ތުރުކީގެ ކޮންޏާގައި މިހާރު ކުރިއަށްދާ އިސްލާމިކް ސޮލިޑާރިޓީ ގޭމްސްގައި ރާއްޖޭގެ ގައުމީ އެތުލެޓިކްސް ޓީމުގެ އައިޝަތު ހިމްނާ ހަަސަން އާއި އާމިނަތު ލަޔާނާ މުހައްމަދު، 400 މީޓަރު ދުވުމުގެ ފައިނަލުގައި ވާދަކުރަން ފުރުސަތު ލިބުނުއިރު، 100 މީޓަރު ދުވުމުގައި ރާއްޖޭގެ ސްޕްރިންޓަރު، އިބާދުﷲ އާދަމް ކުރިއެރުން ހޯދައިފި އެވެ.
ލަޔާނާ އާއި ހިމްނާ ވާދަކުރި 400 މީޓަރު ދުވުމުގައި ދެ ހީޓް ކުރިއަށްދިޔައިރު، ޖުމްލަ ދުވީ ނުވަ ދުވުންތެރިންނެވެ. ފުރަތަމަ ހީޓުގައި ހިމްނާ ވާދަކުރީ ބަހްރޭނާއި މޮރޮކޯ އަދި އުޒްބެކިސްތާންގެ ދުވުންތެރިން ހިމެނޭގޮތަށް ޖުމްލަ ހަތަރު ދުވުންތެރިންނެވެ.
ފުރަތަމަ ހީޓުގެ ހަތަރު ވަނަ އަށް ހިމްނާ ދިޔައިރު، ޓައިމިން އަކީ 57.99 ސިކުންތެވެ. މި ހީޓުގެ އެއް ވަނަ އަށް ދިޔަ ބަހްރޭންގެ މުބާރަކްގެ ޓައިމިން އަކީ 52.41 ސިކުންތެވެ.
400 މީޓަރު ދުވުމުގައި ރާއްޖޭގެ ހިމްނާ ވާދަކުރަނީ.-- ފޮޓޯ: މޯލްޑިވްސް އޮލިމްޕިކް ކޮމިޓީ/ އިސްމާއިލް ތޯރިގު
ދެ ވަނަ ހީޓުގައި ފުރަތަމަ އޮތީ ފަސް ދުވުންތެރިން ވާދަކުރާ ގޮތަށެވެ. އެކަމަކު، ނައިޖީރިއާގެ ދުވުންތެރިޔާ ބައިވެރިނުވުމުން، ފައިނަލުގައި ވާދަކުރުމުގެ ފުރުސަތު މި އިވެންޓްގައި ވާދަކުރި ހުރިހާ އެތުލީޓުންނަށް ލިބުނީ އެވެ. ހީޓް ދޭއްގައި ވާދަކުރި ލަޔާނާގެ ޓައިމިން އަކީ 59.79 ސިކުންތެވެ. މި ހީޓްގެ އެއް ވަނަ ހޯދި އިންޑޮނީިޝިއާގެ ސާރީގެ ޓައިމިން އަކީ 54.23 ސިކުންތެވެ.
ހަތަރު ސަތޭކަ މީޓަރުގެ ފައިނަލް އޮތީ މާދަމާ އެވެ.
ރާއްޖޭގެ މަރިޔަމް އަލްހާ ހުސައިން، ވަނީ އިއްޔެ އޮތް 100 މީޓަރުގެ އަންހެނުންގެ ދުވުމުގައި ވާދަކޮށްފަ އެވެ. އޭނާ ރޭހުގެ ފަހަތުން ނިންމާލަން ޖެހުނުއިރު، ޓައިމިން އަކީ 12.28 ސިކުންތެވެ. އަދި ރާއްޖޭގެ ނޫރާ އަބްދުލް ހަމީދު ވަނީ ލޯންޖް ޖަޕްމް އިވެންޓްގައި ވާދަކޮށްފަ އެވެ.
އިބާދުﷲ އަށް ކުރިއެރުމެއް
އިއްޔެ ބޭއްވި 100 މީޓަރު ދުވުމުގައި ރާއްޖޭގެ އިބާދުﷲ ވާދަކުރީ ހީޓް ފަހެއްގަ އެވެ. އޭނާ ހީޓުގެ ހަ ވަނަ އަށް ދިޔައިރު ޓައިމިން އަކީ 10.54 ސިކުންތެވެ. މިއީ އިބާދުﷲގެ އަމިއްލަ ޓައިމިންގެ ރެކޯޑްތަކަށް ބަލާއިރު، އެންމެ ރަނގަޅު ވަގުތެވެ. މީގެ ކުރިިން ރާއްޖޭގެ ދުވުމުގެ 100 މީޓަރުގެ ޖޫނިއާ ރެކޯޑް މުގުރާލި އިބާދުﷲ އަކީ މިހާރު ރާއްޖޭގައި ކުރިއެރުން ހޯދަމުން އަންނަ ސްޕްރިންޓަރެވެ.
އިބާދުﷲ ވާދަކުރި އިވެންޓްގެ އެއް ވަނަ ހޯދީ 9.88 ސިކުންތުން ރޭސް ނިންމި އީރާންގެ ތަފްތިއާން އެވެ. އިބާދުﷲ އަކީ މުސްތަގުބަލަށް އެތުލެޓިކްސް އެސޯސިއޭޝަނުން ޓާގެޓްތަކެއް ކަނޑައަޅައިގެން ކުރިއަށްގެންދާ އެތުލީޓެކެވެ.
މި ފަހަރުގެ ސޮލިޑާރިޓީ ގޭމްސްގެ 100 މީޓަރުގެ ދުވުމުގައި އޭނާ އަށް ލިބުނު ކުރިއެރުން ރަނގަޅު ޓްރެކުގައި ކުރިއަށްގެންދަން މަސައްކަތް ކޮށްފިނަމަ އޭގެ ނަތީޖާ އިތުރަށް ރަނގަޅުކުރެވޭނެ އެވެ.
100 މީޓަރު ދުވުމުގައި ރާއްޖޭގެ ސާއިދު (ވ) ވާދަކުރަނީ.--- ފޮޓޯ: މޯލްޑިވްސް އޮލިމްޕިކް ކޮމިޓީ/ އިސްމާއިލް ތޯރިގު
ރާއްޖޭގެ އެންމެ ބާރު ދުވުންތެރިޔާ، ހަސަން ސާއިދު ވަނީ އިއްޔެ 100 މީޓަރު ދުވުމުގެ ހީޓް އެކެއްގައި ވާދަކޮށްފަ އެވެ. ސާއިދު ވެސް ހީޓުގެ ހަ ވަނަ ދިޔައިރު، އޭނާގެ ޓައިމިން އަކީ 10.60 ސިކުންތެވެ. ސާއިދު ވާދަކުރި ރޭހުގެ އެއް ވަނަ ހޯދީ ބަހްރޭންގެ ރާޝިދު އެވެ. އޭނާގެ ޓައިމިން އަކީ 10.27 ސިކުންތެވެ.
ސާއިދަކީ އިސްލާމިކް ސޮލިޑާރިޓީ ގޭމްސްގެ ތާރީހަށް ބަލާނަމަ ރާއްޖޭގެ އެންމެ ކާމިޔާބު އެތުލީޓެވެ. އޭނާ ވަނީ އެންމެ ފަހުން، 2017 ވަނަ އަހަރު އަޒަރުބައިޖާނުގެ ބަކޫގައި ބޭއްވި ސޮލިޑާރިޓީ ގޭމްސްގައި 100 މީޓަރާއި 200 މީޓަރު ދުވުމުގައި ވެސް ފައިނަލަށް ދަތުރުކޮށްފަ އެވެ.
އެ ފަހަރު 100 މީޓަރު ދުވުމުން ސާއިދު ވަނީ އިސްލާމިކް ސޮލިޑާރިޓީ ގޭމްސްގައި ވާދަކުުރުމުގެ ފުރުސަތު ލިބިފައިވާ 57 ގައުމުގެ ދުވުންތެރިންގެ ތެރެއިން ހަތަރު ވަނަ ހޯދައިފަ އެވެ.
800 މީޓަރު ދުވުމުގައި ރާއްޖޭގެ ކުޑަ ރިޒާ ވާދަކުރަނީ.--- ފޮޓޯ: މޯލްޑިވްސް އޮލިމްޕިކް ކޮމިޓީ/ އިސްމާއިލް ތޯރިގު
ސާއިދަށް މި ފަހަރުގެ ސޮލިޑާރިޓީ ގޭމްސްގައި ދެން އޮތީ، މާދަމާ ވާދަކުރަން ޖެހޭ 200 މީޓަރު ދުވުމެވެ.
އިއްޔެ، ރާއްޖޭގެ ހުސައިން ރިޒާ (ކުޑަރިޒާ) ވަނީ ސޮލިޑާރިޓީ ގޭމްސްގެ 800 މީޓަރު ދުވުމުގައި ވާދަކޮށްފަ އެވެ. އެ ގޮތުން ސޮލިޑާރިީޓީ ގޭމްސްގެ 800 މީޓަރު ދުވުމުގެ ހީޓް އެކެއްގައި ހަތް ދުވުންތެރިން ވާދަކުރަން އޮތް ނަމަވެސް ދުވީ ފަސް ދުވުންތެރިންނެވެ. ރިޒާ ފަސް ވަނަ ދިޔައިރު، ޓައިމިން އަކީ 1:58.25 އެވެ. އަދި މި ހީޓް ކާމިޔާބުކުރި ސޯމާލިއާގެ ހަސަން ރޭސް ނިންމީ 1:49.04 އިންނެވެ.
