އެމެރިކާގެ ކުރީގެ ރައީސް ޑޮނަލްޑް ޓްރަމްޕް ފްލޮރިޑާގައި ދިރިއުޅުއްވާ ގެކޮޅު އެފްބީއައިގެ އޭޖެންޓުން ބަލައި ފާސްކޮށް، ތިޖޫރިއެއް ހުޅުވާފައިވާ ކަމަށް އެމަނިކުފާނު ވިދާޅުވެއްޖެ އެވެ.
ޓްރަމްޕްގެ ބަޔާނެއްގައި ވިދާޅުވީ، ޕާމް ބީޗްގައި ހުންނަ ގެކޮޅަށް އެފްބީއައިގެ ގިނަ އަދަދެއްގެ އޭޖެންޓުން ވަދެ ބަލައި ފާސްކުރި ކަމަށެވެ.
ރިޕޯޓުތައް ބުނާ ގޮތުން އެފްބީއައިގެ އޮޕަރޭޝަން ގުޅިފައި ވަނީ ރަސްމީ ލިޔުންތަކެއް ގެންގުޅުމުގައި ޓްރަމްޕް އަމަލު ކުރެއްވި ގޮތުގެ ތަހުގީގާ އެވެ.
ސީބީއެސް ނިއުސްއިން ބުނީ އެފްބީއަައިގެ އޮޕަރޭޝަން ހިންގި ވަގުތު ޓްރަމްޕް ހުންނެވީ ނިއު ޔޯކް ސިޓީގެ ޓްރަމްޕް ޓަވަރުގަ އެވެ.
ޓްރަމްޕް ވިދާޅުވީ އެމަނިކުފާނާ ދެކޮޅަށް ހިންގާ ހުރިހާ ތަހުގީގަކަށް ވެސް ފުރިހަމަ އެއްބާރުލުން ދެމުން ދަނިކޮށް، ކުއްލިއަކަށް ގެކޮޅު ބަލައި ފާސްކުރުމަކީ ރަނގަޅު ގޮތް ނޫން ކަމަށެވެ.
އެއީ "އިންސާފުގެ ނިޒާމު ހަތިޔާރަކަށް ހަދައިގެން" އެމަނިކުފާނު އަލުން ރައީސް ކަމަށް ކުރިމަތިލެއްވުން ހުއްޓުވުމުގެ ބޭނުމުގައި ހިންގާ ކަމެއް ކަމަށް ޓްރަމްޕް ވިދާޅުވި އެވެ.
އެމެރިކާގެ ރައީސުންނާ ގުޅިފައިވާ ލިޔުންތައް ބަލަހައްޓާ ނޭޝަނަލް އާކައިވްސްއިން މިދިޔަ ފެބްރުއަރީ މަހު އެދިފައި ވަަނީ ޓްރަމްޕްގެ މައްސަލަ ތަހުގީގުކޮށް ދިނުމަށެވެ.
ނޭޝަނަަލް އާކައިވްސްއިން ބުނީ ފްލޮރިޑާގައި ހުންނަ ޓްރަމްޕްގެ ގެކޮޅުން 15 ފޮށިގަނޑު ގެންދިޔަ ކަމަށާއި އޭގެ ތެރޭގަައި ބައެއް ސިއްރު ލިޔުންތައް ވެސް ހިމެނޭ ކަމަށެވެ.
އެމެރިކާގެ ގާނޫނުން ރައީސުންނަށް މަޖުބޫރު ކުރަނީ ހުރިހާ ސިޓީތަކާއި މަސައްކަތާ ގުޅޭ ލިޔުންތައް އަދި އީމެއިލްތައް ނޭޝަނަލް އާކައިވްސްގައި ރައްކާ ކުރުމަށެވެ.
އެކަމަކު އޮފިޝަލުން ތުހުމަތު ކުރާ ގޮތުގައި ޓްރަމްޕް ވަނީ އެ ގާނޫނާ ހިލާފަށް ގިނަ އަދަދެއްގެ ލިޔުންތައް ނައްތާލައްވާފަ އެވެ.
