މެންޗެސްޓާ (އޮގަސްޓް 11) - މެންޗެސްޓާ ސިޓީގެ ވިސްނުމަކީ އެ ކްލަބްގައި ހިތްހަމަނުޖެހިފައި ތިބި ކުޅުންތެރިން ގަދަ ކަމުން މަޑުކުރުވުން ނޫން ކަމަށް އެ ޓީމަށް ކުޅޭ ޕޯޗުގީސް މިޑްފީލްޑަރު ބެނާޑޯ ސިލްވާ ބުނެފި އެވެ.
ސިޓީ އަށް ކުޅޭ ބެނާޑޯ، 27، އަކީ ބާސެލޯނާ އިން ފާރަލަމުން އަންނަ ކުޅުންތެރިއެކެވެ. މީގެ ކުރިން ވެސް ބެނާޑޯ ވަނީ އޭނާ ސިޓީ ދޫކޮށްލާނީ އެ ކްލަބުން ވެސް އެ ގޮތަށް ބޭނުންވާނަމަ ކަމަށެވެ.
ސްޕެއިނުގެ ބައެއް މީޑިއާ ރިޕޯޓްތައް ބުނާގޮތުން ބާސެލޯނާ އިން 60-70 މިލިއަން ޑޮލަރުގެ ބިޑެއް ކުރިޔަސް ސިޓީން ބެނާޑޯ ދޫކޮށްލުމުގެ ފުރުސަތެއް އެބައޮތެވެ. އެކަމަކު، ބާސެލޯނާ އިން މި ވަގުތު އިސްކަން ދެނީ ލަލީގާގެ މާލީ ގަވާއިދުތަކަށް ފައްތައިގެން، އެ ޓީމަށް ގެނައި ކުޅުންތެރިން ޓީމުގައި ރަޖިސްޓްރީ ކުރުމަށެވެ.
އީއެސްޕީއެން އަށް ދިން އިންޓަވިއުއެއްގައި ބެނާޑޯ ބުނީ އޭނާ ސިޓީގައި ހުރީ އުފަލުން ކަމަށާއި އެކަމަކު، މުސްތަގުބަލުގައި ވާނެގޮތަކާ މެދު ޔަގީންކަމެއް ދެވެން ނެތް ކަމަށެވެ.
"ވާނެ ގޮތެއް ނޭނގުނަސް އަހަރެން ސިޓީގައި މި ހުރީ އުފަލުން. ސިޓީ އާއި އަހަރެންގެ ދެމެދުގައި އޮންނާނީ ވަރަށް ތެދުވެރި ގުޅުމެއް. އަހަރެން ބޭނުންވާގޮތް ވެސް އެ މީހުންނަށް އެނގޭނެ. އަހަރެން މި ކްލަބްގައި މަޑުކޮށްފިއްޔާ އެއީ އަހަރެން އެ ގޮތަށް އެދޭތީ، ކްލަބަށް އަހަރެން އިހުތިރާމް ކުރާނަން އަބަދުވެސް،" ބެނާޑޯ ބުންޏެވެ.
"ސިޓީން އަބަދުވެސް ބުނޭ ކްލަބްގައި ހިތްހަމަނުޖެހިއްޖިއްޔާ ދިއުމުގެ ފުރުސަތު އޮންނާނެކަން. ސިޓީގެ ވިސްނުމަކީ ހިތްހަމަނުޖެހިފައި ތިބޭ ކުޅުންތެރިން މަޑުނުކުރުވުން،"
ޕެޕް ގާޑިއޯލާ ސިޓީގެ ކޯޗުކަމާ ހަވާލުވެ ޓީމު ވަރުގަދަ ކުރުމުގެ މަސައްކަތުގެ ތެރެއިން ބެނާޑޯ ގެނައީ 2017 ވަނަ އަހަރު އެވެ. އެ ފަހަރު ބެނާޑޯގެ ސޮއި ހޯދަން ޓްރާންސްފާ ފީގެ ގޮތުގައި ސިޓީން ވަނީ 58 މިލިއަން ޑޮލަރު މޮނާކޯ އަށް ދީފަ އެވެ. މޮނާކޯއާ އެކު 2017 ވަނަ އަހަރު ފްރެންޗް ލީގު ކާމިޔާބުކުރި ބެނާޑޯ ވަނީ ސިޓީ އަށް ބަދަލުވި ފަހުން އެ ޓީމާ އެކު ޕްރިމިއާ ލީގާއި ލީގު ކަޕް ހަތަރު ފަަހަރާއި އެފްއޭ ކަޕް އެއް ފަހަރު ކާމިޔާބު ކޮށްފަ އެވެ.
