ހައްޖުގެ އަޅުކަމާ ދިމާކޮށް، އިޒްރޭލުގެ މުސްލިމް ނޫން ނޫސްވެރިޔަކު މައްކާއަށް އެތެރެ ވާން އެހީވިކަމުގެ ތުހުމަތުގައި ސައުދީ އަރަބިއްޔާ ރައްޔިތަކު ހައްޔަރުކޮށްފި އެވެ.
ސައުދީ ފުލުހުންގެ ތަރުޖަމާނު ވިދާޅުވީ މައްކާއަށް އެތެރެވި ނޫސްވެރިޔާއަކީ އެމެރިކާގެ ޕާސްޕޯޓް އޮންނަ މީހެކެވެ. އޭނާ މައްކާއަށް އެތެރެ ވާން އެހީވިކަމުގެ ތުހުމަތުވާ ސައުދީ މީހާގެ މައްސަލަ ކޯޓަށް ފޮނުވަން ވަނީ އެދިފަ އެވެ.
އިޒްރޭލުގެ ޗެނަލް 13 ޓީވީ ނިއުސްގެ ގިލް ތަމަރީ މައްކާއަށް ގޮސް އުޅުނު މަންޒަރު ފެންނަ ވީޑިއޯ އޭނާ އާއްމު ކުރީ މި ހަފްތާގަ އެވެ. އެކަމަކު މުސްލިމް ނޫން މީހުން މަައްކާއަށް އެތެރެވުން ހުއްޓުވަން ސެކިއުރިޓީ ޗެކްޕޮއިންޓްތަކެއް ގާއިމްކޮށްފައި ހުރެ އެވެ.
އޭނާ ވަނީ ހައްޖުގެ އަޅުކަމަށް މީހުން އަރަފާތު ފަރުބަދައަށް އެރި ވަގުތު، އެ ތަނަަށް ގޮސް ފަރުބަދައަށް ވެސް އަރާފަ އެވެ. އޭނާ ނެގި ވީޑިއޯތައް އާއްމު ކުރީ އެނބުރި އިޒްރޭލަށް ދިޔުމަށް ފަހު އެވެ.
ތަމަރީ ތައްޔާރު ކުރި ވީޑިއޯ ރިޕޯޓުގައި ބުނީ މައްކާއަށް ދިޔުމަކީ އޭނާގެ ވަރަށް ބޮޑު ހުވަފެނެއް ކަމަށާއި އޭނާ މައްކާއަށް އެތެރެ ވާން އެހީވެދިން ސައުދީ މީހާއަށް، އޭނާއަކީ އިޒްރޭލް ނޫސްވެރިއެއްކަން ނޭނގޭ ކަމަށެވެ.
މިދިޔަ އަަންގާރަ ދުވަހު ކުރި ޓްވީޓެއްގައި ތަމަރީ މައާފަށް އެދި، ބުނީ މައްކާއަށް ދިޔައީ މުސްލިމުން ރުޅި އަަރުވަން ނޫން ކަމަށާއި އޭނާގެ ބޭނުމަކީ "މައްކާ އާއި އިސްލާމްދީނުގެ ރީތިކަން" ހާމަކުރުން ކަމަށެވެ.
