އެފްއޭ ކަޕް ކުއާޓާ ފައިނަލްގައި މިއަދު ޕެނަލްޓީ ޖަހައިގެން 4-3 އިން ބަލިކޮށް، ކްލަބް ގްރީން ސްޓްރީޓްސް މުބާރާތުގެ ސެމީ ފައިނަލުން ޖާގަ ހޯދައިފި އެވެ.
މެޗުގެ ފުރިހަމަ ވަގުތު ހަމަވިއިރު، ދެ ޓީމު އޮތީ 1-1 އިން އެއްވަރުވެފަ އެެވެ. އިތުރު ވަގުތުގެ ދެ ހާފުގައި ވެސް ނަތީޖާ އަށް ބަދަލެއް ނާދެ އެވެ.
ޕެނަލްޓީ ޝޫޓްއައުޓްގައި، ގްރީން ސްޓްރީޓްސްގެ "ހީރޯ" އަކަށްވީ އެ ޓީމުގެ ޕާކިސްތާން ގޯލްކީޕަރު ސާގިބް ހަނީފެވެ. އޭނާ ވަނީ ޕެނަލްޓީ ޝޫޓްއައުޓްގައި ދެ ޕެނަލްޓީ މަތަކޮށްފަ އެވެ. އެއީ ޓީސީގެ މުހައްމަދު ސާދު ނިޒާރާއި މުހައްމަދު އަޖުފާން ޖެހި ދެ ޕެނަލްޓީ އެވެ. ޓީސީން ޕެނަލްޓީ ކާމިޔާބުކުރީ މުހައްމަދު މުސްލިހު (މުއްޓި) އާއި އަހުނަފް މުހައްމަދު ތަސްނީމް އަދި ހަސަން އީނާޒެވެ.
ގްރީން ސްޓްރީޓްސްގެ ޕެނަލްޓީތަކުގެ ތެރެއިން، ނާކާމިޔާބުވީ އަންސަރު އިބްރާހިމް (އަންކޮ) ޖެހި ޕެނަލްޓީ އެވެ. އަންކޮ ޖެހި ޕެނަލްޓީ ޓީސީގެ ސްރީ ލަންކާ ގޯލްކީޕަރު ސުޖަން ޕެރޭރާ ވަނީ ދިފާއުކޮށްފަ އެވެ. އަންކޮ އާއި ސުޖަން ވަނީ އެއްކޮށް އީގަލްސް އަށް ކުޅެފަ އެވެ. ގްރީން ސްޓްރީޓްސްގެ އުޒްބެކިސްތާން ޑިފެންޑަރު ޝުކްރާލީ އެގަމެރްދީ އާއި ހަސަން ނަޒީމް (ޗޯޓު) އަދި ފަރުހާދް އިސްމާއިލް (ފަރޭ) ޕެނަލްޓީތައް ކާމިޔާބުކުރިއިރު، ފަސް ވަނަ ޕެނަލްޓީ ކާމިޔާބުކޮށް އެ ޓީމު ސެމީ އަށް ގެންގޮސްދިނީ ކެޕްޓަން ރިލްވާން ވަހީދު (ރިލޭ) އެެވެ.
ސެމީ ފައިނަލްގައި ގްރީން ސްޓްރީޓްސްއާ ދެކޮޅަށް ނުކުންނާނީ 2012 އަދި 2014 ވަނަ އަހަރު އެފްއޭ ކަޕްގެ ޗެމްޕިއަންކަން ހޯދި މާޒިޔާ ސްޕޯޓްސް އެންޑް ރެކްރިއޭޝަނެވެ. ގްރީން ސްޓްރީޓްސް އިން މިއަދު ބަލިކުރި ޓީސީ އަކީ އެންމެ ފަހުން މި މުބާރާތް ފުރިހަަމަ ކުރި ދެ ފަހަރުގެ ވެސް ރަނަރަޕް އެވެ. މި ނަތީޖާއާ އެކު، ޓީސީ އަށް ވަނީ މި ސީޒަން ނިމިފަ އެވެ.
ގްރީން ސްޓްރީޓްސް އާއި ޓީސީ މިއަދު ކުޅުނު މެޗުގެ ތެރެއިން.-- ފޮޓޯ: އިމޭޖަސް،އެމްވީ
ގަލޮޅު ދަނޑުގައި ކުޅުނު މިއަދުގެ މެޗުގެ 24 ވަނަ މިނިޓުގައި ޓީސީން ލީޑު ނެގީ އެ ޓީމުގެ މިސްރު ފޯވަޑް އޮމަރު ހުސެއިން ސަލާހް ޖެހި ލަނޑުންނެވެ. ހިލޭޖެެހުމަކުން ޓީސީގެ ކުޅުންތެރިއެއް އޭރިޔާ ތެރެއަށް ހުރަސްކޮށްލި ބޯޅަ، ސަލާހް ގޯލަށް އަމާޒުކޮށްލީ ބޮލުންނެވެ.
އެހެން ނަމަވެސް، މެޗުގެ 38 ވަނަ މިނިޓުގައި ގްރީން ސްޓްރީޓްސް އިން ވަނީ މެޗުގެ ނަތީޖާ ހަމަހަމަކޮށްފަ އެވެ. ކޯނަރަކުން ޓީސީގެ ޕެނަލްޓީ އޭރިޔާ ތެރެއަށް ހުރަސްކޮށްލި ބޯޅަ ބޮލުން ގޯލަށް އަމާޒުކޮށް، ގްރީން ސްޓްރީޓްސް އަށް ލަނޑު ޖަހައިދިނީ ޑިފެންޑަރު ޝުކުރާލީ އެވެ.
މެޗުގެ ފުރަތަމަ ހާފުގައި ސަލާހްގެ ހަމަލާއެއް ގްރީން ސްޓްރީޓްސްގެ ގޯލްކީޕަރު ސާގިބް ދިފާއުކުރިއިރު، ގްރީން ސްޓްރީޓްސް އަލީ ޝާމިއު (މައިތޯ) ގެ ފޮނުވާލި ޝޮޓެއް ޓީސީގެ ކީޕަރު ސުޖަން ވެސް ވަނީ ދިފާއުކޮށްފަ އެވެ.
މެޗުގެ އިތުރު ވަގުތުގައި ޓީސީގެ ސަލާހް ވަނީ ނުރައްކާތެރި ހަމަލާއެއް ފޮނުވާލައިފަ އެވެ. އޭރިޔާ ތެރެއިން އޭނާ ބޮލުން ފޮނުވާލި ބޯޅަ އަމާޒުވީ ގޯލުގެ ހުރަސް ދަނޑިއަށެވެ. ގްރީން ސްޓްރީޓްސްގެ އަންކޮ އަށް ވެސް ލަނޑު ޖަހާނެ ފުރުސަތެއް ލިބުނެވެ. އެކަމަކު އޭރިޔާ ތެރެއިން އޭނާ ފޮނުވާލި ހަމަލާ ސުޖަން ވަނީ ދިފާއުކޮށްފަ އެވެ.
އެފްއޭ ކަޕް ކުއާޓާ ފައިނަލުގައި މިރޭ ކުޅޭނީ 2016 ވަނަ އަހަރުގެ ޗެމްޕިއަން، ވެލެންސިއާ އާއި ދަ ގްރާންޑޭ ސްޕޯޓްސް ކްލަބް އެވެ.
