ވައްކަމާއި ފޭރުމުގެ މައްސަލަތައް އިންތިހާއަށް އިތުރުވެ، މިދިޔަ އަހަރު އެކަނިވެސް އެ ބާވަތުގެ 8،331 މައްސަލަ ރިޕޯޓުކޮށްފި އެވެ.
ފުލުހުންގެ ތަފާސްހިސާބުތަކުން ދައްކާގޮތުގައި، ވޭތުވެދިޔަ ހަ އަހަރު ތެރޭގައި ވައްކަމާއި ފޭރުމުގެ ޖުމްލަ 28،398 މައްސަލަ ފުލުހަށް ރިޕޯޓުކޮށްފައި ވެއެވެ. އެގޮތުން، އެންމެ ގިނައިން އެ ބާވަތުގެ މައްސަލަ ރިޕޯޓުކޮށްފައި ވަނީ، 2021 ވަނަ އަހަރު އެވެ. އެ އަހަރު ރިޕޯޓުކުރީ 8،331 މައްސަލަ އެވެ.
އަހަރުތަކުގައި ވައްކަމާއި ފޭރުމުގެ މައްސަލަތައް ރިޕޯޓުކޮށްފައިވާ ގޮތް:
- 2017 - 3،128 މައްސަލަ
- 2018 - 4،131 މައްސަލަ
- 2019 - 5،858 މައްސަލަ
- 2020 - 4،712 މައްސަލަ
- 2021 - 8،331 މައްސަލަ
- 2022 - 2،238 މައްސަލަ (ފުރަތަމަ ފަސް މަސް ދުވަހު)
ވައްކަމާއި ފޭރުމުގެ މައްސަލައިގެ އިތުރުން މި ހަ އަހަރު ތެރޭގައި އެއްޗެހި ގެއްލިގެން 7،672 މައްސަލަ ވެސް ފުލުހަށް ހުށަހަޅާފައި ވެއެވެ. އެގޮތުން، އެއްޗެހި ގެއްލިގެން އެންމެ ގިނައިން ރިޕޯޓުކުރީ 2019 ވަނަ އަހަރު އެވެ. އެގޮތުން އެ އަހަރު 1993 މައްސަލަ ހުށަހަޅާފައި ވެއެވެ.
އަހަރުތަކުގައި އެއްޗެހި ގެއްލިގެން މައްސަލަތައް ރިޕޯޓުކޮށްފައިވާ ގޮތް:
- 2017 - 1182 މައްސަލަ
2018 - 1840 މައްސަލަ
2019 - 1993 މައްސަލަ
2020 - 942 މައްސަލަ
2021 - 1182 މައްސަލަ
2022 - 533 މައްސަލަ (ފުރަތަމަ ފަސް މަސް ދުވަހު)
ވައްކަމާއި ފޭރުމުގެ މައްސަލަތައް އަދި އެއްޗެހި ގެއްލިގެން ރިޕޯޓުކޮށްފައިވާ މައްސަލަތަކުގެ އަދަދު ވަނީ 36،000 އަށްވުރެ މައްޗަށް އަރާފަ އެވެ.
2020 ވަނަ އަހަރު ކޮވިޑާހެދި ގިނަ ބަޔަކު ގޭގައި ތިބުމުގެ ސަބަބުން ވައްކަމާއި ފޭރުން އިންތިހާއަށް ދަށަށް ދިއުމަށްފަހު، އާންމު ދިރިއުޅުމަށް ވުޖޫދުވުމާ އެކު އެފަދަ މައްސަލަތައް ރިޕޯޓުކުރާ އަދަދު މިދަނީ އިތުރުވަމުންނެވެ. އެގޮތުން، 2020 ވަނަ އަހަރަށް ވުރެ 2021 ވަނަ އަހަރު ރިޕޯޓުކުރި މައްސަލަތައް ގިނަކަން ފާހަގަކޮށްލެވެ އެވެ.
ހަމައެއާއެކު، މިއަހަރު ޖުލައި މަހު ސްކޫލު ޗުއްޓީ އާއި، ސަރުކާރު ބަންދު ގިނަ ދުވަސްތައް ދިމާވާތީ، ގިނަ އަދަދެއްގެ ބަޔަކު ވަނީ ޗުއްޓީއަށް ތަންތަނަށް ފުރައިގެން ގޮސްފަ އެވެ. އެހެންކަމުން ޗުއްޓީއަށް ދާއިރު ގެ ހުސްކޮށް ހުންނަ ނަމަ އެކަމުގެ އިޝާރާތެއް ކުރުމަށް ފުލުހުން ވަނީ އިލްތިމާސްކޮށްފަ އެވެ. ފުލުހުން މިފަދައިން އިލްތިމާސްކޮށްފައި ވަނީ ހުސްކޮށް ހުންނަ ގެތަކަށް ހާއްސަ ސަމާލުކަމެއް ދީގެން މޮނިޓާ ކުރުމަށެވެ.
