ބާސެލޯނާ (އޮގަސްޓް 8) - ބާސެލޯނާ އަށް ކުޅެމުންދާ ނެދަލޭންޑްސްގެ މިޑްފީލްޑަރު ފްރެންކީ ޑި ޔޯން ގެންދަން މެންޗެސްޓާ ޔުނައިޓަޑުން މަސައްކަތް ކުރިޔަސް، އޭނާ ބޭނުންވަނީ ބާސެލޯނާގައި މަޑުކުރަން ކަމަށް އެ ކްލަބްގެ ރައީސް ހުއާން ލަޕޯޓާ ބުނެފި އެވެ.
ޓްރާންސްފާ ބާޒާރުގައި ޔުނައިޓަޑްގެ ކޯޗު ޓެން ހާގް އެންމެ ބޭނުންވާ އެއް ކުޅުންތެރިޔަކީ އޭނައާ އެކު އަޔަކްސްގައި މަސައްކަތްކުރި ޑި ޔޯން އެވެ.
ޑި ޔޯން، 25، ގެ ޓްރާންސްފާ އަށް ޔުނައިޓަޑުން ހުށަހެޅި 63.5 މިލިއަން ޕައުންޑް (70 މިލިއަން ޑޮލަރު)ގެ ޓްރާންސްފާ ފީ ބާސެލޯނާ އިން ވަނީ މިދިޔަ މަހު ގަބޫލުކޮށްފަ އެވެ. އެހެން ނަމަވެސް، ޓްރާންސްފާ އޮތީ މަޑުޖެހިފަ އެވެ.
ބާސެލޯނާގެ ރައީސް ލަޕޯޓާ ވިދާޅުވީ ޑި ޔޯން ހުށަހެޅުންތައް ލިބިފައި އޮތް ނަމަވެސް އޭނާ ބޭނުންވަނީ ބާސެލޯނާގައި މަޑުކުރަން ކަމަށެވެ.
"ޑި ޔޯން އަކީ ވަރަށް ފެންވަރު ރަނގަޅު ކުޅުންތެރިއެއް. އޭނާ އަށް ހުށަހެޅުންތައް ވަނީ ލިބިފައި. އެކަމަކު، އޭނާ ބޭނުންވަނީ ބާސާގައި މަޑުކުރަން. ބާސެލޯނާ އިން ވެސް ބޭނުންވަނީ އެގޮތް،" ލަޕޯޓާ ވިދާޅުވި އެވެ.
ރިޕޯޓްތައް ބުނާގޮތުގައި ޑި ޔޯން ބާސެލޯނާގައި މަޑުކުރިޔަސް މާލީ ގޮތުން މައްސަލަތަކެއް ދިމާވެފައިވާ ބާސެލޯނާ އިން އޭނާގެ މުސާރަ ކުޑަކުރަން ބޭނުންވެ އެވެ. އަދި މުސާރަ އާއި ބޯނަސްގެ ގޮތުގައި ބާސެލޯނާ އިން ޑި ޔޯން އަށް ދޭންޖެހޭ ފައިސާއާ ގުޅިގެން، އޭނާ އާއި ބާސެލޯނާއާ ދެމެދު ދެބަސްވުންތަކެއް އުފެދިފައިވެ އެވެ.
ސްޕެއިނުގެ މީޑިއާތަކުން ބުނާގޮތުގައި ބާސެލޯނާގެ ހުށަހެޅުމަކީ ޑި ޔޯން އެންމެ ފުރަތަމަ ބާސެލޯނާ އިން ދޭ އެއްބަސްވި މުސާރައާ އެއްގޮތަށް ކޮންޓްރެކްޓް ބަދަލުކުރުމެވެ. އިނގިރޭސި މީޑިއާ ރިޕޯޓްތައް ބުނާގޮތުން ޔުނައިޓެޑުން އެންމެ ފަހުން ޑި ޔޯންގެ އޭޖެންޓަށް ހުށަހެޅި ޕްރޮޕޯސަލަކީ ބާސެލޯނާ އިން ކޮވިޑާ ހެދި އުނިކުރި ޑި ޔޯންގެ މުސާރަ ޔުނައިޓެޑުން ހަމަޖައްސައިދޭ ގޮތަށް އެ ޓީމާ ގުޅުމަށެެވެ.
