ ހުރިހާ ލިޔުމަކީ ވެސް ޑީކްލެސިފައި ނުވަތަ އާއްމު ކުރަން ނިންމާފައިވާާ ލިޔުންތައް ކަމަށެވެ.
ސިއްރު ލިޔުންތައް ގާނޫނާ ހިލާފަށް އަތުގައި ބެހެއްޓުމުގެ އަދަބު މަތި ކުރީ ޓްރަމްޕްގެ ވެރިކަމުގަ އެވެ. އެ ކުށް ސާބިތުވެއްޖެ ނަމަ މިހާރު ފަސް އަހަރުގެ ޖަލު ހުކުމެއް އަންނާާނެ އެވެ.
ޓްރަމްޕްގެ އޮފީހުން ކުރިން ނެރުނު ބަޔާނެއްގައި ބުނީ އެމަނިކުފާނު ރައީސްކަމުގައި ހުންނެވި އިރު، ލިބިވަޑައިގެންނެވި ބާރުގެ ދަށުން އެ ހުރިހާ ލިޔުމެއް ވެސް ޑީކްލެސިފައިކޮށްފައިވާ ކަމަށެވެ.
