ބައިނަލްއަގްވާމީ ޒުވާނުންގެ ދުވަސް ފާހަގަ ކުރުމަށް ހދ. ކުޅުދުއްފުށީގައި ބާއްވާ ހަރަކާތްތަކުގައި ބައިވެރިވެވަޑައިގަތުމަށް ނައިބު ރައީސް ފައިސަލް ނަސީމް މިއަދު އެ ރަށަށް ވަޑައިގެންފި އެވެ.
ބައިނަލްއަގްވާމީ ޒުވާނުންގެ ދުވަހަކީ އޯގަސްޓް 12، އެވެ. އެ ދުވަހުގެ މުނާސަބަތުގައި މިއަދު ކުޅުދުއްފުށީގައި ބާއްވާ ޖަލްސާ ޝަރަފުވެރިކޮށްދެއްވާނީ ނައިބު ރައީސް ފައިސަލް އެވެ.
އޭގެ އިތުރުން އެ ރަށުގައި މައުރަޒެއް ހުޅުވައިދެއްވައި، ހޮސްޕިޓަލަށް ޒިޔާރަތް ކުރައްވައި، ކައުންސިލްގެ މެމްބަރުންނާ ވެސް ނައިބު ރައީސް ބައްދަލު ކުރެއްވުމަށް ވަނީ ހަމަޖެހިފަ އެވެ.
މިއަހަރުގެ ޒުވާނުންގެ ދުވަސް ކުޅުދުއްފުށީގައި ބާއްވަނީ އދ. އާ ގުޅިގެންނެވެ. ނައިބު ރައީސް ފައިސަލް ކުޅުދުއްފުއްޓަށް ވަޑައިގަތުމަށް ދައުވަތު އެރުވީ އދ. އިން ރާއްޖެއަށް ކަނޑައަޅާފައި ހުންނަވާ ރެޒިޑެންޓް ކޯޑިނޭޓަރު ކެތެރިން ހެޒްވެލް އެވެ.
ޒުވާނުންގެ ދުވަސް ފާހަގަ ކުރުމަށް ޖަލްސާ ބޭއްވުމަށް މައުރަޒެއް އިފްތިތާހު ކުރުމުގެ އިތުރުން ޒުވާނުންގެ ހޮޅުހަށީގެ ނަމުގައި ހަރަކާތެއް ބާއްވައި ގަސް އިންދުމުގެ ޕްރޮގްރާމެއް ވެސް ކުރިއަށް ގެންދިއުމަށް ވަނީ ހަމަޖެހިފަ އެވެ.
ނައިބު ރައީސް ފައިސަލްގެ ދަތުރުފުޅުގައި ކުޅުދުއްފުއްޓަށް ވަޑައިގެންނެވުމަށްފަހު ހަމަ އެ އަތޮޅު ނޮޅިވަރަމަށް ވެސް ވަޑައިގަންނަވާނެ އެވެ. އެ ރަށުގެ ކައުންސިލާ ބައްދަލު ކުރެއްވުމުގެ އިތުރުން ސްކޫލާއި ސިއްހީ މަރުކަޒަށް ޒިޔާރަތް ކުރައްވާނެ އެވެ.
