ހައި ކޯޓުގެ ފަނޑިޔާރު ކަމަށް ކްރިމިނަލް ކޯޓުގެ ގާޒީ ދީބާނާޒް ފަހުމީ އާއި ހައި ކޯޓުގައި ލީގަލް އޮފިސަރެއްގެ ގޮތުގައި ކުރިން މަސައްކަތް ކުރައްވާފައިވާ މުހައްމަދު ސަލީމް މިއަދު އައްޔަންކޮށްފި އެވެ.
ޖުޑިޝަލް ސާވިސް ކޮމިޝަން (ޖޭއެސްސީ) ގައި ބޭއްވި ރަސްމިއްޔާތެއްގައި ދީބާނާޒް އާއި ސަލީމް ވަނީ ހައި ކޯޓު ފަނޑިޔާރުކަމުގެ ހުވާ ކުރައްވައިފަ އެވެ. އަދި މަގާމުގެ ފަތްކޮޅާ ހަވާލުވެފަ އެވެ. އެ ހަވާލުކޮށްދެއްވީ ޖޭއެސްސީގެ ރައީސް އަދި ރައްޔިތުންގެ މަޖިލީހުގެ ތުޅާދޫ ދާއިރާގެ މެންބަރު ހިސާން ހުސައިނެވެ.
ދީބަނާޒްއަކީ ކްރިމިނަލް ކޯޓަށް އައްޔަން ކުރި ފުރަތަމަ އަންހެން ގާޒީ އެވެ. އޭނާ ވަނީ ޑެޕިއުޓީ ޕްރޮސެކިއުޓާ ޖެނެރަލްގެ މަގާމު ވެސް ފުރުއްވައިފަ އެވެ. މެލޭޝިއާގެ އިންޓަނޭޝަނަލް އިސްލާމިކް ޔުނިވާސިޓީން ޑިގްރީ އަދި ނިއުޒިލެންޑްގެ ޔުނިވާސިޓީ އޮފް ކެންޓަބަރީއިން މާސްޓާސް ޑިގްރީ ހާސިލްކުރައްވާފައިވާ ދީބާނާޒް ޖިނާއީ އަދުލުގެ ނިޒާމުގައި މަސައްކަތް ކުރައްވާތާ 17 އަހަރު ވެއްޖެ އެވެ.
ސަލީމަކީ ހައި ކޯޓުގެ ލީގަލް އޮފިސަރުގެ މަގާމުގައި 12 އަހަރު ދުވަހު ހިދުމަތްކުރައްވާފައިވާ ބޭފުޅެކެވެ. ގާނޫނީ ދާއިރާއިން ޑިގްރީ ހާސިލް ކުރެއްވީ ކުއްލިއްޔާއިންނެވެ.
މީގެ އިތުރުން، ތ. ގުރައިދޫ މެޖިސްޓްރޭޓް ކޯޓަށް އެ ރަށު އައިޝަތު އިބްރާހީމް އަދި ގދ. ތިނަދޫ މެޖިސްޓްރޭޓް ކޯޓަށް، ކޯރަލް، ނަޝާޠަތު ޒައީމާ ވަނީ އައްޔަންކޮށްފަ އެވެ.
ހައި ކޯޓުގައި ދެ ފަނޑިޔާރެއްގެ މަގާމު ހުސްވެގެން ދިޔައީ ކުރިން އެ ކޯޓުގައި ފަނޑިޔާރަކަށް ހުންނެވި އަބްދުއްރައޫފް އިބްރާހީމް މަގާމުން އިސްތިއުފާ ދެއްވުމުންނާއި ފަނޑިޔާރަކަށް ހުންނެވި އަބްދުﷲ ހަމީދު މަގާމުން ވަކިކުރަން ރައްޔިތުންގެ މަޖިލީހުން ފާސްކުރުމުންނެވެ.
ހައި ކޯޓުގެ ފަނޑިޔާރު ކަމަށް ދީބަނާޒް އައްޔަންކުރެއްވިއިރު، ރައްޔިތުންގެ މަޖިލީހުގެ ރައީސް މުހައްމަދު ނަޝީދު އަވަހާރަކޮށްލަން ބޮމުގެ ހަމަލާއެއް ދިން މައްސަލާގައި ދައުވާ އުފުލިފައިވާ މީހުންގެ މައްޗަށް ހިންގާ ޝަރީއަތް ބަލާ ގާޒީންގެ ބެންޗުގެ ރިޔާސަތާ އެންމެ ފަހުން ހަވާލުވީ އޭނަ އެވެ.
