މިއަހަރުގެ ފުރަތަމަ ދެ ކުއާޓާގައި އެމްޓީސީސީއަށް 130 މިލިއަން ރުފިޔާގެ ފައިދާއެއް ލިބިފައިވާ ކަމަށް އެ ކުންފުނީގެ ރިޕޯޓުތަކުން ދައްކައިފި އެވެ.
އެމްޓީސީސީގެ ކުއާޓާލީ ރިޕޯޓުތަކުން ދައްކާ ގޮތުގައި މިއަހަރުގެ ފުރަތަމަ ކުއާޓާގައި، އެ ކުންފުންޏަށް ފައިދާގެ ގޮތުގައި ލިބުނީ 64 މިލިއަން ރުފިޔާ އެވެ. އަދި ދެވަނަ ކުއާޓާގައި ފައިދާގެ ގޮތުގައި 66 މިލިއަން ރުފިޔާ ލިބިފައި ވެއެވެ. އެއާއެކު އެމްޓީސީސީގެ ދެ ކުއާޓާގެ ޖުމްލަ ފައިދާ 130 މިލިއަނަށް އަރަ އެވެ.
މިއަހަރުގެ ފުރަތަމަ ދެ ކުއާޓާގައި އެމްޓީސީސީއަށް އާމްދަނީގެ ގޮތުގައި ވެސް ވަނީ 1.1 ބިލިއަން ރުފިޔާ ލިބިފަ އެވެ. އެއީ ފުރަތަމަ ކުއާޓާގައި ލިބުނު 550 މިލިއަން ރުފިޔާއާއި ދެވަނަ ކުއާޓާގަިއ ލިބުނު 593 މިލިއަން ރުފިޔާ އެވެ.
މިއަހަރުގެ ދެވަނަ ކުއާޓާގެ ރިޕޯޓުން ދައްކާ ގޮތުގައި އެމްޓީސީސީއަށް އެންމެ ބޮޑު ފައިދާއެއް ކުރަނީ ކޮންޓްރެކްޓިން އާއު، ޓްރޭޑިންގެ އިތުރުން ޑްރެޖިން އިންނެވެ. ހަމައެއާއެކު އެމްޓީސީސީއަށް އެންމެ މަދުން އާމްދަނީ ލިބެނީ އެ ކުންފުނީގެ ދަތުރުފަތުރުގެ ވިއުގައިންކަން ވެސް ފާހަގަކޮށްލެވެ އެވެ.
ފުރަތަމަ ކުއާޓާ ނިންމާލިއިރު، އެމްޓީސީސީގެ ދަތުރުފަތުރުގެ ވިއުގަ އޮތީ ހަތަރު މިލިއަން ރުފިޔާގެ ގެއްލުމެއްގަ އެވެ. ނަމަވެސް ދެވަނަ ކުއާޓާގައި އާމްދަނީ އިތުރުވެ، ފަސް ލައްކަ ރުފިޔާގެ ފައިދާއެއް ލިބިފައި ވެއެވެ.
މިއަހަރުގެ ފުރަތަމަ ހަ މަސް ތެރޭގައި އެމްޓީސީސީއަށް ފައިދާގެ ގޮތުގައި 130 މިލިއަން ރުފިޔާ ލިބުނުއިރު، އެ ކުންފުނިން އަމާޒު ހިފާފައި ވަނީ މިއަހަރުގެ ޖުމްލަ ފައިދާގެ ގޮތުގައި 300 މިލިއަން ރުފިޔާ ހޯދުމަށެވެ. މިދިޔަ އަހަރު އެ ކުންފުނީގެ ޖުމްލަ ފައިދާ 271 މިލިއަން ރުފިޔާއަށް އަރާއިރު، އެއީ އެ ކުންފުނީގެ ތާރީހުގައި ހޯދި އެންމެ ބޮޑު ފައިދާ ކަމަށް އެމްޓީސީސީން ބުނެ އެވެ.
