ތިމާވެއްޓަށް އަސަރުކުރާ މިންވަރު ބަޔާންކުރާ ރިޕޯޓު (އީއައިއޭ) ހެދުމުގެ ގަވައިދުގައިވާ ގޮތުގެ މަތީން، ތިމާވެއްޓަށްް އަންނަމުންދާ ބަދަލުތައް ދެނެގަތުމަށް ބޭނުންވާ މޮނިޓަރިން ރިޕޯޓުތައް މަޝްރޫއާ ހަވާލުވެގެން އުޅޭ ގިނަ ކޮންޓްރެކްޓަރުން ހުށަހަޅަމުން ނުދާތީ، އެންވައިރަމެންޓް ޕްރޮޓެކްޝަން އޭޖެންސީ (އީޕީއޭ)އިން ދޫކުރާ ހުއްދަތަކާ އެއްގޮތަށް މަސައްކަތް ކުރިއަށް ގެންދަން ހަނދާންކޮށްދީފި އެވެ.
އީއައިއޭ އާ ހިލާފުވެގެން ސ. ހުޅުދޫ ބަނދަރު މަޝްރޫއު އީޕީއޭއިން ހުއްޓާލާފައިވަނިކޮށް، އީޕީއޭއިން މިއަދު ނެރުނު ބަޔާނެއްގައި ބުނީ މޮނިޓަރިން ރިޕޯޓު ގިނަ ކޮންޓްރެކްޓަރުން ހުށަހަޅަމުން ނުދާ ކަމަށެވެ.
އަދި، މަޝްރޫއު ކުރިއަށް ގެންދިއުމަށް ދޫކޮށްފައިވާ ހުއްދައިގައިވާ ގޮތަށް، މަޝްރޫއު ފެށުމަށްފަހު ފެއްޓި ތާރީހު އެ އޭޖެންސީއަށް ލިޔުމުން އަންގަމުން ނުދިއުމާއި މޫސުމީ ހާލަތްތަކަށް ބަލައި ހުއްޓާލަން ޖެހޭ ހާލަތްތަކުގައި ވެސް މަސައްކަތް ކުރިއަށް ގެންދިއުން ފަދަ މައްސަލަތައް ފާހަގަވެފައިވާ ކަމަށެވެ.
އެހެންކަމުން، މަޝްރޫއުތަކުގެ ސަބަބުން ތިމާވެއްޓަށް ކުރާ އަސަރު ކުޑަކުރުމަށް އެ އޭޖެންސީން ދޫކުރާ ހުއްދަތަކާ އެެއްގޮތަށް މަސައްކަތް ކުރުމަށް އީޕީއޭއިން ވަނީ އެދިފަ އެވެ.
އީއައިއޭއާ ހިލާފަށް މަސައްކަތް ކުރަމުން ގެންދާ ކަމަށް ބުނެ ސ. ހުޅުދޫ ބަނދަރު ހެދުމުގެ ޕްރޮޖެކްޓު އީޕީއޭއިން އިއްޔެ ވަނީ ހުއްޓުވާފަ އެވެ. އެ މަސައްކަތް ހުއްޓުވާފައިވަނީ އެ މަޝްރޫއުގެ 90 ޕަސެންޓު މަސައްކަތް ނިމިފައިވަނިކޮށެވެ.
