ބާސެލޯނާ (އޮގަސްޓް 13) - ބާސެލޯނާ އިން އަލަށް ގުޅުނު ކުޅުންތެރިންގެ ތެރެއިން ފްރާންސްގެ ޑިފެންޑަރު ޖޫލްސް ކޫންޑޭ ފިޔަވައި، ދެން ތިބި ހުރިހާ ކުޅުންތެރިން ވެސް އެ ކްލަބަށް ސްކޮޑުގައި ރަޖިސްޓްރީ ކުރެވިއްޖެ އެވެ.
މާލީ މައްސަލަތަކެއް ކުރިމަތިވެފައި އޮތް ނަމަވެސް، ޓްރާންސްފާ ބާޒާރުގައި އެންމެ ހަރަކާތްތެރިކޮށް ފެނުނު އެއް ކްލަބަކީ ބާސެލޯނާ އެވެ. އެ ކްލަބުން ވަނީ ސްކޮޑް ވަރުގަދަ ކުރުމަށް ބަޔާން މިއުނިކަށް ކުޅެމުންދިޔަ ތަޖުރިބާކާރު ފޯވަޑް ރޮބަޓް ލެވަންޑޯސްކީ އާއި ލީޑްސްގެ ޔުނައިޓަޑް ކުޅެމުންދިޔަ ބްރެޒިލްގެ ވިންގް، ރަފީނިއާ އަދި ސެވިއްޔާގެ ޑިފެންޑަރު ކޫންޑޭގެ ޓްރާންސްފާ ނިންމައިފަ އެވެ.
މީގެ އިތުރުން، ހިލޭ ޓްރާންސްފާތަކުގައި އޭސީ މިލާނަށް ކުޅެމުންދިޔަ އައިވަރީ ކޯސްޓްގެ މިޑްފީލްޑަރު ފްރޭންކް ކެސިއޭ އަދި ޗެލްސީގެ ޑެންމާކް ޑިފެންޑަރު އަންދްރެސް ކްރިސްޓެންސަން ވަނީ ބާސެލޯނާއާ ގުޅިފަ އެވެ.
މި ކުޅުންތެރިން ބާސެލޯނާއާ ގުޅުނު ނަމަވެސް، ލަ ލީގާގެ ފައިނޭންޝަން ގަވައިދުތަކަށް ބާސެލޯނާ މާލީ ހިސާބުތައް ނުފެތޭތީ، އެ ކްލަބާ އަލާށް ގުޅުނު ކުޅުންތެރިންނާއި، ކޮންޓުރެކްޓް އާކުރި ކުޅުންތެރިން ރަޖިސްޓްރީކުރުމަށް ދަތިތަކެއް ކުރިމަތިވި އެވެ.
ބާސެލޯނާ އިން ގަތް ލެވަންޑޯސްކީ: އޭނާގެ ސޮއި ހޯދީ ގިނަ ފަހަރުތަކެއްގެ މަތިން ކުރި ބިޑްތައް ބަޔާން މިއުނިކުން އަނބުރާ ފޮނުވާލި ނަމަވެސް، އެންމެ ފަހުން ކުރި ބިޑް ކާމިޔާބުކޮށްގެން.--- ފޮޓޯ: އޭއެފްޕީ
އެކަމަކު، މި ސީޒަންގެ ސްޕެނިޝް ލީގުގައި ބާސެލޯނާ ކުޅޭ ފުރަތަމަ މެޗުގައި މިރޭ ރަޔޯ ވަޔޮކާނޯއާ ދެކޮޅަށް ނުކުތުމުގެ ކުރިން، ބާސާ އިން ވަނީ މައްސަލަ އަށް ހައްލު ހޯދައި، ގިނަ ކުޅުންތެރިންގެ ރަޖިސްޓްރޭޝަން ފުރިހަމަކޮށްފަ އެވެ.
ބާސެލޯނާ އިން ކުޅުންތެރިން ރަޖިސްޓްރީކުރީ އެ ކްލަބުގެ ޕްރޮޑަކްޝަން ސްޓޫޑިއޯ ކަމަށްވާ "ބާސާ ސްޓޫޑިއޯސް"ގެ ހިއްސާތަކެއް، 100 މިލިއަން ޔޫރޯ (100 މިލިއަން ޑޮލަރު)ގެ އަގަކަށް އޯޕަސް މީޑިއާ އަށް ވިއްކާލައިގެނެވެ.
ބާސެލޯނާގެ ޕްރޮޑަކްޝަން ކުންފުންޏާއި ޓީވީ ރައިޓްސްގެ ވިއްކާލައިގެން، ފާއިތުވި ދެ ތިން ހަފުތާގެ ތެރޭގައި އެ ކްލަބުން ވަނީ އާމްދަނީގެ ގޮތުގައި 600 މިލިއަން ޔޫރޯ ހޯދައިފަ އެވެ. އެކަމަކު، މި އަދަދާ އެކު ވެސް، ހުރިހާ ކުޅުންތެރިން އެ ކްލަބަށް ރަޖިސްޓްރީއެއް ނުކުރެވުނެވެ.
ބާސެލޯނާ އަށް ރަޖިސްޓްރީ ކުރެވުނީ ލެވަންޑޯސްކީ އާއި ރަފީނިއާ އާއި ކެސިއޭ އަދި ކްރިސްޓެންސަން އެވެ. އަދި ކޮންޓުރެކްޓް އާކުރި ސާޖި ރޮބޭޓޯ އާއި އޮސްމާނޭ ޑެމްބޭލޭ ވެސް ވަނީ ރަޖިސްޓްރީ ކުރެވިފަ އެވެ.
މީޑިއާ ރިޕޯޓްތަކުން ބުނާގޮތުގައި ބާސެލޯނާ އަށް ކޫންޑޭ ރަޖިސްޓްރީ ކުރެވޭނީ އެ ކްލަބުން ކުޅުންތެރިންގެ މުސާރަ އަށް ހޭދަކުރާ ބަޖެޓު ކުޑަކޮށްގެނެވެ. އެހެންކަމުން، ޓްރާންސްފާގައި ބާކީ މި އޮތް ދުވަސްކޮޅުގައި، ބާސެލޯނާ އިން ކުޅުންތެރިންތަކެއް ދޫކޮށްލަންޖެހޭނެ ކަމަށް ރިޕޯޓްތަކުން ބުނެ އެވެ.
ބާސެލޯނާ އިން މި ޓްރާންސްފާ ބާޒާރުގައި ޓްރާންސްފާ ފީތަކަށް 150 މިލިއަން ޔޫރޯ (165 މިިލިއަން ޑޮލަރު) ހޭދަކޮށްފަ އެވެ.
މުސާރައިގެ ބަޖެޓް ކުޑަކުރުމަށް ބައެއް ކުޅުންތެރިން ދޫކޮށްލުމުގެ އިތުރުން، މިހާރު ތިބި ސީނިއާ ބައެއް ކުޅުންތެރިން މުސާރަ ކުޑަކުރުމަށް ވެސް ބާސެލޯނާ އިން ދަނީ މަސައްކަތް ކުރަމުންނެވެ.
