މިރޭ ތުރުކީގެ ކޮންޏާގައި ބާއްވާ އިސްލާމިކް ގޭމްސްގެ ހުޅުވުމުގެ ރަސްމިއްޔާތުގައި ދިވެހި ދިދަ އުފުލުމުގެ ޒިންމާ ރާއްޖޭގައި މި ވަގުތު ހުރި އެންމެ ބާރު އަންހެން ދުވުންތެރިޔާ، އައިޝަތު ހިމްނާ ހަސަން އާއި ގައުމީ ބާސްކެޓްބޯޅަ ކުޅުންތެރިޔާ، އިސްމާއިލް ވިލްދާންއާ ރޭ ހަވާލުކޮށްފި އެވެ.
ކޮންޏާގެ އެތުލީޓްސް ވިލެޖްގައި ރޭ ހަވީރު ބޭއްވި ހާއްސަ އިވެންޓެއްގައި ދިދަ އުފުލާ އެތުލީޓުންނަށް ދިދަ ހަވާލުކޮށްދެއްވީ ކުޅިވަރާ ބެހޭ ވަޒީރު އަހުމަދު މަހުލޫފް އާއި އޮލިމްޕިކް ކޮމިޓީގެ ރައީސް، މުހައްމަދު އަބްދުއްސައްތާރު (ޗަމްޕީ) އެވެ.
މިނިސްޓަރު މަހުލޫފް އާއި ސައްތާރު އަދި ސޮލިޑާރިޓީ ގޭމްސްގައި ވާދަކުރާ ދިވެހި ކޮންޓިންޖެންޓްގެ ޗެފް ޑި މިޝަން، އައިޝަތު ޝިފާނާ ވަޖީހު ވަނީ ސޮލިޑާރިޓީ ގޭމްސްގައި ރާއްޖެ ތަމްސީލްކުރާ ހަތަރު ކުޅިވަރު ކަމަށްވާ، ޓީޓީ، އެތުލެޓިކްސް، ފެތުން އަދި ބާސްކެޓް ތުރީއޮންތުރީ މުބާރާތުގެ ކުޅުންތެރިންނަށް ހިތްވަރު ދެއްވައިފަ އެވެ.
މުބާރާތުގައި ވާދަކުރާއިރު، ގިނަ ގޮންޖެހުންތަކާއި ޗެލެންޖްތައް ކުރިމަތިވާނެކަން ފާހަގަކުރައްވައި، ސައްތާރާއި މިނިސްޓަރު މަހުލޫފް ވަނީ ކޮންމެ ކުޅުންތެރިއަކު ވެސް އެ ކުޅުންތެރިއަކަށް ކުރެވޭނެ އެންމެ ބުރަކޮށް މަސައްކަތްކޮށް ކާމިޔާބު ހޯދޭތޯ ބެލުމަށް އިރުޝާދު ދެއްވައިފަ އެވެ.
ސޮލިޑާރިޓީ ގޭމްސްގައި ބައިވެރިވާ ރާއްޖޭގެ ކޮންޓިންޖެންޓް.-- ފޮޓޯ: މޯލްޑިވްސް އޮލިމްޕިކް ކޮމިޓީ
މި ފަހަރުގެ ސޮލިޑާރިޓީ ގޭމްސްގައި ރާއްޖޭގެ 51 އެތުލީޓުންނާއި އޮފިޝަލުން ބައިވެރިވެ އެވެ.
މިއީ ގައުމީ ޓީމަށް ގިނަ ދުވަސްތަކެއް ވަންދެން ކުޅެފައިވާ ވިލްދާނަށް ބައިނަލްއަގުވާމީ ގޭމްސްއެއްގައި ރާއްޖޭގެ ދިދަ އުފުލުމުގެ ޝަރަފް ލިބޭނެ ފުރަތަމަ ފަހަރެވެ. އެންމެ ފަހުން ބާސްކެޓްބޯޅަ ކުޅުންތެރިއަކު، ބައިނަލްއަގުވާމީ ގޭމްސްއެއްގައި ގައުމީ ދިދަ އުފުލީ 2019 ވަނަ އަހަރުގެ އިންޑިއަން އޯޝަން އައިލެންޑް ގޭމްސް (އައިއޯއައިޖީ)ގައި ބާސްކެޓްބޯޅަ ތަރި، އަހުމަދު ޒަބީރު (ޒަބީ) އެވެ.
ދާދި ފަހުން ކޮމަންވެލްތު ގޭމްސްގައި ރާއްޖޭގެ 100 މީޓަރުގެ އަންހެނުންގެ ދުވުމުގެ ރެކޯޑް މުގުރާލި ހިމްނާ ވަނީ ސޮލިޑާރިޓީ ގޭމްސްގެ 400 މީޓަރު ފައިނަލުގައި ވެސް ވާދަކުރުމުގެ ފުރުސަތު ހޯދައިފަ އެވެ.
ހިމްނާ އަކީ 2014 ވަނަ އަހަރުގެ ކޮމަންވެލްތު ގޭމްސްގެ ހުޅުވުމުގެ ރަސްމިއްޔާތުގައި ހަސަން ސާއިދު ދިދަ އުފުލި ފަހުން، ބައިނަލްއަގުވާމީ ބޮޑު ގޭމްސްއެއްގެ ފެއްޓުމުގެ ރަސްމިއްޔާތުގައި ރާއްޖޭގެ ދިދަ އުފުލަން ފުރުސަތު ލިބުނު ގައުމީ އެތުލެޓިކްސް ޓީމުގެ އެތުލީޓެވެ.
އެންމެ ފަހުން 2017 ވަނަ އަހަރު އަޒަރުބައިޖާނުގެ ބަކޫގައި ކުރިއަށްދިޔަ އިސްލާމިކް ސޮލިޑާރިޓީ ގޭމްސްގައި ރާއްޖޭގެ ދިދަ އުފުލީ ޓެނިސް ކުޅުންތެރިޔާ، އަބްދުﷲ ފާއިހު އެވެ.
