މެންޗެސްޓާ (އޮގަސްޓް 18) - އޭނާގެ މުސްތަގުބަލާ ގުޅުވައިގެން މީޑިއާ އިން މި ފަހަރުގެ ޓްރާންސްފާ މާކެޓްގެ ތެރޭގައި ގިނައިން ދައްކާފައިވަނީ ދޮގު ވާހަކަތަކެއް ކަމަށް މެންޗެސްޓާ ޔުނައިޓެޑްގެ ތަރި ކްރިސްޓިއާނޯ ރޮނާލްޑޯ ބުނެފި އެވެ.
ޔުނައިޓެޑުން މި ސީޒަނުގައި ޗެމްޕިއަންސް ލީގުގައި ވާދަނުކުރާތީ އާއި އެ ކްލަބް މި ވަގުތު އޮތީ ހުރިހާ މުބާރާތަކަށް ވާދަކުރެވޭ ހާލަތެއްގައި ނޫން ކަމަށް ފެންނާތީ ރޮނާލްޑޯ ވަނީ އޭނާގެ އޭޖެންޓް ޖޯޖް މެންޑޭޒް މެެދުވެރިކޮށް، އެ ޓީމުގެ ސީނިއާ މެނޭޖްމަންޓަށް ކްލަބް ދޫކޮށްލަން ބޭނުންވާކަން އަންގައިފަ އެވެ.
މިދިޔަ ސީޒަން ފެއްޓުމުގެ ކުރިން ޔުނައިޓެޑަށް ދެ އަހަރުގެ ކޮންޓްރެކްޓެއްގައި ސޮއިކުރި ރޮނާލްޑޯގެ ކްލަބް ދޫކޮށްލަން ކުރި މަސައްކަތް ކާމިޔާބުނުވެ ކަންކަން ދިގުލައިދާތީވެ، އޭނާ އެންމެ ފަހުން ޔުނައިޓެޑްގެ ޕްރީ ސީޒަނުގައި ބައިވެރިވީ އެ ކްލަބްގެ އޭޝިއާ އާއި އޮސްޓްރޭލިއާ ޓުއާ ނިމުނު ފަހުންނެވެ.
އެހެންވެ، ޔުނައިޓެޑްގެ ކޯޗު އެރިކް ޓެން ހާގް ރޮނާލްޑޯ އަށް ޕްރިމިއާ ލީގުގެ އާ ސީޒަނުގެ ފުރަތަމަ މެޗުގައި ބްރައިޓަންއާ ދެކޮޅަށް ފުރަތަމަ އެގާރައިން ރޮނާލްޑޯ އަށް ފުރުސަތެއް ނުދެ އެވެ. އެކަމަކު، އެންމެ ފަހުން ބްރެންޓްފޯޑް އަތުން 4-0 އިން ޔުނައިޓެޑް ބަލިވި މެޗުގައި ރޮނާލްޑޯ ފުރަތަމަ އެގާރަައިގައި ކުޅުނެވެ. އިނގިރޭސި މީޑިއާ އިން އަދިވެސް އަންނަނީ ރޮނާލްޑޯ ބޭނުންވަނީ ޔުނައިޓެޑް ދޫކޮށްލަން ކަަމަށް ބުނެ، ރިޕޯޓް ކުރަމުންނެވެ.
ރޮނާލްޑޯ، 37، ގެންދަން އެތުލެޓިކޯ މެޑްރިޑުން އުޅޭ ކަމަށް ދެކެވޭ ވާހަކަތަކަށް ރައްދުދެމުން ރޮނާލްޑޯ ވަނީ އިިންސްޓަގްރާމްގައި އަނެއްކާ ވެސް މީޑިއާ އަށް ފާޑުކިޔައިފަ އެވެ.
ރޮނާލްޑޯ ބުނީ މީޑިއާގައި ގިނައިން ރިޕޯޓްކޮށްފައި ހުރީ ދޮގު ވާހަކަތަކެއް ކަމަށާއި ވަރަށް އަވަހަށް އޭގެ ހަގީގަތް ވެސް ހާމަވެގެންދާނެ ކަމަށެވެ.
"ފާއިތުވި މަސްތަކުގައި މީޑިއާތަކުން އަހަންނާ ބެހޭގޮތުން ރިޕޯޓްކުރި 100 ވަރަކަށް ހަބަރު އަހަރެންގެ ނޯޓު ފޮތެއްގައި ހުންނާނެ. އޭގެއިން އެންމެ ފަސް ހަބަރު ތެދަކަށް ވާނީ. ދެން ވިސްނާލާ ބާކީ ހުންނާނެ ގޮތް. ވަރަށް އަވަހަށް ހަގީގަތް އެނގޭނެ،" ރޮނާލްޑޯ ބުންޏެވެ.
ޔޫރަޕްގެ މަޝްހޫރު ގިނަ ކްލަބްތަކުން މި ފަހަރު ރޮނާލްޑޯ ގަންނަން ބޭނުންނުވާ ކަމަށް ވަނީ މީޑިއާގައި ބުނެފަ އެވެ.
ޔުނައިޓެޑުން ދެން އެންމެ އަވަހަށް ކުޅޭ މެޗުގައި އަންނަ ހޯމަ ދުވަހުގެރޭ އަމިއްލަ ދަނޑުގައި ކުޅޭނީ ލިވަޕޫލާ ދެކޮޅަށެވެ. އެ މެޗާ ދިމާކޮށް ޔުނައިޓެޑްގެ ވެރިންނާ ދެކޮޅަށް ހަރަކާތްތަކެއް ހިންގަން ޔުނައިޓެޑްގެ ސަޕޯޓަރުންގެ ގްރޫޕްތަކުން އަންނަނީ ރާވަމުންނެވެ.
މިދިޔަ ސީޒަނުގައި އެވަޓަން ދަނޑުގައި ޔުނައިޓެޑް 1-0 އިން ބަލިވި މެޗު ނިންމާފައި ރޮނާލްޑޯ ޗޭންޖިން ރޫމަށް ދާން ޓަނަލް އަށް އައި ވަގުތު އެ ތަނުގައި ވީޑިއޯ ކުރަން ހުރި އެވަޓަން ސަޕޯޓަރެއްގެ ފޯނު ބިންމައްޗަަށް ވައްޓާލައި ރޮނާލްޑޯ ވަނީ އެ ފޯނު ހަލާކުކޮށްލައިފަ އެވެ. އެ މައްސަލަ މާސީސައިޑް ފުލުހުން ބެލިއިރު، ރޮނާލްޑޯއާ ވަނީ ސުވާލުކޮށްފަ އެވެ. އެކަމަކު، މައްސަލަ ކުރިއަށް ނުގެންދަން ނިންމާފައިވަނީ ރޮނާލްޑޯ އެ އާއިލާއާ ވާހަކަ ދައްކައި، މައާފަށް އެދިފައިވާތީ އެވެ.
