ރަޝިއާއިން ކޮންޓްރޯލް ކުރާ ޔޫކްރެއިންގެ ޒަޕޮރިއްޒިޒިއާ ނިޔުކްލިއާ ޕްލާންޓަށް ގެއްލުން ދިނުމަކީ އަމިއްލައަށް މަރުވުމާ އެއް ފަދަ ކަމެއްގެ ގޮތުގައި އދ. ގެ ސެކެޓްރީ ޖެނެރަލް އެންޓޯނިއޯ ގުޓެރޭޒް ސިފަކުރައްވައިފި އެވެ.
ބުރާސްފަތި ދުވަހު ގުޓެރޭޒް ވަނީ ޔޫކްރެއިނަށް ވަޑައިގެން އެ ގައުމުގެ ރައީސް ވޮލޮޑިމިރް ޒެލެންސްކީއާ ބައްދަަލުކުރައްވައިފަ އެވެ. އެ ބައްދަލުވުމުގައި ނިޔުކްލިއާ ޕްލާންޓާ ގުޅޭ ކަންބޮޑުވުން ފާޅުކުރެއްވި އިރު، އެ ޕްލާންޓް ކައިރީގައި ހަމަލާ ބަދަލު ކުރުން ފަހަކަށް އައިސް އިތުރުވެފައިވެ އެވެ.
ގުޓެރޭޒް ވިދާޅުވީ އެ ޕްލާންޓްގެ ހާލަތާ މެދު ވަރަށް ކަންބޮޑުވާ ކަމަށާއި އެ ސަރަހައްދަކީ ހަނގުރާމަ ކުރުން މަނާ ތަނަކަށް ހަދައި "ޑީމިލިޓަރައިޒް" ކުރަން ޖެހޭ ކަމަށެވެ.
ޒެލެންސްކީ އާއި ގުޓެރޭޒްގެ ބައްދަލުވުމުގައި ތުރުކީގެ ރައީސް ތައްޔިބް އުރުދުގާން ވެސް ބައިވެރިވެވަޑައިގެންނެވި އެވެ. އެމަނިކުފާނު ވެސް ވަނީ ނިޔުކްލިއާ ޕްލާާންޓްއާ މެދު ކަަންބޮޑުވުން ފާޅުކުރައްވައިފަ އެވެ.
ރަަޝިއާއިން ޒަޕޮރިއްޒިޒިއާ ޕްލާންޓް ހިފީ މިދިޔަ މާޗް މަހުގަ އެވެ. ނަމަވެސް އެ ތަނުގެ މުވައްޒަފުންގެ ގޮތުގަައި އަދިވެސް މަސައްކަަތް ކުރަނީ ޔޫކްރެއިން މީހުންނެވެ.
އެ ޕްލާންޓަށް އަމާޒުކޮށް ހަމަލާދޭ މައްސަލައިގައި ކަންބޮޑުވުން އިތުރުވެފައިވާ އިރު، އެކަމުގެ ޒިންމާ ރަަޝިއާ އަދި ޔޫކްރެއިނުން ވެސް ނުއުފުލަ އެވެ.
