ދިވެހިންގެ ދިރިއުޅުމާއި އާދަކާދައާއި ސަގާފަތް އަދި ރާއްޖޭގެ ތާރީހުގެ މުހިއްމު ދިރާސާއެއް ކުރައްވައި "ޕީޕަލް އޮފް ދަ މޯލްޑިވް އައިލެންޑްސް"ގެ ނަމުގައި ފޮތެއް ލިއުއްވި ޕްރޮފެސަރް ކްލަރެންސް ރޭ އަވަހާރަވެއްޖެ އެވެ.
މެލޮނީ އަވަހާރަވުމުން ހެރިޓޭޖް މިނިސްޓްރީން މިއަދު އެކަމުގެ ހިތާމަ ފާޅުކޮށް ޓްވީޓެއް ކުރި އެވެ.
އޭނާ އަވަހާރަވީއިރު ހުންނެވީ ކޮން ގައުމެއްގައި ކަމެއް ނޭނގެ އެވެ.
ހެރިޓޭޖް މިނިސްޓްރީގެ ރިސާޗް އެނަލިސްޓް އަދި ތާރީހު ދިރާސާކުރައްވާ ބޭފުޅެއް ކަމަށްވާ އަހުމަދު އަލާ ދީދީ ވިދާޅުވި ގޮތުގައި ޕްރޮފެސަރު މެލޮނީއަކީ ތާރީހީ އިލްމުގެ ދާއިރާއިން ރާއްޖެއަށް ވަރަށް އަގުހުރި ޚިދުމަތެއް ކުރެއްވި ބޭފުޅެއް ކަމަށެވެ.
"ރާއްޖޭގެ ތާރީހާ ބެހޭ ގޮތުން އޮންނާނެ [އޭނާ] ވަރަށް މަޝްހޫރު ފޮތެއް. ރާއްޖޭގެ ގަދީމީ ތާރީހާ ބެހޭ ވަރަށް އާ މައުލޫމާތު ހާމަކޮށްދެއްވާފައިވާ ބޭފުޅެއް އެއީ،" އަލާ ވިދާޅުވި އެވެ.
އޭނާ ވިދާޅުވި ގޮތުގައި ރާއްޖެއާ ބެހޭ ގޮތުން މެލޮނީ ލިއުއްވި ފޮތުގައި، އަވަށްޓެރި ސްރީލަންކާ އާއި އިންޑިއާގެ ފަށްފުއްތަކުގައި ރާއްޖެއާ ބެހޭ ގޮތުން ހުރި މައުލޫމާތުތައް ވެސް ހިމަނުއްވާފައި ވެ އެވެ.
މެލޮނީއަކީ އަލާ ވިދާޅުވި ގޮތުގައި ރާއްޖޭގެ ތާރީހު ދިރާސާ ކުރެއްވި އެޗްސީޕީ ބެލް ފަދައިން މެލޮނީއަކީ ވެސް ރާއްޖޭގެ ތާރީހާ ބެހޭ އެންމެ ހަރުދަނާ އެއް ދިރާސާ ކުރެެއްވި ބޭފުޅާ އެވެ.
މެލޮނީއަކީ އެމެރިކާގެ ޔުނިވާސިޓީ އޮފް ޕެންސިލްވޭނިއާއިން އޭޝިއަން ސްޓަޑީސްގެ ދާއިރާއިން ޕީއެޗްޑީ ހާސިލުކުރައްވާފައިވާ ބޭފުޅެކެވެ. އޭނާ ވަނީ ރާއްޖޭގެ އިތުރުން އަވަށްޓެރި ސްރީލަންކާއާއި އިންޑިއާ އަދި ބަންގްލަދޭޝްގެ ތާރީހާ ބެހޭ ގޮތުން ވެސް ދިރާސާތައް ކުރައްވައިފަ އެވެ.
