ވެރިކަންކުރާ ކޯލިޝަނުގެ މައިޕާޓީ އެމްޑީޕީގެ ރިޔާސީ ޓިކެޓް، ޕްރައިމަރީ އެއް ނުބާއްވައި ވަކި ބޭފުޅަކަށް ދެވޭ ގޮތަށް އަސާސީ ގަވައިދު ބަދަލުކުރަން އެއްވެސް ފަރާތަކުން ހުށަަހަޅާފައި ނުވާ ކަމަށް އެޕާޓީން މިއަދު ބުނެފި އެވެ.
އެމްޑީޕީގެ އޮފީހުގައި މިއަދު ބޭއްވި މީޑިއާ ބްރީފިންއެއްގައި އެޕާޓީގެ ޗެއާޕާސަންގެ ނައިބު (އިދާރީ) އިބްރާހީމް ރަޝީދު (އެންސްޕާ އިބުރޭ) ވިދާޅުވީ އެޕާޓީން މިމަހުގެ 19ގައި ބާއްވަން ތައްޔާރުވަމުން އަންނަ ކޮންގްރެސްއަށް، ރިޔާސީ ޓިކެޓް ދިނުމާ ބެހޭ އެއްވެސް އިސްލާހެއް ހުށަހަޅާފައި ނުވާ ކަމަށެވެ. މިފަހަރުގެ ކޮންގްރެސްއަށް އެފަދަ ކަމެއް ހުށަހެޅުމުގެ ފުރުސަތު ވެސް މިހާރު ނެތް ކަމަށް އޭނާ ވިދާޅުވި އެވެ.
"އަަޅުގަނޑަށް ހީވާ ގޮތުން ހުރިހާ ބޭފުޅުން ވެސް އަސާސީ ގަވައިދާ ބެހޭ ގޮތުން ކޮންސާނަކަށް ވަނީ ރިޔާސީ ޓިކެޓް. އެކަހަލަ އެއްވެސް ކަމެއް ނެތް އެނގޭތޯ. އެއްވެސް ބޭފުޅަކު އިސްލާހެއް ހުށަހަޅާފައެއް ނެތް އެގޮތަކަށް،" އިބްރޭ ވިދާޅުވި އެވެ.
އެމްޑީޕީގެ ކޮންގްރެސްއަށް ހުށަހަޅާފައި ހުރީ ކޮންކޮން އިސްލާހުތަކެއްތޯ ކުރި ސުވާލަކަށް ޖަވާބު ދެއްވަމުން އިބްރޭ ވިދާޅުވީ މައިގަނޑު ގޮތެއްގައި ހުރީ ޕާޓީ ހިންގަން ފަސޭހަކުރުމަށްޓަކައި ގެންނަ އިސްލާހުތައް ކަަމަށެވެ. އަސާސީ ގަވައިދުގައި އޮޅުން އަރާ ގޮތަށް ހުރި ބައެއް ކަންތައްތައް ރަނގަޅުކުރަން ވެސް އޭނާ ވިދާޅުވި ގޮތުގައި އިސްލާހުތައް އެބަހުއްޓެވެ.
އެމްޑީޕީގެ އެންމެ އިސް ދެލީޑަރުން ކަމަށްވާ ރައީސް އިބްރާހީމް މުހައްމަދު ސޯލިހަށް ތާއީދު ކުރާ މެމްބަރުންނާއި ޕާޓީގެ ރައީސް މުހައްމަދު ނަޝީދަށް ތާއީދުކުރާ މެމްބަރުންނާ ދެމެދު މީގެ ކުރިން އެންމެ ބޮޑަށް ބަހުސް ކުރި އެއް މައްސަލައަކީ ރިޔާސީ ޓިކެޓްގެ މައްސަލަ އެވެ. ޕްރައިމަރީއަކާ ނުލައި ރައީސް ސޯލިހަށް ރިޔާސީ ޓިކެޓް ދޭން އުޅޭ ކަަމަށް އެމްޑީޕީގެ ބައެއް އިސް ބޭފުޅުން ވެސް މީގެ ކުރިން ތުހުމަތުކުރެއްވި އެވެ.
މިއަދު މީޑިއާ ބްރީފިންގައި ނޫސްވެެރިން ކުރި ސުވާލުތަކުގައި ސީދާ އެ ސުވާލު ނުކުރަނީސް، އިބްރޭ ވިދާޅުވީ ކޮންގްރެސްއަށް ހުށަހަޅާ އިސްލާހުތަކާ މެދު އޮތް މައިގަނޑު (ބައެއް ފަރާތްތަކުގެ އޮތް) ކަންބޮޑުވުމަކީ ޕްރައިމަރީ ނުބާއްވާ ގޮތަށް އިސްލާހެއް ހުށަހަޅައިފާނެ ކަމުގެ ކަންބޮޑުވުން ކަމަށެވެ.
އިބްރޭ ވިދާޅުވި ގޮތުގައި ހުށަހެޅުންތައް ކޮންގްރެސްއަށް ގެންދިއުމާ މެދު ގޮތެއް ނިންމާނީ އެޕާޓީގެ ގައުމީ މަޖިލީހުންނެވެ.
