ވޮޝިންޓަން، އެމެރިކާ (އޯގަސްޓް 8) - ވޯލްޑް ބޭންކް މެދުވެރިވެރިކޮށް އެމެރިކާއިން ފޯރުކޮށްދޭ އެހީގެ ގޮތުގައި އިތުރު 4.5 ބިލިއަން ޑޮލަރު ޔޫކްރެއިނަށް ކަނޑައަޅައިފި އެވެ.
ވޯލްޑް ބޭންކުން ނެރުނު ބަޔާނުގައި ބުނީ އެ ފައިސާ ބޭނުން ކުރާނީ ޔޫކްރެއިން ސަރުކާރުގެ ހިދުމަތްތަކާއި ޕެންޝަަން ފޯރުކޮށްދިނުމަށް ކަމަށެވެ.
"ރަޝިއާގެ އަނިޔާވެރިކަމާ ދެކޮޅަށް ޑިމޮކްރަސީ ދިފާއު ކުރުމަށް ޔޫކްރެއިން ރައްޔިތުން ކުރާ މަސައްކަތަކަށް މި އިގްތިސާދީ އެހީ ވަރަށް މުހިއްމު،" އެމެރިކާގެ ޓްރެޝަރީ ސެކެޓްރީ ޖެނެޓް ޔެލެން ވިދާޅުވި އެވެ.
އެމެރިކާއިން ޖުމްލަ 8.5 ބިލިއަން ޑޮލަރުގެ އެހީ ޔޫކްރެއިނަށް ކަނޑައަޅާފައިވާ އިރު، އާދީއްތަ ދުވަހު ވޯލްޑް ބޭންކް މެދުވެރިކޮށް އިއުލާން ކުރި 4.5 ބިލިއަން ޑޮލަރު ދޭނީ އޯގަސްޓް މަހުގެ ތެރޭގަަ އެވެ.
"ޔޫކްރެއިންގެ ދިރިއުޅުމުގެ ހާލަތާއި ފަގީރުކަން އިތުރަށް ގޯސްވިޔަ ނުދިނުމަށް ހުއްޓުމެއް ނެތި ސަރުކާރުގެ ހިދުމަތްތައް ލިބެން ޖެހޭނެ،" ވޯލްޑް ބޭންކްގެ ރައީސް ޑޭވިޑް މެލްޕާސް ވިދާޅުވި އެވެ.
ޔޫކްރެއިންގެ ބަޖެޓް ޑެފިސިޓް ކޮންމެ މަހަކު ވެސް ފަސް ބިލިއަން ޑޮލަރުން އިތުރުވަމުންދާ އިރު، ހުޅަނގުގެ ގައުމުތަކުން އަންނަނީ އެހީތެރިކަން ފޯރުކޮށްދެމުންނެވެ.
ޖީ7 އަދި އީޔޫއިން ވެސް ވަނީ 29.6 ބިލިއަން ޑޮލަރުގެ އެހީ ކުރިއަަށް އޮތް ތަނުގައި ފޯރުކޮށްދޭނެ ކަމަަށް އިއުލާނުކޮށްފަ އެވެ.
