އެމެރިކާގެ ހައުސް އޮފް ރެޕްރެޒެންޓޭޓިވްސްގެ ރައީސް ނޭންސީ ޕެލޯސީ ޓައިވާނަށް ކުރެއްވި ދަތުރު "އިންތިހާއަށް ނުރައްކާތެރި" ކަމަށާއި ޕެލޯސީ "އަލިފާނާ ކުޅެމުންދާ" ކަމަށް ޗައިނާއިން ބުނެފި އެވެ.
ޕެލޯސީއަކީ ފާއިތުވި 25 އަހަރުގެ ތެރޭގައި ޓައިވާނަށް ދަތުރު ކުރެއްވި އެމެރިކާގެ އެންމެ އިސް އޮފިޝަލެކެވެ. ޗައިނާއިން ތުހުމަތު ކުރީ އެކަމަނާ އަލިފާނާ ކުޅެމުންދާ ކަމަށެވެ.
"އަލިފާނާ ކުޅެމުންދާ މީހުން ނެތި ދާނީ އަނދައިގެން،" އަންގާރަ ދުވަހުގެ ރޭ ޕެލޯސީ ޓައިވާނަށް ވަޑައިގެންނެވުމުން ޗައިނާ ސަރުކާރުން ނެރުނު ބަޔާނުގައި ބުންޏެވެ.
ޓައިވާނަށް ބޯޓު ޖެއްސުމާ އެކު ކުރެއްވި ޓްވީޓުތަކެއްގައި ޕެލޯސީ ވިދާޅުވީ އެމެރިކާ ވަފުދުގެ ދަތުރުން ރަމްޒުކޮށްދެނީ ޓައިވާނުގެ ޑިމޮކްރަސީއަށް އޮތް ފުރިހަމަ ތާއީދު ކަމަށެވެ.
ޗައިނާގެ ދައުލަތުގެ މީޑިއާއިން ބުނީ އެކަމަނާގެ ދަަތުރު ކުރި ބޯޓު ޖެއްސި ވަގުތު، ޗައިނާގެ ޖެޓުތައް ޓައިވާނު ސްޓްރެއިޓުން ދަތުރު ކުރި ކަމަށެވެ. އެކަމަކު ޓައިވާނުން އެކަން ދޮގުކުރެ އެވެ.
ޗައިނާއިން ދެކޭ ގޮތުގައި ޓައިވާނަކީ ޗައިނާގެ ސަަރުކާރާ ވަކިވެގަނެގެން އުޅޭ ޕްރޮވިންސެކެވެ. އެކަމަކު ޓަައިވާން ސަރުކާރުން ބުނަނީ އެއީ މިނިވަން ދައުލަތެއް ކަމަށެވެ.
ޕެލޯސީގެ ދަތުރާ ގުޅިގެން ޗައިނާއިން ބުނީ ބުދަ ދުވަހުން ފެށިގެން ތިން ދުވަސް ވަންދެން ޓައިވާން ކައިރީގައި ލައިވް ވަޒަން ބޭނުންކޮށްގެން އަސްކަރީ އޮޕަރޭޝަނެއް ހިންގާނެ ކަމަށެވެ.
