އެމްޑީޕީއަކީ އަބަދު ބަދަލުތަކެއް ތެރޭ ތިބޭ ބަޔަކަށްވުމުގެ ބަދަލުގައި ބަދަލުތަކުގެ ފޮނި މީރުކަން ރައްޔިތުންނާ ހަމައަށް ފޯރުކޮށްދިނުމަށް މަސައްކަތް ކުރާ ބަޔަކަށް ވާން ޖެހޭ ކަމަށް އެމްޑީޕީ ޕާލިމެންޓް ގްރޫޕް (ޕީޖީ)ގެ ލީޑަރު މުހައްމަދު އަސްލަމް ވިދާޅުވެއްޖެ އެވެ.
ޕީޖީ ލީޑަރު މިހެން ވިދާޅުވީ ރާއްޖޭގެ ވެރިކަމުގެ ނިޒާމް, ރިޔާސީ ނިޒާމަކުން ބަރުލަމާނީ ނިޒާމަކަށް ބަދަލު ކުރުމާމެދު އެ ޕާޓީގެ ތެރޭ ހިޔާލު ތަފާތުވުންތައް އުފެދިފައި އޮތްވަ އެވެ. ޕާޓީގެ ރައީސް މުހައްމަދު ނަޝީދު ގެންދަވަނީ އެ ބަދަލު ގެނައުމަށް ކެމްޕެއިން ކުރައްވަމުންނެވެ.
އެކަމަށްޓަކައި މިރޭ ފެށި އެމްޑީޕީގެ ކޮންގްރެސްއަށް ގަރާރެއް ވެސް ހުށަހަޅުއްވާފައިވާއިރު, ރައީސް އިބްރާހިމް މުހައްމަދު ސޯލިހް ވަނީ އެ ގަރާރާ ދެކޮޅުކަން ހާމަކުރައްވާފަ އެވެ. ރައީސް ސޯލިހް ހުންނެވީ ރިޔާސީ ނިޒާމެއްގެ ތެރޭން އާ ދައުރަކަށް ކުރިމަތިލައްވަން ގަސްދުކުރައްވައިގެންނެެވެ.
ކޮންގްރެސް ފެށުމަށް މިރޭ ސޯޝަލް ސެންޓަރުގައި ބޭއްވި ޖަލްސާގައި ނަޝީދު ވަނީ ބަރުލަމާނީގެ ބަދަލު ގެނައުމަށް މަޝްވަރާ ކުރަން ޖެހޭ ކަމަށް ބާރު އަޅުއްވާ ވާހަކަ ދައްކަވާފަ އެވެ. ނަމަވެސް, އެ ވާހަކަތަކަށް ނުސީދާ ރައްދެއް ދެއްވަމުން އަސަލް ވިދާޅުވީ, އެމްޑީޕީއަކީ އަބަދު ބަދަލެއް ގެނައުމުގެ ތެރޭ އޮންނަ ޕާޓީއަކަށްވުމަކީ އެންމެ ރަނގަޅު ގޮތް ކަމާމެދު ސުވާލު އުފެދޭ ކަމަށެވެ.
ކޮންގްރެސް ފެށުމަށް ބޭއްވި ޖަލްސާގައި އަސްލަމް ވިދާޅުވީ ރާއްޖޭގެ ދުސްތޫރީ ހަޔާތުގެ ބޮޑެތި ބަދަލުތަކަކީ އެމްޑީޕީގެ ހިއްސާ އޮންނާނެ ކަންކަން ކަމަށެވެ. އެގޮތުން, ގާނޫނީ ނިޒާމްގެ ތެރޭގައިވާ 41 ޕަސެންޓް ގާނޫނަކީ ސީދާ އެމްޑީޕީން ގެނައި ގާނޫނުތަކެއްކަން ފާހަގަ ކުރައްވަމުން އަސްލަމް ވިދާޅުވީ ލާމަރުކަޒީ ނިޒާމާއި ޓެކްސް ނިޒާމް ފަދަ ބޮޑެތި ބަދަލުތައް ވެސް ގެނައީ ސީދާ އެމްޑީޕީން ކަމަށެވެ.
އެމްޑީޕީއަށް ބަދަލަކީ ވަރަށް މުހިންމު އެއްޗެއް ކަމަށާއި ނަމަވެސް, އަބަދު ބަދަލުތަކެއް ތެރޭ ތިބުމުގެ ބަދަލުގައި އެ ބަދަލުގެ ފޮނި މީރުކަން ރައްޔިތުންނާ ހަމައަށް ފޯރުކޮށްދިނުމަށް މަސައްކަތް ކުރުން މާ މުހިންމު ކަމަށް އޭނާ ވިދާޅުވި އެވެ.
"...ރައީސް ނަޝީދު ދެންމެ ބަދަލުތަކުގެ ވާހަކަ ދެއްކެވި, އަޅުގަނޑުމެން އަބަދު ބަދަލަކީ ވަރަށް މުހިންމު އެއްޗެއް, ހަގީގަތު ވެސް އަބަދު ބަދަލުވޭވޭ ތިބެންވީހޭ, އަޅުގަނޑުމެން މި ގެނެވުނު ބަދަލު ހިންގާލަން ތިބެންވީހޭ, މިއީ ހަމަ ކުރެވޭ ބޮޑު ސުވާލެއް," އަސްލަމް ވިދާޅުވި އެވެ.
"އަޅުގަނޑުމެން ޕާޓީއަށް އެންމެ ރަނގަޅު ގޮތަކީ އަޅުގަނޑުމެން އަބަދުވެސް ބަދަލުތަކުގެ ތެރޭގަ ތިބުންތޯ ނުވަތަ އަޅުގަނޑުމެންނަށް ގެނެވިފައިމިވާ މުހިންމު ބަދަލު އޭގެ ފޮނި ނަތީޖާ ރައްޔިތުންނާ ހަމައަށް ފޯރުކޮށްދިނުމުގައި އަޅުގަނޑުމެން އެންމެން ގުޅިގެން އެކުގައި މަސައްކަތް ކުރަންވީހޭ, އެ ބޮޑު ސުވާލު,"
އަސްލަމް ވިދާޅުވީ އޭނާ އުއްމީދު ކުރަނީ ވެސް އެ ސުވާލުތަކަށް އެމްޑީޕީގެ ކޮންގްރެސްމަނުން ޖަވާބު ދެއްވުން ކަމަށެވެ. ހިޔާލު ތަފާތުވުންތައް އޮންނާނެ ކަމަށާއި އެކަމަކު އެއީ އެކުގައި ނޫޅެވެންޖެހޭ ސަބަބެއް ނޫން ކަމަށް އަސްލަމް ވިދާޅުވި އެވެ.
"ހިޔާލު ތަފާތުވުންތަކާއެކު ވެސް އަޅުގަނޑުމެންނަށް އެކުގައި އުޅޭވަރުގައި އަޅުގަނޑުމެންގެ ހިޔާލު ތަފާތުވުންތައް ވެސް ބާއްވަން ވާނީ," އޭނާ ވިދާޅުވި އެވެ.
އެއާއެކު, އަސްލަމް ފާހަގަކުރެއްވީ ރައީސް ސޯލިހަށް ދެވަނަ ދައުރެއް ދިނުމުގެ މުހިންމު ކަމުގެ ވާހަކަ އެވެ. އޭގެ ސަބަބެއްގެ ގޮތުގައި ކޮވިޑްގެ ވަބާ އާއި ޔޫކްރެއިން ހަނގުރާމަ ތެރޭ ވެސް ރާއްޖޭގެ އިގުތިސޯދު, އެހެން ގައުމުތަކުން ވެސް ތައުރީފު ކުރާ މިންވަރަށް ދެމެހެއްޓެވިކަން އަސްލަމް ފާހަގަކުރެއްވި އެވެ.
"...މި ރާއްޖޭގެ މުސްތަގުބަލަށްޓަކައި ރައީސް ސޯލިހަށް އިތުރަށް ދައުރެއް ދޭން އަޅުގަނޑުމެން އެންމެން އަތުކުރި އޮޅާލައި މަސައްކަތް ކުރުމާ ހިންގަވާށޭ އަޅުގަނޑު ދަންނަވާލަން ބޭނުން ވަނީ," އަސްލަމް, އެހެން ވިދާޅުވުމާއެކު އެ ތަނުގައި ތިބި ގިނަ ކޮންގްރެސްމަނުން އަތްޖެހި އެވެ.
ނަމަވެސް, ޕާޓީގެ ރައީސް ނަޝީދު އިންނެވީ ހިމޭނުންނެވެ. ނަޝީދު މިރޭ ވަނީ ރައީސް ސޯލިހަށް އަންނަ ރިޔާސީ އިންތިހާބާ ގުޅުވައި އިންޒަރަކާއެކު އެދުމެއް ކުރައްވާފަ އެވެ.
ރައީސް ވިދާޅުވަނީ ހިޔާލަށް ފުރުސަތު އޮންނާނެ ކަމަށް, ނަޝީދު ދެއްވީ އިންޒާރެއް
މިރޭ ކޮންގްރެސް ފެށުމަށް ބޭއްވި ޖަލްސާގައި ނަޝީދު ވިދާޅުވީ 2023 ވަނަ އަހަރަށް އަހަރަށް ދާއިރު މިހާރު އޮތް އިއްތިހާދު މިގޮތުގައި އޮންނާނެ ކަމަށް ދެކިއްޖެ ނަމަ, އެ ތިބެވެނީ އަވާމެންދުރެއްގައި ކަމަށެވެ.
"...މިއީ 2018 ވަނަ އަހަރެއް ނޫން, އެ ދުވަހު އަޅުގަނޑުމެން އިންތިހާބަށް ނުކުތްއިރު ވާދަވެރި ހުރިހާ ސިޔާސީ ލީޑަރުން ތިބީ ހައްޔަރުކޮށްފައި, ހަމައެކަނި ހުންނެވީ ރައީސް ޔާމީން ގިނިކަންޏާ, މިއަަދު ތިޔަބޭފުޅުންގެ މަސައްކަތުން ރާއްޖޭގެ ވެރިކަން އަނެއްކާވެސް އަމާން ކުރެވިއްޖެ, ސިޔާސީ މަސައްކަތް ހިންގުމުގެ ފުރުސަތު ހޯއްދަވައިފި," ނަޝީދު ވިދާޅުވި އެވެ.
ނަޝީދު ވިދާޅުވީ އެމްޑީޕީއާއެކު ސަރުކާރު ހިންގާ ކޯލިޝަނުގައި ތިބި ކޯލިޝަންގެ ހުރިހާ ލީޑަރުން ވެސް މިހާރު އެ ތިބީ މިނިވަންކޮށް ކަމަށާއި އެ ބޭފުޅުން އެ ގެންދަވަނީ ބުރަކޮށް 2023 ވަނަ އަހަރުގެ އިންތިހާބު ކާމިޔާބު ކުރުމަށްޓަކައި މަސައްކަތް ކުރަމުން ކަމަށެވެ.
ކޯލިޝަނާމެދު ޔަގީންކަން ނެތްއިރު ނަޝީދު މިރޭ ވިދާޅުވި ގޮތުގައި, އެމްޑީޕީ އެކުގައި އެކީގަ ތިބެ އިންތިހާބާ ކުރިމަތިނުލައިފިނަމަ, ޕާޓީއަށް ލިބެން އޮތް މިންވަރު ވަރަށް ބޮޑަށް ކުޑަވެގެން ދާނެ އެވެ.
"...އެހެންކަމުން އިއްޒަތްތެރި ރައީސް, ރައީސްގެ އަރިހުން އަޅުގަނޑު އެދެނީ މި ޕާޓީގެ ހުރިހާ މެންބަރުން އެކުގައި ބައިތިއްބައިގެން ކުރިއަށް ވަޑައިގެންނެވުން, އެ މަގުން ނޫން ގޮތަކަށް އަޅުގަނޑުމެންނަށް ހަގީގަތުގައި ކާމިޔާބު ހޯދޭކަށް ނެތް," ނަޝީދު ވިދާޅުވި އެވެ.
އެމްޑީޕީގެ ކޮންގްރެސްގައި ވާހަކަ ދައްކަވަމުން ރައީސް ވިދާޅުވީ ހިޔާލުތަފާތުވުން އޮއްވައި، އެންމެނަށް ހުރިހާ ކަމެއްގައި އެއްބަސްނުވެވޭނެ ކަމަށެވެ. އެހެންކަމުން އޮތް "ހަމައެކަނި ގޮތަކީ، ހިޔާލު ތަފާތުވުންތަކާ، ތަފާތު ހިޔާލުތަކާއެކުގާ ކުރިޔަށް ދިޔުން" ކަމަށް ރައީސް ސޯލިހު ވިދާޅުވި އެވެ.
"އެމްޑީޕީގާ ހިޔާލު ތަފާތުވުންތަކަށް ޖާގަ އޮންނާނެ. އަދި ތަފާތު ހިޔާލުތަކަށްވެސް ޖާގަ އޮންނާނެ. ބައެއް ކަންތައް ތަކަކީ އެންމެންނަށް އެއްބަސްވެވޭ ކަންތައްތައް. ނެއްބައި ކަންތައްތަކަކީ، އެއްބަސް ނުވެވޭ ކަންތައް ތަކަށް ވެދާނެ. ނަމަވެސް އޮތް ހަމައެކަނި ގޮތަކީ، ހިޔާލު ތަފާތުވުންތަކާ، ތަފާތު ހިޔާލުތަކާއެކުގާ ކުރިޔަށް ދިޔުން. ދިވެހިރާއްޖެއާ ދިވެހީންނަށް އުފާވެރި މާދަމާއެއް ގެނެސްދިނުމަށް އަޅުގަނޑުމެން އެކުވެގެން ދިއްލި، މިދަންމަރުގެ އުޖާލާކަން އެންމެ ހިނދުކޮޅަކަށްވެސް ފަނޑުވެ، ނިވުނަ ދީގެން ނުވާނެ،" ރައީސް ވިދާޅުވި އެވެ.
