ހަނދަށް ދަަތުރު ކުރަން ހާއްސަ ނާސާގެ އާ ރޮކެޓް ފުރަތަމަ ދަތުރަށް ތައްޔާރު ވާން ފަށައިފި އެވެ.
ސްޕޭސް ލޯންޗް ސިސްޓަމް (އެސްއެލްއެސް) ގެ ނަން ދީފައިވާ އެ ރޮކެޓް ފްލޮރިޑާގެ ކެނެޑީ ސްޕޭސް ސެންޓަރުގެ ޕެޑް 39ބީއަށް ގެންދިޔުމުގެ މަސައްކަތް ދަނީ ކުރަމުންނެވެ.
ނާސާއިން ރާވާފައި ވަނީ ފުރަތަމަ ދަތުރު އޯގަސްޓް 29 ގައި ލޯންޗް ކުރުމަށެވެ. އެ ދަތުރުގައި އެއްވެސް އެސްޓްރޮނޯޓަކުން ބައިވެރި ނުވާ އިރު، އެއީ ޓެސްޓު ދަތުރެކެވެ.
އެހެން ނަމަވެސް މުސްތަގްބަލުގައި ކުރާ ދަތުރުތަކުގައި ހަނދަށް އެސްޓްރޮނޯޓުން ގެންދާނެ އެވެ.
އެޕޯލޯ 17 މިޝަންގައި އެންމެ ފަހުން އިންސާނުން ހަނދަަށް ކުރި ދަތުރަށް 50 އަހަރު ފުރޭނީ އަންނަ ޑިސެމްބަރު މަހުގަ އެވެ.
ނާސާއިން ފަށާފައިވާ އާ ޕްރޮގްރާމް އާޓެމިސްގެ ދަށުން އަނެއްކާ ވެސް އިންސާނުން ހަނދަށް ގެންދާނެ ކަމަށް ވަނީ އިއުލާންކޮށްފަ އެވެ.
ހަނދަށް ކުރާ ދަތުރަކީ 2030 ވަނަ އަހަރު މާސްއަަށް އެސްޓްރޮނޯޓުން ދިޔުމަށް ތައްޔާރުވުމުގެ ގޮތުން މުހިއްމު ކަމެއްގެ ގޮތުގައި ނާސާއިން ދެކެ އެވެ.
