ވެރިކަމުގައި ހުންނެވީ ޕާޓީއަށް ނިސްބަތްވާ ރައީސުލްޖުމްހޫރިއްޔާއެއް ނަމަ އެ ބޭފުޅަކު ދެ ވަނަ ދައުރަކަށް ވާދަ ކުރެއްވުމަށް ޕާޓީގެ ޓިކެޓު ދޭންޖެހޭނެ ކަމަށް ބުުނާ އިސްލާހެއް އެމްޑީޕީގެ ކޮންގްރެސްއަށް ހުށަހަޅާނެ ކަމަށް ބައެއް މެމްބަރުން ބުނެފި އެވެ.
އެ އިސްލާހަށް އަމަލު ކުރަން ފަށަނީ 2023 ގައި ބާއްވާ ރިޔާސީ އިންތިހާބަށްފަހު އެވެ. މި ނޫހަށް އެނގިފައިވާ ގޮތުގައި އެ އިސްލާހު ހުށަހެޅުމަށް އެމްޑީޕީ އެތެރޭގައި ބަހުސްކޮށް ހުރިހާ ކަމެއް ވަނީ ނިމިފަ އެވެ.
އެ އިސްލާހުގައިވާ ގޮތުން ވެރިކަމުގައި ހުންނަ ބޭފުޅަށް ޕްރައިމަރީއަކާ ނުލައި ރިޔާސީ ޓިކެޓު ލިބުނު ނަމަވެސް އެކަން ހުއްޓުވުމުގެ ބާރު ވެސް ކޮންގްރެސްއަށް ލިބެ އެވެ. އެ ގޮތަށް އިސްލާހުގައި ހިމެނުމުގެ ބޭނުމަކީ އަނިޔާވެރިއަކު ވެރިކަމަށް އައުން ހުއްޓުވުމެވެ.
އެމްޑީޕީގެ އަސާސީ ގަވާއިދު ބުނާ ގޮތުން މިހާރު އެ ޕާޓީގެ ރިޔާސީ ކެންޑިޑޭޓް ކަނޑައަޅަނީ އެތެރޭގެ ޕްރައިމަރީއަކުންނެވެ. އެމްޑީޕީގެ ރިޔާސީ ކެންޑިޑޭޓް ވެރިކަމުގައި ހުންނެވިޔަސް، ދެވަނަ ދައުރަކަށް ކުރިމަތިލައްވަން ޓިކެޓު ލިބޭނީ ޕްރައިމަރީ ކާމިޔާބު ކޮށްގެންނެވެ.
މިހާރު ހުންނެވި ރައީސުލްޖުމްހޫރިއްޔާ އިބްރާހީމް މުހައްމަދު ސޯލިހް ޕްރައިމަރީގައި ވާދަކުރައްވަ އެވެ. އަދި ރައްޔިތުންގެ މަޖިލީހުގެ ރައީސްގެ މަގާމު ފުރުއްވަމުން ގެންދަވާ، އެމްޑީޕީގެ ފުރަތަމަ ސަރުކާރުގެ ރައީސްކަން ކުރެއްވި މުހައްމަދު ނަޝީދު ވެސް ހުންނެވި ޕްރައިމަރީގައި ވާދަކުރައްވާ ގޮތަށެވެ.
އެހެން ނަމަވެސް އެއަށް ވުރެ ބޮޑަށް ނަޝީދު ބޭނުންފުޅުވަނީ ބަރުލަމާނީ ނިޒާމަކަށް ރާއްޖޭގެ ވެރިކަމުގެ ނިޒާމު ބަދަލުކޮށް ބޮޑު ވަޒީރަކަށް ވުމަށެވެ. ނަޝީދު ވަނީ އެ ކަމަށް ރައްޔިތުންގެ ފެންނަ ނުފެންނަ ވޯޓަކަށް ދިއުމަށް އެމްޑީޕީގެ ކޮންގްރެސްއަށް ހުށަހަޅައިފަ އެވެ.
އެހެންވިޔަސް ރައީސް ސޯލިހްއާއި އެމަނިކުފާނަށް ތާއީދު ކުރާ މީހުން އެކަމާ ދެކޮޅެވެ. ރައީސް ވަނީ ނަޝީދުގެ ގަރާރު ވެސް އަނބުރާ ގެންދިއުމަށް އެދިވަޑައިގެންފަ އެވެ. ނަމަވެސް ނަޝީދު ހުންނެވީ ގަރާރު ހުށަހަޅަން، ތާއީދު ހޯއްދެވުމުގެ މަސައްކަތް ކުރައްވާ ގޮތަށެވެ.
