ސްރީލަންކާގެ އާ ރައީސް ރަނިލް ވިކްރަމަސިންހަ އާއި ޖަޕާން ސަރުކާރާ ދެމެދު 2007 ވަނަ އަހަރު ކުރެވުނު މުއާމަލާތެއްގެ ތަފްސީލް ވިކިލީކްސްއިން އާއްމުކޮށްފި އެވެ.
އެ މުއާމަލާތާ ގުޅޭ ލިޔުމެއް ވިކިލީކްސްއިން އާއްމު ކުރި އިރު، ލަންކާގެ ޕާލަމެންޓުން މިދިޔަ ބުރާސްފަތި ދުވަހު ނެގި ވޯޓުން ރަނިލް ވަނީ އެ ގައުމުގެ އަށް ވަނަ ރައީސް ކަމަށް އިންތިހާބުވެވަޑައިގެންފަ އެވެ.
ވިކިލީކްސްއިން އާއްމު ކުރި ލިޔުމުގައިވާ ގޮތުން، 2007 ވަނަ އަހަރު ރަނިލް އިދިކޮޅު ލީޑަރުގެ ގޮތުގައި ހުންނެވި އިރު، ލަންކާއަށް އިގްތިސާދީ އެހީ ދިނުން މެދުކަނޑާލަން ޖަޕާން ސަރުކާރުގައި އެދިވަޑައިގެންނެވި އެވެ.
އެކަމަކު ރައްދުގައި ޖަޕާނުން ބުނީ ލަންކާގެ "ލީޑަރުން އަމަލުތަކާ ހެދި" ލަންކާގެ ރައްޔިތުންނަށް އަަދަބު ދެވިގެން ނުވާނެ ކަމަށެވެ.
ލަންކާއަށް މިހާރު ކުރިމަތިވެފައިވާ އިގްތިސާދީ ކާރިސާގެ ތެރެއިން ވެސް ޖަޕާނުން އެހީ މެދުކަނޑާލަން ނިންމި ކަމަށް ބުނެ ހަބަރު ފެތުރުނެވެ. ނަމަވެސް ޖަަޕާނާއި ލަންކާ ސަރުކާާރުން އެ ހަބަރުތައް ދޮގުކުރި އެވެ.
