އެސްޓްރޮނޯޓް ބަޒް އެލްޑްރިން ހަނދަށް ކުރި ދަތުރުގައި ލައިގެން ހުރި ޖެކެޓް 2.8 މިލިއަން ޑޮލަރަށް ވިއްކާލައިފި އެވެ.
އެ ޖެކެޓުގައި އެމެރިކާގެ ދިދަ އާއި ނާސާގެ ލޯގޯ ހަރުކޮށްފައިވެ އެވެ. އެއީ އެޕޯލޯ 11 ގެ ކޮމާންޑް މޮޑިއުލްގައި ޖައްވުން ދަތުރު ކުރި އިރު އެލްޑްރިން ލައިގެން ހުރި ޖެކެޓެވެ.
އުމުރުން 92 އަހަރުގެ އެލްޑްރިންގެ 69 އެއްޗެއް ނީލަމުގައި ވިއްކާލަން އޭނާ ނިންމާފައިވާ އިރު، ޖެކެޓު ހިމެނެނީ އެ ތަކެތީގެ ތެރޭގަ އެވެ.
މީގެ ކުރިން އެމެރިކާގެ ޖައްވީ މަސައްކަތާ ގުޅުން ހުރި ތާރީހީ އެއްޗެއް އެހާ ބޮޑު އަގުގައި ވިއްކާލާފައެއް ނުވެ އެވެ.
ބަޒް އެލްޑްރިން ހަނދަށް ދަތުރު ކުރީ 1969 ވަނަ އަހަރު އެވެ. ހަނދަށް ދިޔަ ޓީމުގެ ތިން މެމްބަރުންގެ ތެރެއިން މިހާރު ދުނިޔޭގައި ދިރިހުރީ އޭނާ އެކަންޏެވެ.
ބަޒް އެލްޑްރިން 1969 ގައި ހަނދަށް ކުރި ދަތުރުގައި ޖެކެޓު ލައިގެން. -- ފޮޓޯ: ގެޓީ އިމޭޖާޒް
ހަނދަށް ކުރި ދަތުރުގައި ހޭދަވި ހަ ދުވަހުގެ މުއްދަތުގެ ބޮޑު ބަޔެއް އެލްޑްރިން ހޭދަކުރީ ހުދުކުލައިގެ ޖެކެޓު ލައިގެންނެވެ. އެ ޖެކެޓު ބަދަލު ކުރީ ހަނދުގެ ބިމަށް ފޭބުމުގެ ކުރިން ހާއްސަ ޕްރެޝާ ސޫޓެއް ލުމަށެވެ.
ބަޒް އެލްޑްރިން އާއި އިތުރު ދެ އެސްޓްރޮނޯޓުން ހަނދަށް ކުރި ދަތުރުގައި، ފުރަތަމަ ފަހަރަށް އިންސާނުން ހަނދުގެ ފަސްގަނޑަށް ފޭބި މަންޒަރު 650 މިލިއަން މީހުން ޓީވީ މެދުވެރިކޮށް ބެލި އެވެ.
އެލްޑްރިން އާއި ނީލް އާމްސްޓްރޯންގް ހަނދުގައި 21 ގަޑިއިރު ހޭދަ ކުރުމަށް ފަހު އެނބުރި އެޕޯލޯ 11 ގެ ކޮމާންޑް މޮޑިއުލަށް ގޮސް، ޕްރެޝަރު ސޫޓު ބާލައި ހުދު ޖެކެޓު ލި އެވެ.
އެ ޖެކެޓު ހަދާފައި ވަނީ އަލިފާން ނުހިފާ ބޭޓާ ފޮތިންނެވެ. އެ ޖެކެޓަށް ބިޑް ކުރުން 10 މިނެޓަށް ކުރިއަށް ދިޔަ އިރު، އޭތި ގަނެފައި ވަނީ ފޯނު މެދުވެރިކޮށް ބައިވެރިވި މީހެކެވެ.
