އެމެރިކާގެ ހައުސް އޮފް ރެޕްރެޒެންޓޭޓިވްސްގެ ރައީސް ނޭންސީ ޕެލޯސީ ބުދަ ދުވަހުގެ ހެނދުނު ޓައިވާންގެ ރައީސް ސާއި އިންގް ވެންއާ ބައްދަލުކުރައްވައިފި އެވެ.
ޕެލޯސީއަކީ ފާއިތުވި 25 އަހަރުގެ ތެރޭގައި ޓައިވާނަށް ދަތުރު ކުރެއްވި އެމެރިކާގެ އެންމެ އިސް އޮފިޝަލެވެ. ޗައިނާއިން ވަނީ އެ ދަތުރު ކުށްވެރިކޮށްފަ އެވެ.
އަންގާރަަ ދުވަހުގެ ރޭ ޓައިވާނަށް ބޯޓު ޖެއްސުމާ އެކު ކުރެއްވި ޓްވީޓުތަކެއްގައި ޕެލޯސީ ވިދާޅުވީ އެމެރިކާ ވަފުދުގެ ދަތުރުން ރަމްޒުކޮށްދެނީ ޓައިވާނުގެ ޑިމޮކްރަސީއަށް އޮތް ފުރިހަމަ ތާއީދު ކަމަށެވެ.
އޭގެ ކުރިން ޗައިނާއިން ބުނީ ޕެލޯސީގެ ދަތުރާ ގުޅިގެން އެމެރިކާއިން "އަގު އަދާ ކުރަން ޖެހޭނެ" ކަމަށެވެ.
ޗައިނާއިން ދެކޭ ގޮތުގައި ޓައިވާނަކީ ޗައިނާގެ ސަަރުކާރާ ވަކިވެގަނެގެން އުޅޭ ޕްރޮވިންސެކެވެ. އެކަމަކު ޓަައިވާން ސަރުކާރުން ބުނަނީ އެއީ މިނިވަން ދައުލަތެއް ކަމަށެވެ.
"އަބަދުވެސް ޓައިވާނާ އެކު ތެދުވުމަށް އެމެރިކާއިން ވައުދުވީ މީގެ 43 އަހަރު ކުރިން. މިއަދު އަޅުގަނޑުމެންގެ ވަފުދު ޓައިވާނަށް މި އައީ އެ ވައުދާ އެއް ގޮތަށް އަމަލު ކުރާނެކަން ދެއްކުމަށް،" ޕެލޯސީ ވިދާޅުވި އެވެ.
އެމެރިކާއިން "ހަރުދަނާ، ނުރަސްމީ ގުޅުން" ޓައިވާނާ އެކު ބާއްވާ އިރު، ރަސްމީކޮށް ޑިޕްލޮމެޓިކް ގުޅުން އޮންނަނީ ޗައިނާއާ އެކު އެވެ.
ނަަމަވެސް އެމެރިކާއިން ޓައިވާނަަށް ހަތިޔާރު ވިއްކަ އެވެ. އެއީ ޗައިނާގެ ހަމަލާއަކުން ދިފާއުވުމުގެ ހައްގު ދިނުމަށް ކަމަށް ބުނެ އެވެ.
ޓައިވާންގެ ރައީސް އޮފީހުގައި ސާއީއާ ބަައްދަލުކުރައްވައި ޕެލޯސީ ވިދާޅުވީ ޓައިވާނަކީ "މިނިވަން ކަމަށް ލޯބި ކުރާ ހުރިހާ އެންމެންނަށް ބޮޑު ހިތްވަރެއް" ކަމަށެވެ.
ސާއީ ވިދާޅުވީ ޓައިވާން ދެމިއޮންނާނީ އެމެރިކާއަށް "އިތުބާރު ކުރެވޭ އަދި ބަރޯސާވެވޭ" ބައިވެރިއެއްގެ ގޮތުގައި ކަމަށާއި "ބިރު ދެއްކި ނަމަވެސް ފަހަތަށް ނުޖެހޭނެ" ކަމަށެވެ.
ޕެލޯސީގެ ދަތުރާ ގުޅިގެން ޗައިނާއިން ބުނީ ބުދަ ދުވަހުން ފެށިގެން ތިން ދުވަސް ވަންދެން ޓައިވާން ކައިރީގައި ލައިވް ވަޒަން ބޭނުންކޮށްގެން އަސްކަރީ އޮޕަރޭޝަނެއް ހިންގާނެ ކަމަށެވެ.
