މިރޭ ފަށާ އެމްޑީޕީގެ ހަތަރުވަނަ ކޮންގްރެސްގައި އެ ޕާޓީގެ އަސާސީ ގަވާއިދުގައި ހިމެނޭ ރިޔާސީ ޓިކެޓުގެ މާއްދާއަށް އެއްވެސް އިސްލާހެއް ހުށަހެޅިފައި ނެތް ކަމަށާއި ވަކި ބޭފުޅަކަށް ކޮންގްރެސް މެދުވެރިކޮށް ޓިކެޓު ހަވާލު ކުރުމުގެ ކަމެއް ވެސް ނެތް އެމްޑީޕީން އަނެއްކާ ވެސް ބުނެފި އެވެ.
އެމްޑީޕީގެ އެންމެ އިސް ލީޑަރު އަދި ރައީސް އިބްރާހީމް މުހައްމަދު ސޯލިހް ދެވަނަ ދައުރަކަށް ކުރިމަތިލައްވަން ޕްރައިމަރީއަކާ ނުލާ ރިޔާސީ ޓިކެޓު ދިނުމާ ގުޅޭ ގޮތުން ކޮންގްރެސްގައި ގޮތެއް ނިންމަން އުޅޭ ކަމަށް ދެކެވޭ ވާހަކަތައް ޕާޓީގެ އިދާރާއިން ކުރިން ވެސް ދޮގުކޮށްފައިވެ އެވެ.
އެ ފަހުން އެމްޑީޕީގެ ބައެއް މެންބަރުން ވަނީ 2023 ގެ ރިޔާސީ އިންތިހާބަށް ފަހު، ރައީސުލްޖުމްހޫރިއްޔާއަށް އެމްޑީޕީގެ ބޭފުޅަކު ހުންނަވާ ނަމަ އެމްޑީޕީގެ ރިޔާސީ ޓިކެޓު ދެވޭ ގޮތަށް ހުށަހަޅާފައިވާ ކަމަށް ބުނެފަ އެވެ. އެކަމަކު ރިޔާސީ ޓިކެޓު އަތުލައި، ޕްރައިމަރީއަށް ހުޅުވާލުމުގެ ބާރު ކޮންގްރެސްއަށް ވެސް ދެވޭ ގޮތަށެވެ.
މިއަދު ހަވީރު އެމްޑީޕީން ބޭއްވި ނޫސްވެރިންގެ ބައްދަލުވުމުގައި އެ ކަމާ ގުޅޭ ގޮތުން މި ނޫހުން ސުވާލު ކުރުމުން އެމްޑީޕީގެ ޑެޕިއުޓީ ޗެއާޕާސަން އަދި ރައްޔިތުންގެ މަޖިލީހުގެ ބާރަށު ދާއިރާގެ މެންބަރު އަހުމަދު އަބްދުﷲ ވިދާޅުވީ އެފަދަ އެއްވެސް މަސައްކަތެއް މި ކޮންގްރެސްއިން ކުރުމަށް ރާވާފައި ނެތް ކަމަށެވެ.
"މި ޕާޓީގެ އަސާސީ ގަވާއިދަށް ގެނެވޭ އިސްލާހުތަކުގެ ތެރޭގައި ސިޓިން ޕްރެސިޑެންޓްއަށް ރިޔާސީ ޓިކެޓު ދިނުމާ ގުޅޭ އެއްވެސް ކަމެއް ނެތް. ބަހުސް ކުރާކަށް ވެސް ނެތް." ކޮންގްރެސް ބާއްވާ ސޯޝަލް ސެންޓަރުގައި ބޭއްވި ނޫސްވެރިންގެ ބައްދަލުވުމުގައި އޭނާ ވިދާޅުވި އެވެ.
އަހުމަދު ވިދާޅުވި ގޮތުގައި، ކޮންގްރެސްގެ ތެރެއިން ރައީސް ސޯލިހަށް ރިޔާސީ ޓިކެޓު ހަވާލު ކުރަން އުޅޭ ކަމަށް ބުނެ ވެސް ވަރަށް ގިނަ ބަޔަކު ސުވާލުކުރާ ކަމަށެވެ. އެކަމަކު އެފަދަ އެއްވެސް ކަމެއް ނެތް ކަމުގެ ޔަގީން ކިަން ދެއްވާ ކަމަށެވެ.
"މި ކޮންގްރެސް ނިންމުމަށް ފަހު ދެން އެންމެ އަވަހަށް މި ޕާޓީގެ މަސައްކަތަކަށް އޮތީ ވެސް ރިޔާސީ ޕްރައިމަރީ، ރިޔާސީ ޓިކެޓު ދޭނީ ޕްރައިމަރީ ކާމިޔާބު ކުރައްވާ ބޭފުޅަކަށް،" އަހުމަދު އަބްދުﷲ ވިދާޅުވި އެވެ.
އެމްޑީޕީގެ އަސާސީ ގަވާއިދު ބުނާ ގޮތުން މިހާރު އެ ޕާޓީގެ ރިޔާސީ ކެންޑިޑޭޓް ކަނޑައަޅަނީ އެތެރޭގެ ޕްރައިމަރީއަކުންނެވެ. އެމްޑީޕީގެ ރިޔާސީ ކެންޑިޑޭޓް ވެރިކަމުގައި ހުންނެވިޔަސް، ދެވަނަ ދައުރަކަށް ކުރިމަތިލައްވަން ޓިކެޓު ލިބޭނީ ޕްރައިމަރީ ކާމިޔާބު ކޮށްގެންނެވެ.
މިހާރު ހުންނެވި ރައީސުލްޖުމްހޫރިއްޔާ އިބްރާހީމް މުހައްމަދު ސޯލިހް ޕްރައިމަރީގައި ވާދަކުރައްވަ އެވެ. އަދި ރައްޔިތުންގެ މަޖިލީހުގެ ރައީސްގެ މަގާމު ފުރުއްވަމުން ގެންދަވާ، އެމްޑީޕީގެ ފުރަތަމަ ސަރުކާރުގެ ރައީސްކަން ކުރެއްވި މުހައްމަދު ނަޝީދު ވެސް ހުންނެވި ޕްރައިމަރީގައި ވާދަކުރައްވާ ގޮތަށެވެ.
އެހެން ނަމަވެސް އެއަށް ވުރެ ބޮޑަށް ނަޝީދު ބޭނުންފުޅުވަނީ ބަރުލަމާނީ ނިޒާމަކަށް ރާއްޖޭގެ ވެރިކަމުގެ ނިޒާމު ބަދަލުކޮށް ބޮޑު ވަޒީރަކަށް ވުމަށެވެ. ނަޝީދު ވަނީ އެ ކަމަށް ރައްޔިތުންގެ ފެންނަ ނުފެންނަ ވޯޓަކަށް ދިއުމަށް އެމްޑީޕީގެ ކޮންގްރެސްއަށް ހުށަހަޅައިފަ އެވެ.
އެހެންވިޔަސް ރައީސް ސޯލިހް އާއި އެމަނިކުފާނަށް ތާއީދު ކުރާ މީހުން އެކަމާ ދެކޮޅެވެ. ރައީސް ވަނީ ނަޝީދުގެ ގަރާރު ވެސް އަނބުރާ ގެންދިއުމަށް އެދިވަޑައިގެންފަ އެވެ. ނަމަވެސް ނަޝީދު ހުންނެވީ ގަރާރު ހުށަހަޅަން، ތާއީދު ހޯއްދެވުމުގެ މަސައްކަތް ކުރައްވާ ގޮތަށެވެ.
