އެމެރިކާގެ ކެލިފޯނިއާ ސްޓޭޓުގެ ޖަންގަލީގައި ރޯވެފައިވާ އަލިފާންގަނޑު ޔޮޒެމައިޓް ނެޝަނަލް ޕާކްއާ ހަމައަށް ފޯރާފައި ވަނިކޮށް، އެ ސްޓޭޓުގެ ވަކި ހިސާބެއްގައި ކުއްލި ނުރައްކަލުގެ ހާލަތު އިއުލާންކޮށްފި އެވެ.
"އޯކް ފަޔާ" ގެ ނަން ދީފައިވާ އަލިފާންގަނޑު ރޯވެ ފެތުރެން ފެށީ ހުކުރު ދުވަހެވެ. އަލިފާންގަނޑު ފެތުރެން ފެށިތާ 24 ގަޑިއިރު ފާއިތުވި އިރު ވެސް ކޮންޓްރޯލް ކުރެވޭ ގޮތެއް ނުވެ އެވެ.
"ހުޅުގަނޑު ބޮޑުވަމުން ދާތީ އަލިފާން ނިއްވާ މީހުންނަށް އޮތް ގޮންޖެހުން ބޮޑު،" ކެލިފޯނިއާގެ ޑިޕާޓްމަންޓުން ބުންޏެވެ.
މިހާތަނަށް 10 ގެ ސުންނާފަތިވެފައިވާ އިރު، 3000 އަށް ވުރެ ގިނަ މީހުން ވަނީ ރައްކާތެރި ހިސާބުތަކަށް ބަދަލުކޮށްފަ އެވެ.
ކެލިފޯނިއާގެ ޑިޕާޓްމަންޓް އޮފް ފޮރެސްޓްރީ އެންޑް ފަޔާ ޕްރޮޓެކްޝަނުން ބުނީ އަލިފާންގަނޑުގެ ސަބަބުން މިހާތަނަށް 11،900 އޭކަަރުގެ ބިމުގެ ސަރަހައްދެއް އަނދާ ހުލިވެފައިވާ ކަމަށެވެ. އެހެންކަމުން "އޯކް ފަޔާ" އަކީ މި ވަގުތު އެމެރިކާގެ ޖަންގައްޔެއްގައި ރޯވެފައި އޮތް އެންމެ ބޮޑު އަލިފާންގަނޑެވެ.
ކުއްލި ނުރައްކަލުގެ ހާލަތު އިއުލާން ކުރީ މަރިޕޯސާ ކައުންޓީގަ އެވެ. ކެލިފޯނިއާގެ ގަވަރުނަރު ގެވިން ނިއުސަމް ނެރުއްވި ބަޔާނެއްގަައި ވިދާޅުވީ ހުޅުގަނޑު އިތުރަށް ފެތުރެމުން ދަނީ ވާރޭ ނުވެހި ގިނަ ދުވަސްވުމާއި މާ ބޮޑަށް ހޫނުގަދަވުމުގެ ސަބަބުން ކަމަށެވެ.
މި ހަފްތާ ބަންދުގައި އެމެރިކާގެ ބޮޑު ހިސާބަކަށް މާ ބޮޑަށް ހޫނުވެ "ހީޓްވޭވް" ކުރިމަތިވެފައިވާ އިރު ހޮނިހިރު ދުވަހު މަރިޕޯސާ ކައުންޓީގެ ހޫނުމިން ހުރީ 35.5 ޑިގްރީ ސެލްސިއަސްގަ އެވެ.
"އޯކް ފަޔާ" ގެ އިރުއުތުރުން އޮންނަ ޔޮޒެމައިޓް ނެޝަނަލް ޕާކަކީ ދުނިޔޭގެ އެންމެ ބޮޑެތި އަަދި އެންމެ ގިނަ ދުވަސްވީ ރެޑްވުޑް ގަސްތައް ހުންނަ ޖަންގައްޔެވެ.
ދުނިޔެ ހޫނުވެ، ވާރޭ ނުވެހި ގިނަ ދުވަސްވުމުގެ ސަބަބުން ޖަންގަލިތަކުގައި ރޯވުމަށް އެންމެ އެކަށޭނަ މާހައުލު އުފެދެ އެވެ. ފަހަކަށް އައިސް އެފަދަ އަލިފާންގަނޑުތަކުގައި ލިބޭ ގެއްލުން ދަނީ ދުނިޔޭގެ ހުރިހާ ހިސާބެއްގައި ވެސް ބޮޑުވަމުންނެވެ.
