އެމެރިކާގެ ހައުސް އޮފް ރެޕްރެޒެންޓޭޓިވްސްގެ ރައީސް ނޭންސީ ޕެލޯސީ ޓައިވާނަށް ވަޑައިގެންފި ނަމަ ޗަައިނާއިން ބާރުގެ ބޭނުން ކުރުމުގެ ފުރުސަތު ބޮޑު ކަމަށް ވައިޓް ހައުސްއިން ބުނެފި އެވެ.
ވައިޓް ހައުސްގެ ތަރުޖަމާނު ޖޯން ކާބީ ވިދާޅުވީ ޓައިވާން ކައިރިން މިސައިލް ފޮނުވުމާއި ބޮޑު ސްކޭލެއްގައި ކަނޑުގެ އަދި ވައިގެ އަސްކަރީ ހަރަކާތްތައް ޗައިނާއިން ހިންގާނެ ކަމަށް ބެލެވެ އެވެ.
ޕެލޯސީ އާއި ކޮންގްރެސްގެ ވަފުދު އޭޝިއާއަށް ކުރައްވާ ދަތުރުގައި އަންގާރަ ދުވަހު ވަޑައިގެންނެވީ މެލޭޝިއާ އަށެވެ.
ޓައިވާން އާއި އެމެރިކާގެ ނޫސްތަކުން ބުނާ ގޮތުގައި ޓައިޕޭއަށް އެކަމަނާ ވަޑައިގަންނަވާނީ އަންގާރަ ދުވަހުގެ ރެ އެވެ. އެހެން ނަމަވެސް ރަސްމީކޮށް އެކަން އިއުލާނުކޮށްފައެއް ނުވެ އެވެ.
ނޫސްވެރިންގެ ސުވާލުތަކާ ގުޅިގެން ޓައިވާނުގެ ޕްރިމިއާ ސޫ ސެންގް ޗަންގް އަންގާރަ ދުވަހު ވިދާޅުވީ ޓައިވާނުން ބޭރުގެ ހުރިހާ އިއްޒަތްތެރިންނަށް ވެސް "ހޫނު މަރުހަބާއެއް ކިޔާނެ" ކަމަށެވެ.
ޑިމޮކްރެޓިކް އުސޫލުން އަމިއްލަ ސަރުކާރެއް އޮތް ނަމަވެސް، ޗައިނާއިން ދެކޭ ގޮތުގައި ޓައިވާނަކީ އެ ގައުމުގެ ބަޔެކެވެ. ނަމަވެސް ޓައިވާނުން ދެކެނީ އެއީ މިނިވަން ދައުލަތެއް ކަމަށެވެ.
ޕެލޯސީ ޓައިވާނަަށް ވަޑައިގެންފި ނަމަ "ނަތީޖާ ސީރިއަސް ވާނެ" ކަމަށް މީގެ ކުރިން ޗައިނާއިން އިންޒާރު ދިނެވެ.
ޗައިނާއިން އދ. އަށް ކަނޑައަޅާފައި ހުންނަ މަންދޫބު ޒާންގް ޖުން މިދިޔަ ހޯމަ ދުވަހު ވިދާޅުވީ، ޕެލޯސީ ޓައިވާނަށް ދަތުރު ކުރައްވައިފި ނަމަ ޗައިނާ އާއި އެމެރިކާގެ ގުޅުމަށް ވަރަށް ނޭދެވޭ އަސަރު ކުރާނެ ކަމަށެވެ.
ޕެލޯސީ އޭޝިއާއަށް ކުރައްވާ ދަތުރު ފެއްޓެވީ އާދީއްތަ ދުވަަހު ސިންގަޕޫރުންނެވެ. މެލޭޝިއާގެ އިތުރުން ދެކުނު ކޮރެއާ އަދި ޖަޕާނަށް ދަތުރު ކުރައްވަން ވެސް ހަމަޖެހިފައިވެ އެވެ.
ޕެލޯސީ ޓައިވާނަށް ވަަޑައިގަންނަވަން އުޅޭކަމުގެ އަޑު ފެތުރޭތާާ އެތައް ދުވަހެއް ވެފައިވާ އިރު، އެކަމާ ގުޅޭ ގޮތުން އެކަމަނާ މިހާތަނަށް އެއްވެސް އެއްޗެއް ވިދާޅެއް ނުވެ އެވެ.
ޕެލޯސީ ކުރިން ނިންމެވީ މި އަހަރުގެ އެޕްރީލް މަހު ޓައިވާނަށް ދަތުރު ކުރެއްވުމަށެވެ. ނަމަވެސް، އެ ޝެޑިއުލް ބަދަލު ކުރެއްވީ ކޮވިޑަށް ޕޮޒިޓިވްވުމުންނެވެ.
އެމެރިކާގެ ކޮންގްރެސްގައި ޕެލޯސީ 30 އަހަރަށް ވުރެ ދިގު މުއްދަތެއް ހޭދަކޮށްފައިވާ އިރު، އެކަމަނާއަކީ ދެގޮތެއް ނުވެ ޗައިނާއަށް އަބަދުވެސް ފާޑުކިޔުމުގައި ފާހަގަކުރެވޭ ސިޔާސީ ލީޑަރެކެވެ.
އެމެރިކާގެ ކޮންގްރެސްގައި މައި ދެ ޕާޓީއިން ވެސް ޓައިވާނުގެ މައްސަަލައިގައި އެއް ވިސްނުމެއް ގެންގުޅޭ އިރު، މިދިޔަ ހަފްތާގައި ޕެލޯސީ ވިދާޅުވީ "ޓައިވާނަށް އޮތް ތާއީދު ހާމަކުރުން މުހިންމު" ކަމަށެވެ.
