މާލޭގެ ފިހާރައެއް ތެރޭގައި ވިޔަފާރިކުރަން ގޮސް ހުރި އަންހެނަކަށް އެ ތަނުގައި މަސައްކަތް ކުރާ ބިދޭސީ ސޭޓަކު ބެހުނު ކަމަށް ބުނާ މައްސަލައެއްގައި އެކަށޭނަ ހެކި ނެތުމުން ކްރިމިނަލް ކޯޓުގައި މައްސަލަ ސާބިތުނުވާ ކަމަށް ނިންމައިފި އެވެ.
ދައުލަތުން މި މައްސަލާގައި ދައުވާ ކޮށްފައި ވަނީ މުހައްމަދު ޝަކީލް ހޮސައިން ނަމަކަށް ކިޔާ ބަންގްލަދޭޝް މީހަކަށެވެ.
މި ކަމަކީ އޮގަސްޓް 30، 2020 ގައި ހިނގައިދިޔަ ކަމެކެވެ. މިރުސް ގަންނަން ފިހާރައަށް ދިޔަ އަންހެނަކު ފްރިޖް ކައިރިން މިރުސް ނަގައިދިނުމަށް އެދުމުން ފްރިޖް ކައިރިއަށް ގޮސް މިރުސް ނެގުމަށް ފަހު އަންހެން މީހާގެ އުރަމަތީގައި ހިފާފައިވާ ކަމަށް އޭނާ ތުހުމަތު ކުރެ އެވެ.
މި މައްސަލާގައި ދައުލަތުން ހުށަހެޅީ ތިން ހެއްކެކެވެ. އެއީ އަންހެން މީހާގެ ކޮއްކޮއަކާއި، ފުލުހަށް ގުޅުމުން އެ ދުވަހު ފިހާރައަށް ދިޔަ ދެ ފުލުސް އޮފިސަރުންނެވެ.
އަންހެން މީހާ ބުނާ ގޮތުން އެ ދުވަހު އެ ކަމެއް ހިނގިއިރު ފިހާރަ ތެރޭގައި އޭނާ ކޮއްކޮ ހުއްޓެވެ. އެކަމަކު ޝަރީއަތަށް ހެކިބަސް ދޭން ބޭނުން ނުވާ ކަމަށާއި ދުވަސްވީ މައްސަލައަކަށް ވާތީ ވެގެން ދިޔަ ގޮތް މިހާރު ހަނދާނަކު ނެތް ކަމަށް އޭނާގެ ކޮއްކޮ ޝަރީއަތުގެ މަޖިލީހުގައި ވަނީ ބުނެފަ އެވެ.
ދެ ފުލުސް އޮފިސަރުން ވެސް ބުނި ގޮތުގައި އެ ދުވަހު ފިހާރައަށް ދިޔައިރު އެ އަންހެން މީހާ އާއި ބިދޭސީ މީހާ ވެސް ފިހާރާގައި ހުރި ކަމަށެވެ. ފިހާރާގައި ސީސީޓީވީ ކެމެރާ ހުރި ނަމަވެސް އެ މަސައްކަތް ކުރާ ކަމެއް ބަލާފައިނުވާ ކަމަށް ދެ ފުލުހުން ވެސް ބުންޏެވެ.
ކެމެރާ މަސައްކަތް ނުކުރާ ކަމަށް ބިދޭސީ މީހާ ބުނި ކަމަށާއި އިތުރަށް އެ ކަމުގައި ކެމެރާ މަސައްކަތް ކުރާ ކަމެއް އަދި ނުކުރާ ކަމެއް ވެސް ނުބަލާ ކަމަށް ފުލުހުން ބުންޏެވެ.
ހާދިސާ ހިނގި ތަން ލޮލަށް ފެނުނު އެއްވެސް ހެއްކެއް ނެތް އިރު، އަންހެން މީހާގެ ބަހަށް ބާރު ލިބިދޭ އިތުރު ހެކި ގަރީނާ ދައުލަތަށް ހުށަހެޅިފައެއް ނެތް ކަމަށާއި އެ މިންވަރަކީ ޖިނާއީ ކުށެއް މީހެއްގެ މައްޗަށް ސާބިތު ކުރުމަށް ފުދޭ އެކަށީގެންވާ ވަރެއް ނޫން ކަމަށް ކޯޓުން ކުރި ހުކުމުގައިވެ އެވެ.
