ގަވައިދާ ހިލާފަށް ގޮފިތައް އުފައްދައިގެން އެމްޑީޕީގެ ކޮންގްރެސްގައި މަންދޫބުން ބައިވެރިވެފައިވާ ކަމަށް އެމްޑީޕީގެ ރައީސް މުހައްމަދު ނަޝީދު ތުހުމަތު ކުރެއްވުމާއެކު އެމަނިކުފާނަށް ވަރަށް ބޮޑަށް ނުރުހުން އަމާޒުވެއްޖެ އެވެ.
އެމްޑީޕީގެ އަސާސީ ގަވައިދަށް ގެންނަން ނިންމާފައިވާ ބައެއް އިސްލާހުތަކުގެ ތެރޭ ކޮންގްރެސްމަނުންގެ ގޮތުގައި ގޮފިތަކުގެ ރައީސުންނާއި ނައިބު ރައީސުންނަށް ބައިވެރިނުވެވޭނެ ފަދަ އިސްލާހެއް ހިމެނެ އެވެ. އިސްލާހުގައިވާ ގޮތުން, ގޮފިތަކުގެ ރައީސުން ގެނައުމުގެ ބަދަލުގައި ދާއިރާތަކުގެ މެދުގައި ކޮންގްރެސްމަނެއް އިންތިހާބުކުރަން ޖެހޭ ގޮތަށެވެ.
އެ އިސްލާހު އެގޮތަށް ގެންނަން ވިސްނަނީ, އެމްޑީޕީގެ ޗެއާޕާސަން ފައްޔާުޒު އިސްމާއިލް ވިދާޅުވީ ކޮންގްރެސް ގާތްވުމުން ގޮފިތައް އުފައްދައި, އެ ގޮފިތައް ރަނގަޅަށް ހިންގަމުން ނުދާތީ އެވެ. އެކަމަކު އެ އިސްލާހު އެގޮތަށް އޮތުމުން, އެމްޑީޕީގެ އެންމެ އިސް ލީޑަރު, ރައީސް އިބްރާހިމް މުހައްމަދު ސޯލިހު ވަނީ ކަންބޮޑުވުން ފާޅުކުރައްވައި, ގޮފިތަކުގެ ބައިވެރިވުން އިތުރު ކުރެވޭނެ ގޮތަކާމެދު ކޮންގްރެސްގައި މަޝްވަރާ ކުރުމަށް އެދިވަޑައިގެންފަ އެވެ. އެމަނިކުފާނު ގަބޫލު ކުރައްވާ ގޮތުގައި ގޮފިތަކަކީ ޕާޓީއަށް މުހިންމު ބައެއް ކަމަށްވާއިރު, އިސްލާހާމެދު ފުންކޮށް ވިސްނާލަން ޖެހެ އެވެ.
އޭގެފަހުން ވާހަކަ ދައްކަވަމުން ޕާޓީގެ ނައިބު ރައީސް މުހައްމަދު ޝިފާޒު ވަނީ މިހާރު ކުރިއަށްދާ ކޮންގްރެސްއަށް ވެސް ގޮފިތަކުގެ ރައީސުންނާއި ނައިބު ރައީސުން އައިސްފައިވަނީ ގަވައިދާ ހިލާފަށް އިންތިހާބުވެގެން ކަމަށް ތުހުމަތު ކުރައްވާފަ އެވެ. ޝިފާޒު ވިދާޅުވި ގޮތުގައި, ގޮފިތައް ހަދާފައިވަނީ ގަވައިދާ ހިލާފަށްކަން އެންމެންނަށް ވެސް އެނގޭ ކަމާއި އެ ސުވާލު އަމިއްލަ ނަފުސާކޮށްލުމަށް އެދޭ ކަމަށެވެ.
ޝިފާޒުގެ އެ ތުހުމަތާއެކު މަރަދޫ ދާއިރާ ދާއިރާގެ އިބްރާހިމް ޝަރީފް ވަނީ ވަރަށް ބޮޑަށް ނުރުހުން ފާޅުކުރައްވާފަ އެވެ. އޭނާ ވިދާޅުވީ އެމްޑީޕީ މިއޮތް ހިސާބަށް ގެނައުމުގައި އެންމެ ބޮޑު ދައުރެއް އަދާކުރި ގޮފިތަކުގެ އަގު ވައްޓާލައި, އެއީ ގަވައިދާ ހިލާފަށް ހޮވާފައިވާ ބައެއް ކަމަށް ޕާޓީގެ އިސް ލީޑަރުން ވިދާޅުވާ ވާހަކައަށް އިޖުތިޖާޖު ކުރައްވާ ކަމަށެވެ. އަދި, އެކަން ކުށްވެރިކޮށް ކޮންގްރެސްގެ ނިންމުންތައް އެއީ ގަވައިދާ ހިލާފު ނިންމުންތަކެއް ކަމަށް ދެއްކުމަށް ކުރާ މަސައްކަތް ކާމިޔާބުވިޔަ ނުދޭ ކަމަށެވެ.
ނަޝީދުގެ ތުހުމަތާއެކު ކޮންގްރެސްގައި ނުރުހުން ފާޅުކުރި - ފޮޓޯ: މުހައްމަދު ޝާބިން / އަދަދު
ވަރަށް ނުރުހުންވެ, ޝަރީފް ވާހަކަ ދައްކަވަމުން ގެންދެވިއިރު, އެތަނުގައި ތިބި ގިނަ ބަޔަކު ތަރުހީބު ދެމުންދިޔައިރު, އެމްޑީޕީގެ ރައީސް މުހައްމަދު ނަޝީދު އިންނެވީ އަތް ނަގައިގެންނެވެ. އަދި, އެހެން މީހުންނަށް އިހްތިރާމްއާއެކު ވާހަކަ ދެއްކުމަށް ރިޔާސަތަށް އަންގަވަމުން ގެންދެވި އެވެ.
ޝަރީފްގެ ވާހަކަ ނިންމާލުމާއެކު, ނަޝީދު މައިކް ކައިރިއަށް ވަޑައިގެންނެވި އެވެ. އެންމެ ފުރަތަމަ ވެސް ވިދާޅުވީ ކޮންގްރެސްއަށް ގަވައިދާ ހިލާފަށް ގޮފިތަކެއް ހަދައިގެން ވަދެ ބަޔަކު ތިބިކަން އެންމެންނަށް ވެސް އެނގޭ ކަމަށެވެ.
ނަޝީދު އެހެން ވިދާޅުވުމާއެކު ތަނުގައި އަޑުގަދަވެގެން ދިޔަ އެވެ. އެމަނިކުފާނަށް ވާހަކަ ކުރިއަށް ނުގެންދެވޭ މިންވަރަށް ނުރުހުން ފާޅުކުރަމުން ދިޔައިރު, ނަޝީދުގެ ވާހަކަތަކަށް ވަރަށް ބޮޑަށް އިންކާރުކުރި އެވެ. ރިޔާސަތަށް ވެސް ތަން ކޮންޓްރޯލް ނުކުރެވުނެވެ.
އިރުކޮޅެއްފަހުން, ހަޅޭކުއަޑު މަޑުވުމުން ނަޝީދު ވާހަކަ ކުރިއަށް ގެންދެވި އެވެ. ދެން ނަޝީދު ފާހަގަ ކުރެއްވީ އެންމެންގެ ހިޔާލު އެއްގޮތް ކުރުމުގެ މުހިންމު ކަމުގެ ވާހަކަ އެވެ. އެގޮތުން, މިހާރު އިސްލާހު އޮތް ގޮތާއި, ގޮފިތަކުގެ ހިއްސާ އޮންނާނެ ގޮތެއް ހޯދުމަށް ވިސްނާލުމަށް އެމަނިކުފާނު އެދިވަޑައިގެންނެވި އެވެ.
ޕްރައިމަރީގައި ނަޝީދަށް 2018 ގައި ވޯޓުލަނީ
އޭގެފަހުން ވާހަކަ ދެއްކެވި ބައެއް މަންދޫބުން ވެސް ނަޝީދަށް ރައްދުދީ ވާހަކަ ދައްކާފައިވެ އެވެ. އެގޮތުން, ގޮފިތައް އިންތިހާބުވެފައިވަނީ ގަވައިދާ އެއްގޮތަށް ކަމާއި ނަަމަވެސް, ސިމެންތި ގަށާ މެޝިނާއި ވަޅު ފަދަ ތަކެއްޗަށް ނެގި ވޯޓާމެދު ސުވާލު އުފެދޭ ކަމަށް ބުނެފައިވެ އެވެ. އޭނާ އިޝާރާތް ކުރީ 2018 ވަނަ އަހަރު ނަޝީދު ކާމިޔާބު ކުރެއްވި ކަމަށް ބުނާ އެމްޑީޕީގެ ޕްރައިމަރީގެ އިންތިހާބަށެވެ.
ބައެއް މަންދޫބުން ވަރަށް އަސަރާއެކު ވާހަކަ ދެއްކިއިރު އައްޑޫ ސިޓީ ގޮތްޕަކަށް ނިސްބަތްވާ އަންހެނަކު ބުނި ގޮތުގައި, ޕާޓީގެ ރައީސަށް ވެސް މަގާމަށް އާދެވެނީ ގޮފިތަކުން ވޯޓުލައި, ގޮފިތަކުން ކުރާ މަަސައްކަތްތަކުގެ ސަބަބުންނެވެ. އެހެންވެ, ގޮފިތަކުގެ މައްޗަށް ތުހުމަތުކޮށް, އެމީހުން ބާކީ ކުރަން އުޅޭ އުޅުމަށް އެއްވެސް ފުރުސަތެއް ނުދޭނެ ކަމަށް ބުންޏެވެ.
ވަގު ގޮފިތަކުގެ ތުހުމަތު ޕާޓީގެ ރައީސް އަދި ނައިބު ރައީސް ކުރުމުން ނުރުހުން އަމާޒުވި - ފޮޓޯ: މުހައްމަދު ޝާބިން / އަދަދު
ނަޝީދާމެދު ނުރުހުންވިއިރު, ގަރާރުގެ ބަހުސް އޮތީ ކުރިއަށް
ނަޝީދާމެދު ކޮންގްރެސްގެ ގިނަ ބަޔަކު ނުރުހުންވެ, އަޑުގަދަ ކުރިއިރު މިއަދު މެންދުރުފަހަށް ނަޝީދު ހުށަހެޅުއްވި ގަރާރާ ގުޅޭ ގޮތުން މަޝްވަރާ ކުރުން އެބަ އޮތެވެ. އެ ގަރާރާމެދު ގިނަ ކޮންގްރެސްމަނުންތަކެއް ދެކޮޅު ހަދާނެ ކަމަށް މިހާރު ވަނީ ބެލެވިފަ އެވެ.
ރާއްޖޭގެ ވެރިކަން ކުރާ ނިޒާމް ބަރުލަމާނީ ނިޒާމަށް ބަދަލުކޮށް, ރިޔާސީ އިންތިހާބެއްގައި ދެވަނަ ބުރެއްގެ ވޯޓަކަށް ނުގޮސް އިންތިހާބު ކާމިޔާބު ކުރެވޭނެ މަގެއް ކަނޑައަޅެމަށް ފެންނަ ނުފެންނަ ވޯޓެއް ނެގުމަށް އެމްޑީޕީ ކޮންގްރެސްއަށް ނަޝީދު ހުށަހަޅުއްވާފައިވަނީ އެމްޑީޕީގެ ނައިބު ރައީސް މުހައްމަދު ޝިފާޒްގެ ތާއީދާއެކު އެވެ.
ޕާޓީގެ ރައީސް ނަޝީދު ހުށަހެޅުއްވި ގަރާރުގައި ވަނީ ގާނޫނުއަސާސީއަށް ގެންނަން ބޭނުންވާ ބަދަލުތައް ފާހަގަކޮށްފަ އެވެ. އެގޮތުން، ސަރުކާރުގެ އެންމެ އިސްވެރިއަކީ މަޖިލީހުގެ ތެރެއިން އިންތިހާބުކުރާ ބޮޑުވަޒީރު ކަމަށާއި ދައުލަތުގެ އެންމެ އިސްވެރިއެއްގެ ގޮތުގައި ހުންނާނީ ރައްޔިތުންގެ މެދުގައި ނަގާ ރިޔާސީ ވޯޓަކުން ހޮވޭ މީހެއް ކަމަށް ވަނީ ފާހަގަކޮށްފަ އެވެ.
އަދި، ބޮޑުވަޒީރާއި ރައީސްގެ ބާރުތައް ކަނޑައެޅުމަށާއި މަޖިލީހުގެ ދާއިރާތައް ތަމްސީލުވާނެ ގޮތްތަކާއި މަޖިލިސް އިންތިހާބުގައި ސިޔާސީ ޕާޓީތަކުން ހޯދާ ވޯޓުގެ ނިސްބަތަށް ބަލައި، ހާއްސަ ކުރެވޭ "ނެޝަނަލިސްޓު ލިސްޓު"ގެ މެންބަރުން ހިމެނޭ އުސޫލު ކަނޑައެޅުމަށް ވެސް ހުށަހަޅައިފަ އެވެ.
މީގެ އިތުރުން ވަޒީރުންގެ މަޖިލިސް ކަނޑައަޅާނީ މަޖިލިސް މެންބަރުންގެ ތެރެއިން ކަމަށާއި ސުޕްރީމް ކޯޓަށް ފަސް ފަނޑިޔާރުން އައްޔަން ކުރުމުގެ އިތުރުން ޖުޑީޝަލް ސާވިސް ކޮމިޝަން (ޖޭއެސްސީ) އެކުލަވާލެވިފައިވާ ގޮތް ބަދަލުކުރުމުގެ އިސްލާހު ވެސް ގެނައުމަށް ގަރާރުގައި ހިމަނާފައިވެ އެވެ.
