ފޮރިން މިނިސްޓަރު އަބްދުﷲ ޝާހިދުގެ ތާއީދު ވެސް އޮތީ ރިޔާސީ ނިޒާމަށްކަން ހާމަކުރައްވައި، ދެންމެއަކު ޓްވީޓެއް ކުރައްވައިފި އެވެ.
ޝާހިދު މިހެން ވިދާޅުވެ ޓްވީޓެއް ކުރެއްވީ، ބަރުލަމާނީ ނިޒާމަކަށް ރާއްޖޭގެ ވެރިކަން ކުރުމުގެ ނިޒާމު ބަދަލު ކުރުމަށް އަންނަ ހުކުރު ދުވަހު ފަށާ އެމްޑީޕީގެ ކޮންގްރެސްއަށް ގަރާރެއް ހުށަހަޅާފައިވަނިކޮށެވެ.
ޝާހިދު ކުރެއްވި ޓްވީޓުގައި ފާހަގަ ކުރައްވާފައިވަނީ ރިޔާސީ ނިޒާމުގެ މައިގަނޑު ސިފަތަކެވެ. އަދި، އޭނާ ތާއީދު ކުރައްވަނީ އެ ސިފަތައް އޮންނަ ނިޒާމަކަށް ކަމަށް ލިޔުއްވާފައިވެ އެވެ.
"އަޅުގަނޑު ތާއީދު ކުރަނީ ރައްޔިތުންގެ ސީދާ ވޯޓަކުން ދައުލަތާއި ސަރުކާރުގެ ވެރިޔާ ހޮވުމަށް. ގާނޫނު ހެދުމުގެ ބާރާއި ސަރުކާރު ޒިންމާދާރު ކުރުވުން ރައްޔިތުންގެ މަޖިލީހުގައި އޮތުމަށް. އަދުލު އިންސާފު ގާއިމް ކުރުން ފަނޑިޔާރު ގޭގައި އޮތުމަށް. ގާނޫނަށް ބޯލެނބުމުގެ ސިފަ ވެރިންގެ ކިބައިގައި ހުރުމަށް،" ޝާހިދު މިއަދު ކުރެއްވި ޓްވީޓްގައި ލިޔުއްވާފައިވެ އެވެ.
ބަރުލަމާނީ ނިޒާމު ގެނައުމުގެ ގަރާރު އެމްޑީޕީގެ ކޮންގްރެސްއަށް ހުށަހަޅުއްވަނީ އެ ޕާޓީގެ ރައީސް އަދި ރައްޔިތުންގެ މަޖިލީހުގެ ރައީސް މުހައްމަދު ނަޝީދެވެ.
މީގެ ކުރިން ވެސް ރައްޔިތުންގެ މެދުގައި ނިޒާމު ކަނޑައެޅުމަށް ބޭއްވި ފެންނަ ނުފެންނަ ވޯޓުގައި ނަޝީދާއި އެމްޑީޕީން ތާއީދު ކުރީ ބަރުލަމާނީ ނިޒާމަށެވެ. އޭރު ކުރީގެ ރައީސް އަބްދުﷲ ޔާމީނާއި އެމަނިކުފާނުގެ ޕީއޭ އިން ވެސް ތާއީދު ކުރީ ބަރުލަމާނީ ނިޒާމަކަށެވެ.
ނަމަވެސް, މިހާރު އެމްޑީޕީގެ ތެރޭގައި ރިޔާސީ ނިޒާމާއެކު ކުރިއަށް ދާން ބޭނުންވާ މީހުން ވެސް ގިނަ އެވެ. އެމްޑީޕީގެ އިސް ލީޑަރު އަދި ރައީސް އިބްރާހީމް މުހައްމަދު ސޯލިހް ވެސް ވަނީ ނަޝީދުގެ ގަރާރު އަނބުރާ ގެންދެވުމަށް އެދިވަޑައިގެންފަ އެވެ.
ނަޝީދު ފިޔަވައި އިތުރު ސިޔާސީ ލީޑަރަކު މި ވަގުތަށް ބަރުލަމާނީ ނިޒާމު ގެންނަން ތާއީދެއް ނުކުރައްވަ އެވެ. ކުރިން ބަރުލަމާނީ ނިޒާމަށް ތާއީދު ކުރެއްވި ޔާމީން ވެސް ވިދާޅުވަނީ މި ވަގުތަށް އެ ނިޒާމު ރާއްޖެއަށް "ފިޓު" ނޫން ކަމަށެވެ.
ނަޝީދު ކަމަރު ބަންނަވައިގެން ހުންނެވީ އަވަސްމަގުން ބަރުލަމާނީއަށް ދާން
އެމްޑީޕީގެ އޮފީހުގައި އިއްޔެ ބޭއްވެވި މީޑިއާ ބްރީފިންއެއްގައި ނަޝީދު ވިދާޅުވީ ނިޒާމު ބަދަލުކުރުމުގެ ފެންނަ ނުފެންނަ ވޯޓް މި އަހަރު ނަގަން އެމަނިކުފާނު ހުށަހަޅުއްވާނެ ކަމަށެވެ. ނިޒާމު ބަދަލުކުރުމަށްޓަކައި ގާނޫނުއަސާސީއަށް ގެންނަން ޖެހޭ ބަދަލު މިހާރުން މިހާރަށް ގެންނަން ހުށަހަޅުއްވާނެ ކަމަށް ވެސް އެމަނިކުފާނު ވިދާޅުވި އެވެ.
"އަޅުގަނޑު މި އުއްމީދުކުރާ އަދި އަދި އަޅުގަނޑު ހުށަހަޅާ ގޮތްތަކުގެ ތެރޭގައި މިހާރު ގާނޫނުއަސާސީއަށް ބަދަލު ގެނެވި، މިއަހަރު ތެރޭގައި ފެންނަ ނުފެންނަ ވޯޓް ނެގި ފެބްރުއަރީން ފެށިގެން އިންތިގާލީ ބަރުލަމާނީ ނިޒާމު ހިނގަމުން ގޮސް 2023 ވަނަ އަހަރުގެ ނޮވެމްބަރު މަހު ބާއްވާ ރިޔާސީ އިންތިހާބު އެއީ ބަރުލަމާނީ ނިޒާމު [ހިންގަން] ގާނޫނުއަސާސީ އިސްލާހުކުރެވިފައިވާ ގޮތަށް ބޭއްވޭ ރިޔާސީ އިންތިހާބަކަށް [ވުން]،" ނަޝީދު ވިދާޅުވި އެވެ.
ނަޝީދު ވިދާޅުވި ގޮތުގައި އެމަނިކުފާނުގެ އުއްމީދަކީ 2024 ވަނަ އަހަރު ބާއްވާ ރައްޔިތުންގެ މަޖިލީހުގެ އިންތިހާބަށް ފަހު ރާއްޖޭގެ ވެރިކަމުގެ ނިޒާމު ބަރުލަނާނީ ނިޒާމަކަށް ބަދަލުކޮށް ނިންމުމެވެ.
ނިޒާމު ބަދަލުކުރުން އަވަސްކުރައްވަން އެމަނިކުފާނު މަސައްކަތް ކުރައްވާ މިންވަރު ދައްކުވައި ދެނީ އަންނަ ފެބްރުއަރީ މަހުން ފެށިގެން އިންތިގާލީ ގޮތެއްގައި ނަމަވެސް އެ ނިޒާމަށް ބަދަލުކުރައްވަން އެދިވަޑައިގަންނަވާތީ އެވެ.
ބަރުލަމާނީ ނިޒާމަށް ބަދަލުކުރަން އެންމެންގެ ތާއީދަށް ވެސް އެދިވަޑައިގަންނަވާ ކަމަށާއި އެކަމުގައި ނާކާމިބުވެވަޑައިގެންފާނެ ކަމަށް ދެކެވަޑައިނުގަންނަވާ ކަމަށް ވެސް ނަޝީދު މިއަދު ވިދާޅުވި އެވެ. އެއްވެސް ކަމަކާ ކުރިމަތިލައްވާ އިރު އެކަމެއް ނާކާމިޔާބުވެދާނެ ކަމަށް ދެކެވަޑައިގެން ކުރިމަތިނުލައްވާ ކަމަށް ވެސް ވަރަށް ޔަގީންކަމާ އެކު ނަޝީދު ވިދާޅުވި އެވެ.
"އިރާދަކުރެއްވިއްޔާ މިކަން ވެސް އަޅުގަނޑުމެނަށް ކާމިޔާބުވާނެ. އަޅުގަނޑު އެމްޑީޕީ ކޮންގްރެސްގެ ހުރިހާ ބޭފުޅުންނަށް ވަަރަށް އެދެން މިކަމާ ގުޅޭ ގޮތުން ފުންކޮށް ވިސްނަވާފައި އެ ބޭފުޅުންގެ ވޯޓު މިކަމަށް ދެއްވުމަށް،" އެމަނިކުފާނު ވިދާޅުވި އެވެ.
