މާދަމާ ރޭ ބާއްވަން ހަމަޖެހިފައިވާ އެމްޑީޕީގެ ކޮންގްރެސްއަށް ޕާޓީގެ އަސާސީ ގަވައިދާ ހިލާފަށް ބަޔަކު ނުގެންނަ ކަމަށާއި، އަމަލު ކުރަމުން ދަނީ އަސާސީ ގަވައިދާ އެއްގޮތަށް ކަމުގެ ޔަގީންކަން އެ ޕާޓީގެ ޗެއާޕާސަންގެ ނައިބު އިބްރާހީމް ވަހީދު (އެންސްޕާ އިބްރެ) ވިދާޅުވެއްޖެ އެވެ.
އެމްޑީޕީގެ ކޮންގްރެސްއަށް، އެ ޕާޓީގެ ގޮފިތަކަށް އިންތިހާބު ނުކުރާ ބަޔަކު ގެންނަން އުޅޭ ކަމުގެ ކަންބޮޑުވުން ފާޅުކޮށްފައި ވަނީ ރޭ އެމްޑީޕީ ހަރުގޭގައި ބޭއްވި ބައްދަލުވުމުގައި، އެ ޕާޓީގެ އާންމު މެންބަރެކެވެ.
އެކަމާ ބެހޭގޮތުން އެމްޑީޕީގެ ރައީސް މުހައްމަދު ނަޝީދު ވިދާޅުވީ ޕާޓީގެ ގޮފިތަކުގެ ތެރެއަށް އެކި ގޮތްގޮތަށް މީހުން މަސްހުނިކޮށްގެން، ކޮންގްރެސްގެ ނިންމުމަށް ނުފޫޒު ފޯރުވާ، ކޮންގްރެސްގެ ނިންމުމެއް ކަމަށް ބުނި ނަމަވެސް އެއީ އެމްޑީޕީގެ މެންބަރުން ބަލައިގަންނާނެ ކަމެއް ނޫން ކަމަށެވެ. އަދި އެގޮތަށް އަމަލު ނުކުރުމަށް ނަޝީދު ވަނީ އިލްތިމާސްކުރައްވާފަ އެވެ.
އިންތިހާބު ނުކުރާ ބަޔަކު ކޮންގްރެސްއަށް ގެންނަން އުޅޭކަމުގެ ތުހުމަތުތާ ގުޅިގެން "އަދަދު"އިން ސުވާލު ކުރުމުން އިބްރާހިމް ވަހީދު ވިދާޅުވީ ކޮންގްރެސްއަށް މީހުން ގެނައުމުގައި އަމަލު ކުރަމުންދަނީ ޕާޓީގެ އަސާސީ ގަވައިދާ އެއްގޮތަށް ކަމަށެވެ. އެގޮތުން ގޮފިތައް އިންތިހާބު ކުރަނީ ދާއިރާތަކުގެ ހިންގާ ކޮމިޓީން ކަމަށާއި، ޕާޓީން ބަލާނީ ގޮފިތަކުގައި ތިބި މީހުންނަކީ ޕާޓީގެ މެންބަރުތޯ އާއި، އެކަކު އެއް ގޮތްޕަށްވުރެ ގިނަ ގޮފިތަކުގައި ހުރިތޯ ކަމަށް އޭނާ ވިދާޅުވި އެވެ.
އިބްރާހިމް ވަހީދު ވިދާޅުވީ ޕާޓީގެ އަސާސީ ގަވައިދާ އެއްގޮތަށް ގޮފިތައް އިންތިހާބުކޮށްފައި، މަގާމުތަކަށް ހޮވޭ މީހުންގެ ލިޔެކިއުން ޕާޓީއަށް ފޮނުވުމުން، ޕާޓީން ކުރިއަށް ދާނީ ލިޔެކިއުމަށް ބަލައިގެން ކަމަށެވެ.
އަދި އެމްޑީޕީގެ އިންތިހާބީ ގަވައިދުގައި އޮންނަ ގޮތުން، މުޅި ޕާޓީން ވޯޓުލާންޖެހޭ އިންތިހާބުތައް ނޫން އެހެން އިންތިހާބުތަކުގައި، މަގާމަކަށް އެކަކު ކުރިމަތިލައިފިނަމަ، އިންތިހާބު ބޭއްވުމަކާ ނުލާ އޭނާ އެ މަގާމަށް ހޮވޭނެ ކަން އޭނާ ފާހަގަކުރެއްވި އެވެ.
އެގޮތަށް ހޮވޭ [އެކަކު ކުރިމަތިލުމުން އިންތިުހާބާ ނުލާ ހޮވުން] މީހަކީ އިންތިހާބަކާ ނުލާ ނުވަތަ ވަގަށް ގެނައި މީހެއް ކަމަކަށް ނުބުނެވޭނެ،
އިބްރާހިމް ވަހީދު އިތުރަށް ވިދާޅުވީ އެ ޕާޓީގެ ގޮފިތަކުގެ ހިންގާ ކޮމިޓީގެ ދައުރަކީ ހަތަރު އަހަރު ކަމަށެވެ. އަދި މިއަހަރުގެ އިންތިހާބު ޖެހުނުއިރު، ގިނަ ގޮފިތަކަކީ 2017 ވަނަ އަހަރު އިންތިހާބުކޮށްފައި ހުރި ގޮފިތައްކަމުން، އެ ގޮފިތަކުގެ ދައުރު އަދި ހަމައެއް ނުވާ ކަމަށް ވެސް އޭނާ ވިދާޅުވި އެވެ.
ބޮޑު ނިންމުންތަކެއް، ވާދަވެރިކަން ހޫނު
ގާތްގަނޑަކަށް 1،100 އެއްހާ މެމްބަަބރުންނާއެކު، އަންނަ ހުކުރު ދުވަހު ފަށާ އެމްޑީޕީގެ ކޮންގްރެސްއަށް ނަޝީދު ވަނީ ބަރުލާމާނީ ނިޒާމަކަށް ވެރިކަމުގެ ނިޒާމު ބަދަލު ކުރުމާ މެދު ރައްޔިތުންގެ ފެންނަ ނުފެންނަ ވޯޓަކަށް ދިއުމަށް ހުށަހަޅުއްވައިފަ އެވެ.
ނަމަވެސް, މިހާރު އެމްޑީޕީގެ ތެރޭގައި ރިޔާސީ ނިޒާމާއެކު ކުރިއަށް ދާން ބޭނުންވާ މީހުން ވެސް ގިނަ އެވެ. އެމްޑީޕީގެ އިސް ލީޑަރު އަދި ރައީސް އިބްރާހީމް މުހައްމަދު ސޯލިހް ވެސް ވަނީ ނަޝީދުގެ ގަރާރު އަނބުރާ ގެންދެވުމަށް އެދިވަޑައިގެންފަ އެވެ.
އެމަނިކުފާނު ވިދާޅުވެފައިވަނީ މިއީ ރާއްޖޭގެ ވެރިކަމުގެ ނިޒާމް ބަދަލުކުރަންވީ ވަގުތު ނޫން ކަމަށާއި އިސްކަން ދޭންވީ ގައުމަށް ދިމާވެފައިވާ މައްސަލަތައް ހައްލުކުރުމަށް ކަމަށެވެ. މީގެކުރިން ވެސް ނިޒާމް ބަދަލުކުރަން ތާއިދު ނުކުރައްވާކަން ހާމަކުރައްވާފައިވާ ރައީސް ވިދާޅުވީ, ބަރުލަމާނީ ނިޒާމް ގެންނަން ރާއްޖެ އޮތީ މާޅަފަތުގަ ކަމަށެވެ.
ނިޒާމް ބަދަލުކުރަން ގާނޫނުއަސާސީ ބަދަލުކުރަން ހުށަހަޅަން އެމްޑީޕީގެ ކޮންގްރެސްއިން ވެސް ތާއިދު ކުރާނެ ކަމަކަށް ގަބޫލު ނުކުރެއްވޭ ކަމަށާއި އެހެންވެ, އެ ގަރާރު އަނބުރާ ގެންދިޔުމަށް އެދިވަޑައިގަންނަވާ ކަމަށް ރައީސް, ޓީވީ ޗެނަލަށް ފޯނުން ދެއްވި އިންޓަވިއުގައި ވިދާޅުވެފައިވެ އެވެ.
ނަޝީދު ފިޔަވައި އިތުރު ސިޔާސީ ލީޑަރަކު މި ވަގުތަށް ބަރުލަމާނީ ނިޒާމު ގެންނަން ތާއީދެއް ނުކުރައްވަ އެވެ. ކުރިން ބަރުލަމާނީ ނިޒާމަށް ތާއީދު ކުރެއްވި ޔާމީން ވެސް ވިދާޅުވަނީ މި ވަގުތަށް އެ ނިޒާމު ރާއްޖެއަށް "ފިޓު" ނޫން ކަމަށެވެ.
