ރޯޑް ޑިވެލޮޕްމަންޓް ކޯޕަރޭޝަން (އާރްޑީސީ) އިން ޑޮލަރު ހޯދަން ކުރި އިއުލާން ބާތިލުކުރީ ފިނޭންސް މިނިސްޓްރީއިން ޑޮލަރު ހަމަޖައްސަދިނުމުން ކަމަށް އެ ކުންފުނިން ބުނެފި އެވެ.
އިއްޔެ އާރުޑީސީން ވަނީ ޑޮލަރު ވިއްކުމުގެ ލައިސެންސް އޮތް ފަރާތްތަކުން އެ ކުންފުންޏަށް ޑޮލަރު ފޯރުކޮށްދިނުމުގެ ޝައުގުވެރިކަން ހާމަކޮށް، މި މަހުގެ 24 ވަނަ ދުވަހުގެ ކުރިން ޕްރޮޕޯސަލް ހުށަހެޅުމަށް އިއުލާނެއް ކޮށްފަ އެވެ.
ނަމަވެސް އިއުލާން ކުރިތާ 30 މިނިޓް ވެސް ނުވަނީސް އެ އިއުލާން ވަނީ ބާތިލުކޮށްފަ އެވެ. އެކަމާ ގުޅިގެން ސޯޝަލް މީޑިއާގައި ފާޑުކިޔުން އަމާޒުވުމުން އާރްޑީސީން ރޭ ވަނީ ބަޔާނެއް ނެރެފަ އެވެ.
އާރްޑީސީއިން ބުނީ ޑޮލަރު ހޯދަން އިއުލާނުކުރީ މަރުކަޒީ ބޭންކް، އެމްއެމްއޭއިން ބޭރު ފައިސާ ވިއްކުމުގެ ލައިސެންސް ދީފައިވާ ފަރާތްތަކުން އެމެރިކާ ޑޮލަރު ގަތުމަށް ކަމަށެވެ.
އެ އިއުލާން ބާތިލް ކުރީ ޑޮލަރު ވިއްކާނެ ބަޔަކު ހޯދަން އެކުންފުނިން އިއުލާނު ކުރި ފަހުން އެ ކޯޕަރޭޝަނުން ބޭނުންވާ ބޭރު ފައިސާ ފިނޭންސް މިނިސްޓްރީން ހަމަޖެއްސުމުން ކަމަށްވެސް އެ ކުންފުނިން ބުންޏެވެ.
"އެ އިއުލާން ބާތިލްކޮށްފައިވަނީ ފިނޭންސް މިނިސްޓްރީން ނުވަތަ އެހެން ފަރާތަކުވެސް އެކަން ކުރުމަށް މި ކޯޕަރޭޝަނަށް އެންގުމުން ނެއް ނޫން. އެއީ މި ކޯޕަރޭޝަނުން ބޭނުންވާ ޑޮލަރު ފިނޭންސް މިނިސްޓްރީން ހަމަޖެހުމުން އެހެން ފަރާތަކުން އިތުރަށް ޑޮލަރު ގަތުމުގެ ބޭނުން ނެތުމުގެ ސަބަބުން،" އާރްޑީސީން ބުންޏެވެ.
