ބާސެލޯނާ (އޮގަސްޓް 14) - މި ސީޒަނަށް ގިނަ ކުޅުންތެރިންތަކެއް ހޯދައި، ސްކޮޑް ވަރުގަދަކުރި ބާސެލޯނާ ސްޕެއިން ލީގުގައި ކުޅުނު ފުރަތަމަ މެޗުގައި ރޭ ރަޔޯ ވަޔޮކާނޯއާ ލަނޑެއް ނުޖެހި 0-0 އިން އަމިއްލަ ދަނޑުގައި އެއްވަރުވެއްޖެ އެވެ.
ރަޖިސްޓްރޭޝަންގެ މައްސަލަތައް ހައްލުކޮށް، ބާސެލޯނާއާ އަލަށް ގުޅުނު ފަސް ކުޅުންތެރިންގެ ތެރެއިން ހަތަރު ކުޅުންތެރިންނާއި ކޮންޓުރެކްޓް އާކުރި ކުޅުންތެރިންނަށް ރޭގެ މެޗުގައި ކުޅެވޭ ގޮތްވި އެވެ. ރަޖިސްޓްރޭޝަން ފުރިހަމަނުކުރެވި، ރޭގެ މެޗުގައި ނުކުޅެވުނީ ސެވިއްޔާ އިން ގުޅުނު ފްރާންސްގެ ޑިފެންޑަރު ޖޫލްސް ކޫންޑޭ އަށެވެ. ކޫންޑޭ ހުރީ އަނިޔާގައި ކަމަށްވާތީ އޭނާގެ ރަޖިސްޓްރޭޝަން ނިންމަން ބާސެލޯނާ އަށް އަދި ވަގުތު އެބައޮތެވެ.
ރޭގެ މެޗުގައި ބާސެލޯނާގެ ކޯޗު ޒަވީ ހެނާންޑޭޒް ވަނީ އަލަށް ގުޅުނު ކުޅުންތެރިންގެ ތެރެއިން ފޯވަޑް ރޮބަޓް ލެވަންޑޯސްކީ އާއި އަންދްރެސް ކްރިސްޓަންސަން އަދި ރަފީނިއާ އަށް ފުރަތަމަ 11 އިން ފުރުސަތު ދީފަ އެވެ.
ލީގުގައި ކުޅުނު ފުރަތަމަ މެޗުގައި އަމިއްލަ ސަޕޯޓަރުން ކުރިމަތީގައި މޮޅެއް ނުލިބުމުން، ބާސާގެ ކޯޗު ޒަވީ އެދުނީ ސަޕޯޓަރުން ކެތްތެރިވުމަށެވެ.
"ރަޔޯ އިން ވަރަށް ރަނގަޅަށް ޑިފެންސްކުރި. އެހެންވެ، އަހަރެމެންނަށް ޗާންސްތައް އުފެއްދުމަށް އުނދަގޫވި،" ޒަވީ ބުންޏެވެ. "ވަރަށް ދެރަކޮށް މި ދިމާވީ. އަހަރަމެން ސަޕޯޓަރުންނަށް ދައްކާލަން ބޭނުންވީ ކްލަބު އޮތީ ރަނގަޅު މިސްރާބުގައިކަން. މިއީ ވަރަށް ދެރަ ނަތީޖާއެއް. އެކަމަކު ކެތްތެރިވާން އެބަޖެހޭ."
މެޗުގެ ފުރަތަމަ ހާފުގައި ބާސެލޯނާގެ ޕެޑްރީ ފޮނުވާލި ހަމަލާއެއް ދިޔައީ ދަނޑި ކައިރިން ބޭރަށެވެ. ބާސެލޯނާ އިން މެޗު ކޮންޓުރޯލްކޮށްގެން ކުޅުނު ނަމަވެސް، ފުރަތަމަ ހާފުގެ އިތުރު ވަގުތުގައި ރަޔޯގެ އަލްވާރޯ ގާސިއާ ފޮނުވާލި ނުރައްކާތެރި ހަމަލާއެއް ބާސާގެ ގޯލްކީޕަރު މާކް ޓެ ސްޓޭގަން ވަނީ ދިފާއުކޮށްފަ އެވެ.
ދެވަނަ ހާފުގައި ވެސް ބާސެލޯނާ އިން ރަޔޯގެ ޑިފެންސަށް ބާރު ބޮޑުކުރިޔަސް، އެ ޓީމަށް ރަޔޯގެ ޑިފެންސް ފޫއަޅުވާލެވޭ ގޮތެއްނުވި އެވެ.
