ކުންފުނީގެ މާލީ ހާލަތު ދަށަށް ދިޔުމާ ގުޅިގެން ދެ އަހަރު ދުވަސް ބޯނަސް ނުދީ އޮތުމަށް ފަހު މިދިޔަ އަހަރު ފައިދާވުމާ ގުޅިގެން ހައުސިން ޑިވެލޮޕްމަންޓް ކޯޕަރޭޝަން (އެޗްޑީސީ)ން މުވައްޒަފުންނަށް ބޯނަސް ދީފި އެވެ.
އެންމެ ފަހުން އެޗްޑީސީން މުވައްޒަފުންނަށް ބޯނަސް ދިނީ 2018 ވަނަ އަހަރު އެވެ.
އެފަހުން 2019 އަދި 2020 ގައި ބޯނަސް ނުދެ އެވެ. އަނެއްކާވެސް ބޯނަސް ދޭގޮތަށް ނިންމީ ކުންފުނީގެ ވިޔަފާރި ރަނގަޅުވެ މިދިޔަ އަހަރު ކުންފުންޏަށް ބިލިއަނަކަށް ވުރެ ގިނަ ރުފިޔާ ފައިދާ ވުމާ ގުޅިގެންނެވެ.
ބޯނަސް ދިނުމާ ގުޅޭގޮތުން "އަދަދު" ނޫހަށް ލިބިފައިވާ އެޗްޑީސީގެ އިންޓާނަލް މެމޯގައިވާ ގޮތުގައި، ޝަރުތުހަމަވާ ހުރިހާ މުވައްޒަފުންނަށް މިހާރު ބޯނަސް ޖަމާކޮށްދީފި އެވެ.
އެގޮތުން އެ ކުންފުނީގައި މިދިޔަ އަހަރު މަސައްކަތްކުރި މުވައްޒަފުންގެ ތެރެއިން ޕްރޮބޭޝަން ނިންމާފައި ތިބި ހުރިހާ މުވައްޒަފުންނަށާއި، ރިޓަޔާކުރި މުވައްޒަފުންނާއި މުސާރަލިބޭ ޗުއްޓީ ނަގާފައި ތިބި މުވައްޒަފުންގެ ތެރެއިން މަދުވެގެން ތިން މަސް ދުވަހު މަސައްކަތްކޮށްފައި ތިބި ހުރިހާ މުވައްޒަފުންނަށް ބޯނަސް ދީފި އެވެ.
އެކަމަކު މިދިޔަ އަހަރު ހުއްދަ ނުނަގާ އޮފީހަށް ތިން ދުވަހަށް ވުރެ ގިނަ ދުވަހު ހާޒިރު ނުވާ މުވައްޒަފުންނަށާއި ވަޒީފާއިން ވަކިކުރި މުވައްޒަފުންނަށާއި އެޕްރެންޓިސް އަދި އިންޓާނުންނަކަށް ބޯނަސް ނުލިބޭނެ އެވެ.
ބޯނަހުގެ ގޮތުގައި މުވައްޒަފުންގެ އެލަވަންސްތައް ނުހިމަނާ ދެ މަސް ދުވަހުގެ ޖުމްލަ މުސާރައާ އެއްވަރުގެ އަދަދެއް ދިނެވެ. މުސާރައިގެ އިތުރުން ދެން ބަލާފައިވަނީ މިދިޔަ އަހަރު އެ މުވައްޒަފެއްގެ މަސައްކަތުގެ ފެންވަރަށާއި ހާޒިރީއަށެވެ.
