ވީޑިއޯ ސްޓްރީމިން ޕްލެޓްފޯމްތަކުގެ މެދުގައި އޮތް ވާދަވެރިކަމުގެ ތެރެއިން ނެޓްފްލިކްސް ފަހަތަށް ވައްޓާލުމަށް ފަހު އެންމެ ގިނަ ސަބްސްކްރައިބަރުން ޑިޒްނީއަށް ލިބިއްޖެ އެވެ.
ޑިޒްނީގެ ތިން ސްޓްރީމިން ޕްލެޓްފޯމް ހިންގާ އިރު، ޖުމްލަ 221.1 މިލިއަން ސަބްސްކްރައިބަރުން ހަމަވީ ޖުލައި މަހުގަ އެވެ. އެއީ ނެޓްފްލިކްސްއަށް ވުރެ ކުޑަ ތަންކޮޅެއް އިތުރެވެ.
އެހެން ނަމަވެސް އިންޑިއާގައި ކްރިކެޓް ދެއްކުމުގެ ރައިޓްސް ޑިޒްނީއަށް ގެއްލުމުން، ކުރިއަށް އޮތް ތަނުގައި ސަބްސްކްރަައިބަރުން އިތުރުވުން މަޑު ޖެހޭނެ ކަމަށް ކުންފުނިން ލަފާކުރެ އެވެ.
ޑިޒްނީގެ މަައި ޕްލެޓްފޯމްގެ އިތުރުން ހޫލޫ، އީއެސްޕީއެން+އަދި ޑިޒްނީ+ އަކީ ވެސް އެ ކުންފުނީގެ ސްޓްރީމިން ޕްލެޓްފޯމްތަކެވެ. އޭގެ ތެރެއިން ޑިޒްނީ+ ގެ ޑިމާންޑް ދަަނީ އުފުލެމުންނެވެ.
ފާއިތުވި ކުއާޓާގައި އިތުރު 14.4 މިލިއަން ސަބްސްކްރައިބަރުން ޑިޒްނީ+ އަށް ލިބުނެވެ. އޭގެ ތެރެއިން ގިނަ ސަބްސްކްރައިބަރުން ނިސްބަތް ވަނީ އެމެރިކާ ނޫން ގައުމުތަކަށެވެ.
އެއާ ހިލާފަަށް ވީޑިއޯ ސްޓްރީމިން ޕްލެޓްފޯމްތަކުގެ ރަސްގެފާނުގެ ގޮތުގައި އަހަރުތަކެއް ވަންދެން ދެމި އޮތް ނެޓްފްލިކްސްގެ މިލިއަނެއްހާ ސަބްސްކްރައިބަރުން އެ ހިދުމަތް ބޭނުން ކުރުން ޖުލައި މަހު ހުއްޓާލި އެވެ.
