އެމެރިކާގެ ވޮޝިންޓަން ޑީސީގައި ހުންނަ ނޭޝަނަލް ޑިފެންސް ޔުނިވާސިޓީގެ "އިންޓަރނޭޝަނަލް ފެލޯސް ހޯލް އޮފް ފޭމް" ގައި ހިމެނުމުގެ ޝަރަފު ޗީފް އޮފް ޑިފެންސް ފޯސް، މޭޖަ ޖެނެރަލް އަބްދުﷲ ޝަމާލަށް އަރުވައިފި އެވެ.
ސިޑްނީ ޝެރެޓަން ގްރޭންޑް ހޮޓެލްގައި ބޭއްވި އިންޓަނޭޝަނަލް ފެލޯސް ހޯލް އޮފް ފޭމް އިންޑަކްޝަން ސެރެމަނީގައި މި ޝަރަފު، ޝަމާލަށް ލިބިވަޑައިގެންނެވިކަމުގެ ލިޔުމާއި، އިންޓަނޭޝަނަލް ފެލޯސް ހޯލް އޮފް ފޭމްގެ މެމެންޓޯ ހަވާލުކޮށްދެއްވީ ނޭޝަނަލް ޑިފެންސް ޔުނިވާސިޓީގެ ރައީސް، ލެފްޓިނެންޓް ޖެނެރަލް މައިކް ޕްލެއިންއެވެ.
އެ ރަސްމިއްޔާތުގައި ލެފްޓިނެންޓް ޕްލެއިނާއި ޝަމާލް ވަނީ އިންޓަނޭޝަނަލް ފެލޯސް ހޯލް އޮފް ފޭމްގައި ބެހެއްޓުމަށް ހަމަޖެހިފައިވާ ފޮޓޯ އިފުތިތާހުކޮށްދެއްވާފަ އެވެ.
އިންޓަރނޭޝަނަލް ފެލޯސް ހޯލް އޮފް ފޭމްގެ ޝަރަފަކީ ނޭޝަނަލް ޑިފެންސް ޔުނިވާސިޓީން ރަންވަނަތައް ހޯދައި، މަތީ ފެންވަރުގައި ދަސްވެނިވުމަށްފަހު ގައުމުތަކުގެ އަސްކަރިއްޔާގެ އެންމެ މަތީ މަގާމަށް އައްޔަން ކުރާ ފަރާތްތަކަށް އަރުވާ ޝަރަފެކެވެ. އަސްކަރިއްޔާގެ އެންމެ މަތީ މަގާމުގެ އިތުރުން، ސަރުކާރުގެ އެފަދަ އިސް މަގާމުތަކާއި، އިންޓަނޭޝަނަލް އޯގަނައިޒޭޝަންތަކުގެ އިސް މަގާމުތައް އަދާކުރާ ފަރާތްތަކުގެ ތެރެއިން، އިންޓަނޭޝަނަލް ޕީސް އެންޑް ސްޓެބިލިޓީއަށް ފާހަގަކުރެވޭފަދަ މަސައްކަތްތަކެއް ކުރައްވާފައިވާ ފަރާތްތަތަކަށް ވެސް މި ޝަރަފު އަރުވަ އެވެ.
ހޯލް އޮފް ފޭމްގެ ޝަރަފަކީ ނޭޝަނަލް ޑިފެންސް ޔުނިވާސިޓީން އެ ޔުނިވާސިޓީގެ ދަސްވެނިންނަށް އަރުވާ ޝަރަފުތަކުގެ ތެރެއިން އެންމެ މަތީ ޝަރަފެވެ. ނޭޝަނަލް ޑިފެންސް ޔުނިވާސިޓީން ދަސްވެނިވެފައިވާ ދިވެހިންގެ ތެރެއިން އެންމެ ފުރަތަމަ މި ޝަރަފު އެރުވީ މޭޖާ ޖެނެރަލް ޝަމާލަށެވެ.
މޭޖާ ޖެނެރަލް ޝަމާލް ވަނީ، 2011 އިން 2012 އަށް ނޭޝަނަލް ޑިފެންސް ޔުނިވާސިޓީގައި ހިންގި މާސްޓާ އޮފް އާޓްސް އިން ސްޓްރެޓީޖިކް ސެކިއުރިޓީ ސްޓަޑީސް ޕްރޮގްރާމުގައި ރަންވަނަތަކެއް ހޯއްދަވާފަ އެވެ. އެގޮތުން, އެ ޕްރޮގްރާމުގެ ހުރިހާ މާއްދާއަކުން "އޭ ޕްލަސް" ހޯއްދަވައި، 4.0 ގެ ގްރޭޑް ޕޮއިންޓް އެވަރެޖް ހޯއްދަވާފައި ވެއެވެ. އަދި އެ ކޯހުގެ "ޑިސްޓިންގްއިޝްޑް އޮނަ ގްރެޖުއޭޓްގެ" މަގާމު ހާސިލުކުރެއްވުމުގެ އިތުރުން ޝަމާލް ހުށެހެޅުއްވި ތީސިސް ވަނީ "އޮނާޑް ތީސަސް" ގެ ގޮތުގައި ހޮވިފަ އެވެ.
