އެމެރިކާގެ ހައުސް އޮފް ރެޕްރެޒެންޓޭޓިވްސްގެ ރައީސް ނޭންސީ ޕެލޯސީ ޓައިވާނަށް ދަތުރު ކުރައްވަން ހަމަޖެހިފައިވާ ކަމުގެ އަޑުތައް ފެތުރުމާ އެކު ޗައިނާއިން ދަަނީ ހިތްހަމަނުޖެހުން ފާޅު ކުރަމުންނެވެ.
ޕެލޯސީ ޓައިވާނަށް ވަޑަައިގެންފި ނަމަ "ނަތީޖާ ސީރިއަސް ވާނެ" ކަމުގެ އިންޒާރު ޗައިނާއިން ދީފައިވެ އެވެ. ދަތުރައިގެން ކުރިއަށް ގޮސްފި ނަމަ ޕެލޯސީ ވާނީ 1997 ވަނަ އަހަރަށް ފަހު ޓައިވާނަށް ވަޑައިގެންނެވި އެމެރިކާގެ އެންމެ އިސް އޮފިޝަލަށެވެ.
ޗައިނާއިން ދެކޭ ގޮތުގައި ޓައިވާނަކީ އެ ގައުމުގެ ބަޔެކެވެ. އެކަމަކު ޓައިވާނުން ބުނަނީ އެއީ މިނިވަން ދައުލަތެއް ކަމަށެވެ. ޗައިނާގެ ބަޔެއްގެ ގޮތުގައި ޓައިވާން ބޭއްވުމަށް އަސްކަރީ ބާރު ބޭނުން ކުރަން ޖެހިއްޖެ ނަމަ ޗައިނާއިން އެކަަން ކުރާނެ ކަމަށް އެނެލިސްޓުން ދެކެ އެވެ.
ރިޕޯޓުތައް ބުނާ ގޮތުން ޕެލޯސީގެ ދަތުރާ ގުޅިގެން ޗައިނާ އެމެރިކާގެ ގުޅުން މިހާރަށް ވުރެ ގޯސްވެ، ޓައިވާނަށް އޮތް ނުރައްކާ ބޮޑު ވާނެ ކަމަށް ބެލެވޭތީ އެމެރިކާ ސަރުކާރުން ވެސް ކަންބޮޑުވެ އެވެ. އެހެންވެ، ޕެލޯސީގެ ހިޔާލު ބަދަލު ކުރަން މަޝްވަރާ ކުރާ ކަމަށް ވެ އެވެ.
މިދިޔަ ހަފްތާގައި ރައީސް ޖޯ ބައިޑެން ވިދާޅުވީ ޓައިވާނަށް ދަތުރު ކުރުމަކީ "ރަނގަޅު ވިސްނުމެއްގެ ގޮތުގަައި އަސްކަރިއްޔާއިން ނުދެކޭ" ކަމަށެވެ.
ސްޓޭޓް ޑިޕާޓްމަަންޓުން ބުނީ ޓައިވާނަށް ދަތުރު ކުރަން ނިންމެވިކަން ޕެލޯސީ މިހާތަނަށް އަންގަވާފައި ނުވާ ކަމަށެވެ. އަދި، ޓައިވާނާ މެދު އެމެރިކާގެ ސިޔާސަތު ބަދަލު ނުވާ ކަމަށް ވެސް ބުންޏެވެ.
އެމެރިކާއިން "ހަރުދަނާ، ނުރަސްމީ ގުޅުން" ޓައިވާނާ އެކު ބާއްވާ އިރު، ރަސްމީކޮށް ޑިޕްލޮމެޓިކް ގުޅުން އޮންނަނީ ޗައިނާއާ އެކު އެވެ.
ގާތްގަނޑަކަާށް 35 އަހަރަށް ދިގުދެމިގެން ގޮސްފައިވާ ސިޔާސީ ކެރިއަރުގައި ވެރިކަމުގައި އޮތް ޑިމޮކްރެޓިކް ޕާޓީއަަށް ނިސްބަތްވާ ޕެލޯސީ އަބަދުވެސް ފާހަގަވީ ޗައިނާއަށް ފާޑުކިޔުއްވާ ލީޑަރެއްގެ ގޮތުގަ އެވެ.
ޗައިނާގެ އިންސާނީ ހަައްގުތަކުގެ ރެކޯޑާ މެދު ކަންބޮޑުވުން ފާޅުކޮށް، ޑިމޮކްރަސީއަށް ތާއީދު ކުރާ ޗައިނާގެ އެކްޓިވިސްޓުންނާ ބައްދަލުކޮށް، ޗައިނާގެ ޓިއަނަންމެން މައިދާނަށް ވެސް ޕެލޯސީ ވަޑައިގެންނެވި އެވެ.
ކުރިން ޕެލޯސީ ނިންމެވީ މި އަހަރުގެ އެޕްރީލް މަހު ޓައިވާނަށް ދަތުރު ކުރެއްވުމަށެވެ. ނަމަވެސް، އެ ޝެޑިއުލް ބަދަލު ކުރެއްވީ ކޮވިޑަށް ޕޮޒިޓިވްވުމުންނެވެ.
ޓައިވާން ދަތުރާ ގުޅޭ ތަފްސީލް ހާމަކޮށްފައި ނުވާ އިރު، ޕެލޯސީ މިދިޔަ ހަފްތާގައި ވިދާޅުވީ "ޓައިވާނަށް އޮތް ތާއީދު ހާމަ ކުރުން މުހިއްމު" ކަމަށެވެ.
