ޗައިނާގެ އިންޒާރުތަކަށް ބެލުމެއް ނެތި، އެމެރިކާގެ ހައުސް އޮފް ރެޕްރެޒެންޓޭޓިވްސްގެ ރައީސް ނޭންސީ ޕެލޯސީ އަންގާރަ ދުވަހުގެ ރޭ ޓައިވާނަށް ވަޑައިގެންފި އެވެ.
އެކަމަނާ ދަތުރު ކުރެއްވި މަތިންދާ ބޯޓު ޓައިވާނަށް ޖެއްސީ އަންގާރަ ދުވަހުގެ ރޭގަ އެވެ. މިއީ 25 އަހަރުގެ ތެރޭގައި ޓައިވާނަށް ވަޑައިގެންނެވި އެމެރިކާގެ އެންމެ އިސް އޮފިޝަލެވެ.
ޓައިވާނަށް ބޯޓު ޖެއްސުމާ އެކު ކުރެއްވި ޓްވީޓުތަކެއްގައި ޕެލޯސީ ވިދާޅުވީ އެމެރިކާ ވަފުދުގެ ދަތުރުން ރަމްޒުކޮށްދެނީ ޓައިވާނުގެ ޑިމޮކްރަސީއަށް އޮތް ފުރިހަމަ ތާއީދު ކަމަށެވެ.
ރިޕޯޓުތައް ބުނާ ގޮތުން ޕެލޯސީ މަޑު ކުރެއްވުމަށް ހަމަޖެހިފައިވާ ޓައިޕޭގެ ގްރޭންޑް ހަޔަަޓް ހޮޓަލުގެ ބޭރުގައި ޓައިވާނުގެ ބައެއް މީހުން މުޒާހަރާ ކުރި އެވެ.
ޓައިވާނުގެ ނޫސްތަކުން ބުނީ ޕެލޯސީ އެ ގައުމުގެ ރައީސް ސާއި އިން ވެންއާ ބައްދަލުކުރައްވާނީ ބުދަ ދުވަހުގެ ހެނދުނު ކަމަށެވެ. އޭގެ ފަހުން ޓައިވާނުގެ ޕާލިމެންޓާއި އިންސާނީ ހައްގުތަކާ ބެހޭ މިޔުޒިއަމަށް ވަޑައިގަންނަވާނެ އެވެ.
ޕެލޯސީގެ ދަތުރާ ގުޅިގެން ޗައިނާއިން ބުނީ ބުދަ ދުވަހުން ފެށިގެން ތިން ދުވަސް ވަންދެން ޓައިވާން ކައިރީގައި ލައިވް ވަޒަން ބޭނުންކޮށްގެން އަސްކަރީ އޮޕަރޭޝަނެއް ހިންގާނެ ކަމަށެވެ.
