ރާއްޖޭގެ ވެރިކަން ހިންގާ ނިޒާމް, ބަރުލަމާނީ ނިޒާމަކަށް ބަދަލު ކުރުމަށް ގާނޫނުއަސާސީ އިސްލާހު ކުރުމަށާއި ރައްޔިތުންގެ މަޖިލީހުގެ ރައީސް މުހައްމަދު ނަޝީދާއެކު ސިޔާސީ މަސައްކަތް ކުރުމަށް ތާއިދު ނުކުރައްވާނެކަން ކުރީގެ ރައީސް އަދި އިދިކޮޅު ލީޑަރު, އަބްދުالله ޔާމީން ހާމަކުރައްވައިފި އެވެ.
ރާއްޖޭގެ ވެރިކަން ހިންގާ ނިޒާމް, ބަރުލަމާނީ ނިޒާމަކަށް ބަދަލުކޮށް ބޮޑުވަޒީރު ކަމުގެ މަގާމަށް ވަޑައިގެންނެވުމަށް ނަޝީދު ގެންދަވަނީ މަސައްކަތް ކުރައްވަމުންނެވެ. އެގޮތުގެ މަތިން މި މަހު ބާއްވާ އެމްޑީޕީގެ ކޮންގްރެސްއަށް ނަޝީދު ވަނީ އެކަމާ ގުޅޭ ގަރާރެއް ހުށަހަޅުއްވާފަ އެވެ. އެގޮތުން, ނިޒާމް ބަދަލު ކުރަން ގާނޫނުއަސާސީ އިސްލާހު ކުރުމާއި ރައިސުލްޖުމްހޫރިއްޔާ ހޮވޭނެ ގޮތް ބަދަލުކުރަން ވަނީ ހުށަހަޅާފަ އެވެ.
ނަޝީދުގެ ތާއިދު ބޮޑުކޮށް ބަރުލަމާނީއަށް އޮތްއިރު, އިދިކޮޅު ޕީޕީއެމްގެ ރަސްމީ ސްޓޭންޑެއް އެކަމުގައި މިހާތަނަށް ނުބުނެ އެވެ. ނަމަވެސް, މީގެކުރިން "އަދަދު"އަށް ދެއްވި އިންޓަވިއުއެއްގައި ޔާމީން ވަނީ އެމަނިކުފާނު އަބަދުވެސް ބަރުލަމާނީއަށް ތާއިދު ކުރެއްވި ކަމަށް ވިދާޅުވެފަ އެވެ. އެކަމަކު, ރާއްޖެއަށް އެ ނިޒާމް ފިޓް ނޫން ކަމަށް ވިދާޅުވެފައިވެ އެވެ.
އެ ވާހަކަތައް މިރޭ ބޭއްވި ނޫސްވެރިންގެ ބައްދަލުވުމުގައި ވެސް ޔާމީން ވަނީ ތަކުރާރު ކުރައްވާފަ އެވެ. އެގޮތުން ޔާމީން ވިދާޅުވި ގޮތުގައި, އަބަދުވެސް އެމަނިކުފާނު ތާއިދު ކުރައްވަނީ ބަރުލަމާނީ ނިޒާމަށް ކަމަށާއި އެ ނިޒާމަކީ ރައްޔިތުންގެ ޝާމިލްވުން މާބޮޑަށް އޮންނަ ނިޒާމެއް ކަމަށެވެ. އެ ނިޒާމް ގެންނަން, ފުރިހަމަ ވާން ޖެހޭ ގިނަ ކަންތައްތަކެއް އެބަހުރި ކަމާއި އެކަންކަން ފުރިހަމަވެއްޖެނަމަ, ތާއިދު ކުރައްވާނީ ބަރުލަމާނީ ނިޒާމް ރާއްޖޭގައި އޮންނަކަން ޔާމީން ވިދާޅުވި އެވެ.
އެކަމަކު ރާއްޖެއަށް މިވަގުތު ބަރުލަމާނީ ނިޒާމް ނުފެތޭކަން ޔާމީން ފާހަގަކުރެއްވި އެވެ. އޭގެ ހަރަދު ބޮޑުވުމާއި ސިޔާސީ ހަލަބޮލިކަން ސަބަބެއްގެ ގޮތުގައި ޔާމީން ފާހަގަކުރެއްވި އެވެ.
ބަރުލަމާނީ ނިޒާމެއްގައި ޕާޓީއެއްގެ ތެރެއިން މަޖިލީހަށް އިންތިހާބުވާ މެންބަރުން ވިޕަށް އަމަލު ކުރަން ޖެހޭނެ ކަމާއި ޕާޓީން ވަކިވުން ފަދަ ކަންކަން މަނާކުރާ ކަމަށެވެ. ނަމަވެސް, ރާއްޖޭގައި އެކަން ނުހިނގާނެ ކަމަށާއި ރާއްޖޭގެ މަޖިލިސް މެންބަރުން ވަރަށް ފަސޭހަކަމާއެކު އެކި ދިމާލަށް ދާއިރު, އެކަން ރެގިއުލޭޓް ކުރާނެ ގޮތެއް ނެތް ކަމަށް ޔާމީން ވިދާޅުވި އެވެ.
"...އެހެންވީމަ ހާސިލްކުރަން މި އުޅޭ މަގުސަދު ހާސިލުކުރަން ވަރަށް ގިނަ އިންގްރީޑިއެންޓް ފުރިހަމަ ވާން ޖެހޭ, އެހެންނޫނީ ވަރަށް ހަލަބޮލި ނިޒާމަކަށް މި ނިޒާމް ވަނީ," ޔާމީން ވިދާޅުވި އެވެ.
ރައްޔިތުންގެ މަޖިލީހުގެ މެންބަރުކަން ވެސް ގިނަ އަހަރުތަކެއްގައި ކުރެއްވި ޔާމީން ވިދާޅުވީ ބަރުލަމާނީ ނިޒާމްގެ ތެރެއިން ކޯލިޝަން ސަރުކާރުތައް ހިންގާއިރު, އެއީ ވަރަށް އަވަހަށް ބަދަލުވުމުގެ ފުރުސަތު އޮންނަ ސަރުކާރުތަކެއް ކަމަށެވެ. އޭގެ ބަދަލުގައި ރިޔާސީ ނިޒާމެއްގައި ސަރުކާރު މާބޮޑަށް ސްޓޭބަލްކަން ފާހަގަކުރެއްވި އެވެ.
ނަޝީދާ އެކުގައި މަސައްކަތްކުރުން: "ވުމަށްވުރެ ނުވުން ގާތީ"
ސިޔާސީ ގޮތުން މަޝްރަހު އެނބުރެމުންދާ ގޮތުން ނަޝީދު މިހާރު ހުންނެވީ އެމްޑީޕީގެ އެންމެ އިސް ލީޑަރު, ރައީސް އިބްރާހިމް މުހައްމަދު ސޯލިހާ ސިޔާސީ ގޮތުން ދެ ދިމާލަކަށެވެ. ރައީސް ސޯލިހުގެ ވެސް ތާއިދު ބަރުލަމާނީ ނިޒާމަށް ނެތްއިރު, ނަޝީދާއެކު ޔާމީން ސިޔާސީ މަސައްކަތް ކުރައްވަދާނެ ކަމަށް އަޑުތައް ފެތުރިފައިވެ އެވެ. އެފަދަ އިޝާރާތެއް މީގެ އެތައް ދުވަހެއް ކުރިން ނަޝީދު ވެސް ދެއްވި އެވެ.
އެކަމަކު, ޔާމީން މިރޭ ވިދާޅުވި ގޮތުން ނަޝީދާއެކު އެމަނިކުފާނު ސިޔާސީ މަސައްކަތް ކުރުމަކީ ވުމަށްވުރެ ނުވުން ގާތް ކަމެކެވެ.
ޔާމީން ވިދާޅުވި ގޮތުގައި, އެމަނިކުފާނާއި ނަޝީދުގެ ފިކުރީ ގޮތުން ހިޔާލު ތަފާތެވެ. އެގޮތުން ޔާމީން ވިދާޅުވީ, ޕީޕީއެމް ވަކާލާތު ކުރަނީ އިސްލާމީ ސިފަތައް ހިމެނޭ ޑިމޮކްރަސީއެއް ކަމަށާއި ނަމަވެސް, ނަޝީދުގެ ވަކާލާތު ކުރުންތައް އެއާ ހިލާފު ކަމަށެވެ.
"ނަޝީދާއި އަޅުގަނޑާ އެއްބަސްވެވޭ އެއް އިސްލާހަކީ ދިވެހިރާއްޖެއަށް އެންމެ ރަނގަޅީ ބަރުލަމާނީ ނިޒާމެކޭ, އެކަމަކު ދިވެހިރާއްޖޭގަ އޮންނަންވީ ލިބަރަލް ވެލިއުސް އާއި ނޯމްސްއާ އިސްލާމްދީނުގެ ބޮޑެތި ކަންކަން ދަމަހައްޓާނެ މިންވަރާއި މީގަ އަޅުގަނޑާއި ނަޝީދާ ހިޔާލު ވަރަށް ތަފާތު," ޔާމީން ވިދާޅުވި އެވެ.
"ގަބޫލެއް ނުކުރެވޭ އެ ފިކުރީ ހިޔާލު ތަފާތުވުންތައް އެއް ގަލަކަށް އަރާނެހެނެއް, އެ އެއް ގަލަކަށް ނާރާ ކަމަށްވާނަމަ އަޅުގަނޑުމެން ދެބައިމީހުން އެކުގައި މަސައްކަތްކޮށްފައިވާނެ ކަމަކަށް އަޅުގަނޑަކަށް ނުފެނޭ,"
