ކުރީގެ ރައީސް މުހައްމަދު ނަޝީދު ކެމްޕެއިން ކުރައްވަނީ ރާއްޖޭގެ ވެރިކަން ހިންގާ ނިޒާމް, ބަރުލަމާނީ ނިޒާމަކަށް ބަދަލުކުރުމަށެވެ. ކުރީގެ ރައީސް އަބްދުالله ޔާމީން ގަބޫލުކުރައްވާ ގޮތުގައި, އެއީ އެންމެ ރަނގަޅު ނިޒާމެވެ. އެކަމަކު ރާއްޖެއަށް "ފިޓެއް" ނޫނެވެ. ކުރީގެ ރައީސް މައުމޫން އަބްދުއްގައްޔޫމް, ބަރުލަމާނީ ނިޒާމާ މުޅީން ދެކޮޅެވެ.
މިއީ, މިވަގުތު ރާއްޖޭގައި ގިނަ ބައެއްގެ ވިސްނުންތައް ވެސް ހުންނާނެ ގޮތެވެ.
ރާއްޖޭގައި ވެރިކަން ކުރާނީ ރިޔާސީ ނިޒާމެއްގެ ތެރެއިން ކަމަށް ކަނޑައެޅިގެން ދިޔައީ 2007 ވަނަ އަހަރު, ބޭއްވި ރައްޔިތުންގެ ފެންނަ, ނުފެންނަ ވޯޓުންނެވެ. ޕާޓީގެ ނިޒާމަށް އާވެފައި ތިބި ރައްޔިތުން އޭރު ވޯޓު ދިނީ އެ ބަޔަކު ގަޔާވާ ސިޔާސީ ބޭފުޅުން ވިދާޅުވި ގޮތަށެވެ. ސިޔާސީ ލެވެލްގައި ވެރިކަމުގެ ނިޒާމާ މެދު ބަހުސްތަކެއް އޮތަސް, ރައްޔިތުންގެ މެދުގައި ވާދަވެރިކަން އޮތީ, އޭރުގެ އިދިކޮޅަށް ކާމިޔާބު ހޯދުން ނޫނީ ރައީސް މައުމޫންގެ ކާމިޔާބީ ކުރިއަށް ގެންދިއުމަށެވެ.
އެގޮތުން, ރައީސް މައުމޫން ވަރަށް ބޮޑަށް ކެމްޕެއިން ކުރައްވައިގެން ރައްޔިތުންގެ ބޮޑު ބައެއް ރިޔާސީ ނިޒާމަށް އާނއެކޭ ބުނީ އެވެ. އޭގެ ފަހުން، ރިޔާސީ ނިޒާމަކުން ވެރިކަން ހިންގާ ގޮތަށް ފެހި ގާނޫނުއަސާސީ ފަރުމާކޮށް، 2008 ވަނަ އަހަރު ބޭއްވި ރިޔާސީ އިންތިހާބުގައި ރިޔާސީ ނިޒާމްގެ ތެރެއިން ފުރަތަމަ ޑިމޮކްރަޓިކް ރައީސް އިންތިހާބުވެގެން ދިޔައީ އެވެ. މިހާރު, އަނެއްކާވެސް އެ ނިޒާމް ބަދަލު ކުރައްވަން ނުކުންނަވައި އެ ހުންނެވީ, އެ ރައީސް އެވެ.
ބަރުލަމާނީ, ރިޔާސީ, ނިޒާމްގެ ފަރަގު
ބަރުލަމާނީއެއްގެ އެންމެ ރަނގަޅު މިސާލެއް ނެގޭނީ ދުނިޔޭގައި އޮތް އެންމެ ބޮޑު ޑިމޮކްރަސީ ކަމަށްވާ އިންޑިއާއިންނެވެ. މި ނިޒާމްގައި ސަރުކާރު ހިންގުމުގެ ހުރިހާ ބާރެއް އޮންނާނީ ގާނޫނު ހަދާ މަޖިލީހުގެ މެންބަރުންގެ ތެރޭން, އެ މެންބަރުން އަމިއްލައަށް އައްޔަންކުރާ ބޮޑުވަޒީރަށެވެ. ގިނަ ފަހަރަށް ބޮޑުވަޒީރަކަށް ވާނީ މަޖިލީހުގެ އަގުލަބިއްޔަތު ހޯދާ ޕާޓީ ނުވަތަ ކޯލިޝަންގެ ލީޑަރެވެ.
ބޮޑުވަޒީރާއެކު ކެބިނެޓުގައި ހިމެނޭ ހުރިހާ ވަޒީރުން ވެސް އައްޔަނުވެގެން ދާނީ މަޖިލިސް މެންބަރުންގެ ތެރޭންނެވެ. މަޖިލިސް މެންބަރުން އިންތިހާބު ކުރާނީ އެކި ސަރަހައްދުތަކުން, އެ ސަރަހަދަކަށް މެންބަރުން ހާއްސަކޮށްގެންނެވެ. އެހެންކަމުން, ބޮޑުވަޒީރަކަށް އަންނަ މީހަކީ, މުޅި ރައްޔިތުންގެ ވޯޓާއެކު އަންނަ މީހެއް ނޫނެވެ. މި ނިޒާމުގައި ސަރުކާރު ހިންގާ ފަރާތަކީ ބޮޑުވަޒީރެވެ. ދައުލަތުގެ އެންމެ އިސްވެރިޔަކީ ރައީސުލްޖުމްހޫރިއްޔާ އެވެ. އެއީ މާބޮޑު ބާރުތަކެއް ނޯންނަ، ރަމްޒީ މަގާމެކެވެ.
ބައެއް ގައުމުތަކުގައި ރައިސުލްޖުމްހޫރިއްޔާ, ރައްޔިތުންގެ ވޯޓަކުން ހޮވާ ގޮތަށް އޮތް ނަމަވެސް, އިންޑިއާގައި ރައިސުލްޖުމްހޫރިއްޔާ ހޮވަނީ އިލެކްޓޯރަލް ކޮލެޖް ވޯޓުންނެވެ. އެއީ ވެސް މުޅި ރައްޔިތުންގެ ވޯޓާއެކު ހޮވޭ މަގާމެއް ނޫނެވެ. ރާއްޖޭގައި މިއޮތީ އެއާ މުޅީން ހިލާފު, އެމެރިކާގައި އޮތް ފަދަ ރިޔާސީ ނިޒާމެވެ. މިއީ ތިން ބާރު ވަކިކުރުމުގެ މަބްދައު (ސެޕަރޭޝަން އޮފް ޕަވާ ޑޮކްޓްރައިން)ގެ އުސޫލުގެ މައްޗަށް ހިންގާ ނިޒާމެވެ.
ރޯމަނުން އުފަންވެގެން އައި ތިން ބާރު ވަކިވުމުގެ އުސޫލުން ރާއްޖޭގެ ދައުލަތް ތިން ދިމާއަށް ބަހާލައި ބާރުތައް ވަކިކޮށް، އެއް ބާރު އަނެއް ބާރަށް ފާރަވެރިވެވޭނެ (ޗެކް އެންޑް ބެލެންސް) ނިޒާމެއް ގާއިމްކުރި އެވެ. މި ނިޒާމުގެ ތެރޭގައި ދައުލަތުގެ އެންމެ މަތީ ފަރާތާއި ސަރުކާރުގެ ވެރިއަކީ ސީދާ ރައްޔިތުންގެ ވޯޓަކުން ހޮވާ ރައީސުލްޖުމްހޫރިއްޔާ އެވެ. ރައްޔިތުންގެ މަޖިލީހާއި ޝަރުއީ ދާއިރާއަކީ ރައިސުލްޖުމްހޫރިއްޔާގެ ބާރު ނުހިނގާ މުޅިން މުސްތަގިއްލު ދެ ބާރެވެ.
މުޅި ނިޒާމް ބަދަލުކުރަންޖެހޭ ހާލަތެއް އެބަ އޮތްތަ؟
އުސޫލީ ގޮތުން މޮޅެތި ޕްރިންސިޕަލްތަކެއް ހުރި ރިޔާސީ ނިޒާމެއް ރާއްޖޭގައި އޮތަސް, އެ ނިޒާމްގެ ތެރެއިން ވެރިކަން ކުރަން ދަތިކަން ކުރީގެ ރައީސް ނަޝީދު ހާމަކުރައްވަ އެވެ. ރިޔާސީ ނިޒާމުގެ އަސާސީ ސިފަތަކަށް ގާނޫނުއަސާސީ ބައްޓަންކޮށްފައި އޮތަސް، އެ ގާނޫނުއަސާސީ އެކުލަވާލެވިފައިވަނީ ބަރުލަމާނީ ސިފަތަކަކާއެކު ކަމަށް އެ ބޭފުޅާ ގަބޫލުކުރައްވަ އެވެ.
ރައީސް މުހައްމަދު ނަޝީދު ދެކެވަޑައިގަންނަވާ ގޮތުގައި ގޯހަކަށްވީ ގާނޫނުއަސާސީގެ ބޮޑު ބައި އެކުލަވާލުމަށްފަހު ނިޒާމާމެދު ގޮތެއް ނިންމުމެވެ. އޭގެ ސަބަބުން ބަރުލަމާނީއަށް ފައްކާކުރި ގާނޫނުއަސާސީގެ ދަށުން ހިންގަން ޖެހުނީ ރިޔާސީ ނިޒާމެވެ. ނަޝީދު ވިދާޅުވާ ގޮތުގައި ފެހި ގާނޫނުއަސާސީއަކީ ކުރީގެ ރައީސް މައުމޫން އަބްދުލްގައްޔޫމްއާ ދެކޮޅަށް ލިޔުއްވި ލިޔުމެކެވެ. އެހެންކަމުން, ރައީސުލްޖުމްހޫރިއްޔާގެ ބާރުތައް ހަނިކުރަން އޭގައި ވަނީ ވަރަށް ބޮޑަށް މަސައްކަތްތައް ކޮށްފަ އެވެ. އެ ލިޔެ, އެމުނި ގާނޫނުއަސާސީގެ ދަށުން މައުމޫންގެ ވެރިކަން ނިންމައި, ވެރިކަން ހިންގަން ލިބިދާނެ ކަމަކަށް އޭރުގެ އިދިކޮޅުން އުއްމީދެއް ނުކުރެ އެވެ.
ގާނޫނުއަސާސީ އެކުލަވާލުމުގައި އިސް ދައުރެއް އަދާ ކުރެއްވި ޑރ. ހަސަން ސައީދު ވިދާޅުވެފައިވާ ގޮތުގައި އެ ލިޔުނީ ހެޔޮ ނިޔަތެއްގައި ނޫނެވެ. އޭރުގެ އިދިކޮޅު ފަރާތްތަކުން ބޭނުންވީ ރައީސް މައުމޫންގެ ވެރިކަމަށް އެޅެން އޮތް ހުރަހެއް އެޅުމަށެވެ. އެއީ ގައުމުގެ ދިގު ރާސްތާގެ މުސްތަގުބަލަށް ބަލައި ބިނާކޮށްފައި އޮތް އެއްޗެއް ނޫން ކަމަށް އޭރުގެ ބަންޑާރަ ނައިބު ވިދާޅުވެފައި ވެ އެވެ.
ފެހި ގާނޫނުއަސާސީ --
އެގޮތުގެ މަތީން ގާނޫނުއަސާސީ ބައްޓަން ކޮށްފައިވަނީ ރައިސުލްޖުމްހޫރިއްޔާއަށްވުރެ، ރައްޔިތުންގެ މަޖިލީހުގެ މެންބަރުން ހައިބަތު ބޮޑުވާނެ ގޮތަށެވެ. ރައީސުލްޖުމްހޫރިއްޔާއަށްވުރެ ގިނަ އިމްތިޔާޒުތަކާއި އިނާޔަތްތައް ވެސް ލިބޭ ގޮތަށެވެ. ރައިސުލްޖުމްހޫރިއްޔާގެ އިތުބާރު ނެތް ކަމަށް ނެގޭނެ ހަމަތައް ލިޔެފައި އަކުރުތައް ތަރުތީބުކޮށްފައިވާއިރު މަޖިލީހުގެ މެންބަރުން ހޮވުމަށްފަހު މަގާމުން ވަކި ކުރެވޭނެ ގޮތެއް ނެތެވެ. ބައެއް ހާލަތްތަކުގައި މެންބަރު ކަމުގެ ގޮނޑި ގެއްލޭނެ ކަމަށް އޮތް ނަމަވެސް, އެެހެން ހުރިހާ މަގާމެއްގައި ވެސް އިތުބާރު ނެތް ކަމަށް ކަނޑައެޅެން އޮންނަ އޮތުން މެންބަރުންނަށް ވަނީ އިސްތިސްނާކޮށްފަ އެވެ.
މި ނިޒާމް މައްސަލައަކަށްވެފައި ވަނީ, ޗެކް އެންޑް ބެލެންސްގެ އުސޫލާ ފުށުއަރާ ގޮތަށް, ތިން ބާރު އެއް ތަނަކަށް ޖަމާވާ ގޮތަށް ޖުޑީޝަލް ސާވިސް ކޮމިޝަން (ޖޭއެސްސީ) އެކުލަވާލާފައި އޮތުމުން ކަމަށް ބައެއް ގާނޫނީ ބޭފުޅުން ދެކެ އެވެ. ތިން ބާރު މަސްހުނިވާ ގޮތަށް އޮތް ޖޭއެސްސީގައި ސިޔާސީ ބޭފުޅުން ތިއްބަން ނުޖެހޭ ކަމަށް ގާނޫނުއަސާސީ ހެދި ހާއްސަ މަޖިލީހުގައި މެންބަރުން ވާހަކަ ދައްކަވާފައިވެ އެވެ. އެކަމަކު އޭރު އެކަމަށް މާބޮޑު ސަމާލުކަމެއް ނުދީ ފާސްކުރީ އެވެ. މިހާރު ޖޭއެސްސީގެ އެކުލަވާލުން ބަދަލު ކުރަން ޖެހޭ ކަމަށް ގިނަބަޔަކު އެއްބަސްވެ އެވެ.
އެހެންކަމުން, އުފެދޭ ސުވާލަކީ ނިޒާމީ މައްސަލަތައް ހައްލުކުރަން, މިހެން ހުރި ވަކިވަކި ކަންކަން ހައްލު ކުރުމުގެ ބަދަލުގައި މުޅި ނިޒާމް, އެކީ އެކަށް ބަދަލު ކުރާނީ ހެއްޔެވެ؟
ރާއްޖެއަށް ރަނގަޅު ގޮތުގެ ނިޒާމީ ބަހުސް
މިހާރު ވެރިކަމުގައި ހުންނެވި ރައީސް އިބްރާހިމް މުހައްމަދު ސޯލިހް ދެކެވަޑައިގަންނަވާ ގޮތުގައި ރާއްޖެ މިއޮތީ ވެރިކަމުގެ ނިޒާމު ބަދަލުކުރުންފަދަ ބޮޑު ނިންމުމަކަށް ތައްޔާރުވެފައެއް ނޫނެވެ. މިއީ އެ ދަނޑިވަޅެއް ނޫނެވެ. މުޅި ނިޒާމް ބަދަލުކުރުމަށް އެމަނިކުފާނު ތާއިދެއް ނެތެވެ. ރައީސް ވިދާޅުވި ގޮތުގައި, ރާއްޖެއަށް އެންމެ ރަނގަޅު ގޮތަކީ ރައްޔިތުންގެ ވޯޓުން ރައީސް ހޮވައި, ސަރުކާރު ޖަވާބުދާރީކުރުމުގެ ޒިންމާ ރައްޔިތުން ހޮވާ މަންދޫބުންގެ އަތް މަތީގައި ބޭއްވުމެވެ. މިނިވަން ފަނޑިޔާރުގެއަކާއެކު, ތިން ބާރު ވަކިވެފައި އޮތުމެވެ.
އެއާއެކު ދެން ފެށިގެން އަންނަ ބަހުސަކީ, ރައްޔިތުންގެ ވޯޓަކުން ރައީސަކު އިންތިހާބުވެގެން އަންނަ ގޮތެވެ. މިހާތަނަށް ބޭއްވި ކޮންމެ ރިޔާސީ އިންތިހާބެއް ވެސް ކާމިޔާބުކޮށްފައިވަނީ ކޯލިޝަނަކުންނެވެ. 2008 އަހަރު ފެށިގެން އުފެދުނީ މުޅީން ވެސް ކޯލިޝަން ސަރުކާރުތަކެވެ. ވެރިކަން ހިންގުމުގައި މައި ޕާޓީއެއް އޮތަސް, ސަރުކާރުން ވަކި ޕަސެންޓެއް އެހެން ޕާޓީތަކަށް ބަހާލަން ޖެހެ އެވެ. އެއީ, މިނިސްޓަރުންނާއި ސްޓޭޓް މިނިސްޓަރުގެ މަގާމުތައް ހިމެނޭ ގޮތުންނެވެ.
ނަޝީދުގެ އެންމެ ބޮޑު ކަންބޮޑުވުމަކީ މިއީ އެވެ. ރައްޔިތުންގެ ތާއިދެއް ނެތް, އިންތިހާބެއް އަމިއްލައަށް ކާމިޔާބު ނުކުރެވޭ ޕާޓީތަކަށް ސަރުކާރުން ބައި އަޅަން ޖެހުމެވެ. މިވަގުތަށް ބަލާނަމަ, ސަރުކާރުގެ ބޮޑު ބައެއް ހިއްސާކުރާ އަދާލަތު ޕާޓީ އަދި އެމްއާރްއެމްއިން އެންމެ ފަހުގެ މަޖިލިސް އިންތިހާބަށް ނުކުތް ނަމަވެސް, އެއްވެސް ގޮނޑިއެއް ލިބިފައެއް ނުވެ އެވެ. އެ ޕާޓީތަކަށް ބައި އަޅައިގެން ތިބުމަކީ, މައި ޕާޓީ އެމްޑީޕީއަށް ގެއްލުންވާ ކަމެއްގެ ގޮތުގައި ނަޝީދު އަންނަނީ ތަކުރާރުކޮށް ވިދާޅުވަމުންނެވެ.
އެހެންނަމަވެސް, މިފަހުން ރައީސް ވިދާޅުވީ އެމަނިކުފާނު ގަބޫލު ކުރައްވާ ގޮތުގައި އެންމެ ރަނގަޅު ގޮތަކީ ގިނަ ޕާޓީތައް އެކުލެވޭ, ގިނަ ހިޔާލުތަކާއެކު ސަރުކާރެއް ހިންގުމެވެ. އޭރުން ރައްޔިތުންގެ ބައިވެރިވުމާއި ހިޔާލު, އެ ސަރުކާރެއްގައި ބޮޑުކޮށް އޮންނާނެ ކަމަށް އެމަނިކުފާނު ގަބޫލުކުރައްވަ އެވެ. އެކަމަކު, ކުރީގެ ރައީސް އަބްދުالله ޔާމީން ގަބޫލުކުރައްވާ ގޮތުގައި ރައްޔިތުންގެ ޝާމިލްވުން މާބޮޑަށް އޮންނަ ނިޒާމަކީ ބަރުލަމާނީ ނިޒާމެވެ.
އެހެންވެ, ފެށުނީންސުރެ ވެސް އެމަނިކުފާނު ތާއިދު ކުރައްވަނީ ބަރުލަމަނީ ނިޒާމަށެވެ. އެކަމަކު ރާއްޖެއަށް މިވަގުތު ބަރުލަމާނީ ނިޒާމް ނުފެތޭކަން ޔާމީން ފާހަގަކުރެއްވި އެވެ. އޭގެ ހަރަދު ބޮޑުވުމާއި ސިޔާސީ ހަލަބޮލިކަން ސަބަބެއްގެ ގޮތުގައި ޔާމީން ފާހަގަކުރައްވަ އެވެ.
ބަރުލަމާނީ ނިޒާމެއްގައި ޕާޓީއެއްގެ ތެރެއިން މަޖިލީހަށް އިންތިހާބުވާ މެންބަރުން ވިޕަށް އަމަލު ކުރަން ޖެހޭނެ ކަމާއި ޕާޓީން ވަކިވުން ފަދަ ކަންކަން މަނާކުރާނެ އެވެ. ނަމަވެސް, ރާއްޖޭގައި އެކަން ނުހިނގާނެ ކަމަށާއި ރާއްޖޭގެ މަޖިލިސް މެންބަރުން ވަރަށް ފަސޭހަކަމާއެކު އެކި ދިމާލަށް ދާއިރު, އެކަން ރެގިއުލޭޓް ކުރާނެ ގޮތެއް ނެތް ކަމަށް ޔާމީން ވިދާޅުވި އެވެ.
ރައްޔިތުންގެ މަޖިލީހުގެ މެންބަރުކަން ވެސް ގިނަ އަހަރުތަކެއްގައި ކުރެއްވި ޔާމީން ވިދާޅުވީ ބަރުލަމާނީ ނިޒާމްގެ ތެރެއިން ކޯލިޝަން ސަރުކާރުތައް ހިންގާއިރު, އެއީ ވަރަށް އަވަހަށް ބަދަލުވުމުގެ ފުރުސަތު އޮންނަ ސަރުކާރުތަކެއް ކަމަށެވެ. އޭގެ ބަދަލުގައި ރިޔާސީ ނިޒާމެއްގައި ސަރުކާރު މާބޮޑަށް ސްޓޭބަލްކަން ފާހަގަކުރެއްވި އެވެ.
އެއާހިލާފަށް ނަޝީދު ގަބޫލުކުރައްވާ ގޮތުގައި, ބަރުލަމާނީ ނިޒާމެއްގެ ތެރޭން ސަރުކާރު ބަދަލުވުމާއި މެންބަރުން ގަނެލުން ފަދަ ކަންކަން އާންމެއް ނުވާނެ އެވެ. "ފައިސާއަށް ދީލާލާ" ސަބަބު ފެށިގެން އަންނަނީ އެމީހެއްގެ އަމިއްލައަށް އިހުސާސް ކުރެވޭ ނިކަމެތި ކަމުގެ ތެރެއިން ކަމަށާއި, ބަރުލަމާނީ ނިޒާމްގެ ތެރޭން އިގުތިސޯދީ ހާލަތު ރަނގަޅު ކުރެވޭނެ ކަމަށް އެމަނިކުފާނު ވިދާޅުވެ އެވެ. އެއާއެކު, މިވަގުތު ސިޔާސީ މަންޒަރު އޮތް ގޮތުން އެމްޑީޕީއަށް އެކަނި ވެރިކަމަށް އާދެވޭނެ ގޮތަކީ ވެސް އެއީ, ކަމަށް ނަޝީދު ގަބޫލުކުރައްވަ އެވެ.
ނިޒާމާ ގުޅޭ ގޮތުން ރައީސް އާއި ނަޝީދުގެ ވިސްނުން ތަފާތު
އެކަމަކު, އެމްޑީޕީގެ ޗެއާޕާސަން, އިކޮނޮމިކް މިނިސްޓަރު ފައްޔާޒު އިސްމާއިލް ވެސް ބަރުލަމާނީ ނިޒާމާ ހެއްދެވީ ދެކޮޅެވެ. ފައްޔާޒު ވިދާޅުވި ގޮތުގައި, ރާއްޖެއަކީ ކުޑަ ގައުމަކަށް ވުމާއެކު ބަރުލަމާނީ ނިޒާމަކަށް ބަދަލުކުރުމުން ނުކުންނަ ނަތީޖާ ރަނގަޅު ވާނެ ކަމަށް ގަބޫލު ނުކުރެ އެވެ. ބަރުލަމާނީ ނިޒާމުގައި މަދު ބައެއްގެ އަތް ދަށަށް ސަރުކާރުގެ ކޮންޓްރޯލް ދާނެ އެވެ.
"ރައްޔިތުންގެ މަޖިލިސްގެ ތެރެއިން ސަރުކާރެއް އުފެދިގެން ދާއިރު މިކަހަލަ ކުޑަ ގައުމެއްގައި ރައްޔިތުންގެ މަޖިލީހުގެ އަދަދު ވެސް ކުޑަ. އެހެންމަ އަޅުގަނޑު ކަންބޮޑުވާ ކަމެއް، ބާރުގަދަ ބައެއްގެ އަތް މައްޗަށް މަޖިލީހާއި ސަރުކާރު ދިޔުމުގެ ފުރުސަތު, ޖުޑީޝިއަރީ އަދި ހުރިހާ އެއްޗެއް ވެސް އެ ކޮންޓްރޯލްގެ ދަށަށް އެބަ އާދޭ،" ފައްޔާޒުގެ ކަންބޮޑުވުމަކީ މިއީ އެވެ.
އެކަމަކު ކޮންގްރެސްގެ މައުލޫއަކީ މިއީ
މާދަމާ ފަށާ އެމްޑީޕީގެ ކޮންގްރެސްއަށް އޮތް ބޮޑު މައުލޫއަކީ މިއީ އެވެ. ބަރުލަމާނީ ނިޒާމަކަށް ރާއްޖެ ފުރޮޅާލަން އެމްޑީޕީގެ ތާއިދު ހޯދުމަށް ނަޝީދު ގަރާރު ހުށަހަޅުއްވާފައިވާއިރު, އެ ގަރާރަށް ތާއިދު ހޯއްދެވުމަށް ގެންދަވަނީ މަސައްކަތް ކުރައްވަމުންނެވެ.
އެހެންނަމަވެސް, އާންމުކޮށް މިފަހުން އެމްޑީޕީގެ ތެރޭން ފެންނަ ދެ ފެކްޝަން ވަނީ މިކަމުގައި ވެސް ދެ ކަފިވެފަ އެވެ. ރައީސް ސޯލިހުގެ ފަރާތުގައި ތިއްބަވާ ބޭފުޅުން ގެންދަވަނީ ބަރުލަމާނީއާ ދެކޮޅު ހައްދަވަމުންނެވެ. ނަޝީދުގެ އަރިސް ބޭފުޅުން އެކަން ސިފަ ކުރައްވަނީ ބަރުލަމާނީ ނިޒާމަށްވުރެ, ނަޝީދާ ދެކޮޅަށް އެމްޑީޕީގެ ތެރޭން އުޅޭ އުޅުމަކަށެވެ.
ކޮންމެ ރެއަކު ހަރުގޭގައި ނަޝީދު ތާއިދު ހޯއްދަވަން ޖަލްސާ ބާއްވަމުން ގެންދަވާއިރު, ރޭގެ ފެނުނު މަންޒަރުން އެކަމަށް މާބޮޑު ޝައުގެއް އޮތް ކަމަކަށް ނުބެލެވެ އެވެ. ނަޝީދު ހަރުގެއަށް ވަޑައިގެންނެވިއިރު, އެ ތަނުގައި ހުރީ ހުސް ގޮނޑިތަކެވެ. ކުރިއާލާ ނަޝީދު ޓްވީޓް ކުރެއްވުމުން ވެސް ގަޑިއަށް އެތަނަށް ދާނެ ބަޔަކު ނުވީ އެވެ. އެކަމަކު, ބަރުލަމާނީއާ ދެކޮޅަށް ސީދާ ކެމްޕެއިން ހަރަކާތްތަކެއް އެމްޑީޕީގެ އަނެއް ފެކްޝަނުން ކުރިއަށް ނުގެންދާއިރު, ތާއިދު ވަޒަންކުރަން ދައްޗެވެ.
ނިޒާމީ ބަހުސްގެ ތާއިދު ތިލަފަތަށްލާ ކިރަން އެނގޭނީ, ހުކުރު ދުވަހު ފަށާ އެ ޕާޓީގެ ކޮންގްރެސްގައި ބައިވެރިވާ 1440 އެއްހާ މަންދޫބުން ހިޔާލު ހުންނަ ގޮތަކުންނެވެ. ފަހުގެ ތާރީހަށް ބަލާއިރު, ގައުމީ މަޖިލީހާއި ޗެއާޕާސަންގެ އިންތިހާބު ކާމިޔާބުކޮށްފައިވަނީ ރައީސްގެ ފެކްޝަނުންނެވެ. އެހެންވެ, ނަޝީދު ވަނީ އެ ފެކްޝަންގެ ތާއިދު ހޯއްދެވުމަށް ވެސް މަސައްކަތް ކުރައްވާފަ އެވެ. އެގޮތުން, މިހާރުގެ ޗެއަރޕަރސަން ފައްޔާޒާ ދެކޮޅަށް އެރުއްވުމަކީ ކުރެވުނު ގޯސް ކަމެއް ކަމަށް ވިދާޅުވެ, އޭނާގެ ތާއިދު ވަރަށް ބޮޑަށް ބޭނުންވާ ކަމަށް ވަނީ ވިދާޅުވެފަ އެވެ.
ނަޝީދު ވިދާޅުވާ, އެމްޑީޕީގެ ތިންވަނަ ކެންޑިޑޭޓް ކަމަށްވާ ފޮރިން މިނިސްޓަރު އަބްދުالله ޝާހިދު ވެސް ބަރުލަމާނީ ނިޒާމާ ދެކޮޅު ހައްދަވާފައިވާއިރު, ކޮންގްރެސްގެ ތެރޭން ގަރާރު ފާސްކުރުން ނަޝީދަށް ވާނީ އަދާޔާހިލާފު ބޮޑު ޗެލެންޖަކަށެވެ. އެކަމަކު, އެމަނިކުފާނު ވިދާޅުވި ގޮތުގައި, މަސައްކަތަށް ނުކުންނަވާ ހުންނެވީ ކާމިޔާބުކުރުމަށެވެ. ކާމިޔާބުވުން ނޫން މަންޒަރެއް މިވަގުތަށް ނުފެންނަ ކަމަށް ވެސް ވިދާޅުވެފައި ވެ އެވެ.
އެންމެ ކުރު މަގުން, ބަރުލަމާނީ ގެނައުމަށް ނަޝީދު މި ފަށާ ދަތުރުގެ އެންމެ ވަރުގަދަ ހުރަސްތައް އެމްޑީޕީގެ ކޮންގްރެސްއިން ނައްތާނުލެވިއްޖެނަަމަ, ނިޒާމާއި ބޮޑުވަޒީރުގެ ހުވަފެން އަނެއްކާވެސް ފަހަތަށް ފަނޑުވެގެން ދާނެ އެވެ. އަދި, ވެރިކަމަށް ވަޑައިގެންނެވުމަށް ކުރައްވަން ޖެހޭ އިންތިޒާރު އަނެއްކާވެސް ދިގުލައިގެން ދިޔުމުގެ ފުރުސަތު ބޮޑެވެ. މި ކޮންގްރެސްގެ ތެރެއިން ސާފުވެގެން ދާނޭ އެއް ކަމަކީ އެމްޑީޕީގެ ތެރޭ ތާއިދު އޮތް ބޭފުޅެކެވެ.
ނާކާމިޔާބުވެއްޖެނަމަ, ރިޔާސީ ޕްރައިމަރީއާ ހިސާބަށް ނަޝީދު ވަޑައިނުގެންނެވުން އެކަށީގެންވެ އެވެ. އެހެންވެއްޖެނަމަ, ދެން އޮތް ފުރުސަތަކީ އަނެއްކާވެސް 2028 އަށް އިންތިޒާރު ކުރުމެވެ. އެކަމަކު, އެއީ ސިޔާސީ މަގުބޫލު ކަމާއި ތާއިދު އެނބުރެމުންދާ ގޮތުން ނަޝީދު ރަނގަޅު ހިސާބަކަށް ނުވާނެ އެވެ. އެހެންވީއިރު, ހުކުރު ދުވަހު ފަށާ ކޮންގްރެސް އޮތީ ނަޝީދުގެ ކުރިމަގާ ވެސް ގުޅިފަ އެވެ. އުކުޅަހު ކޮންގްރެސްގައި ރައީސް ސޯލިހްގެ ސިޔާސީ ކުރިމަގު, ފައްކަލަށް ކުރައްސާލިއިރު, މި ކޮންގްރެސްގައި ވެސް އެ މަންޒަރު ފެނުމުގެ ފުރުސަތު ބޮޑެވެ.
އެހެންކަމުން, އެމްޑީޕީގެ މި ކޮންގްރެސްއަކީ ޝައުގުވެރި, ސިޔާސީ އިންގިލާބެއް ގެންނާނެ އެއްވުމަކަށް ވާނެ އެވެ.
