އެމެރިކާއިން ސްޕޮންސާކޮށްގެން މެދުއިރުމަަތީގައި ހިންގާ އިގްތިސާދީ މަޝްރޫއުތަކުގައި ފަލަސްތީނުގެ ބައިވެރިވުން އޮންނަން ޖެހޭނެ ކަމަށް އުރުދުންގެ ރަސްގެފާނު އަބްދުﷲ ވިދާޅުވެއްޖެ އެވެ.
ރަސްގެފާނު އެގޮތަށް ވިދާޅުވީ އައްމާންގައި އިޒްރޭލުގެ ބޮޑު ވަޒީރު ޔެއާ ލެޕީދްއާ ބައްދަލުކުރެއްވުމަށް ފަަހު އެވެ. މިއީ އެމެރިކާގެ ރައީސް ޖޯ ބައިޑެން މެދުއިރުމައްޗަށް ދަތުރު ކުރެއްވި ފަަހުން ރަސްގެފާން އަބްދުﷲ އާއި ލެޕީދްގެ ފުރަތަމަ ބައްދަލުވުމެވެ.
ރަސްގެފާނު ވިދާޅުވީ އަރަބިންނާއި އިޒްރޭލްގެ ޔަހޫދީންނާ ދެމެދު ދެމެހެއްޓެނިވި ސުލްހަ ގާއިމް ކުރުމަށް ފަލަސްތީނުގެ ވަކި ދައުލަތެއް ގާއިމްކުރުން މުހިއްމު ކަމަށެވެ.
އިޒްރޭލުގެ ބޮޑު ވަޒީރުގެ އޮފީހުން ނެރުނު ބަޔާނެއްގައި ބުނީ ދެ ބޭފުޅުން މަޝްވަރާ ކުރެއްވީ ސަރަހަައްދީ ބަދަލުތަކާއި ހަކަތަ އާއި ފަތުރުވެރިކަން، ކާބޯތަކެތީގެ ރައްކާތެރިކަން އަދި ދަނޑުވެރިކަމުގައި ގުޅިގެން ކުރިއަށް ދެވޭނެ ގޮތްތަކާ މެދު ކަމަށެވެ.
އިޒްރޭލާއި އުރުދުންއިން ސުލްހަަ ގާއިމް ކުރީ 1994 ވަނަ އަހަރު އެވެ. ދެ ގައުމުގެ ގުޅުން ރަނގަަޅު ނަމަވެސް ގުދުސްގެ އަލް އަގްސާ މިސްކިތުގައި ހިނގާ ހަމަނުޖެހުންތަކުގެ މައްސަލައިގައި އުރުދުންއިން ތަކުރާާރުކޮށް ނުރުހުން ފާޅުކޮށްފައިވެ އެވެ.
