ބައިނަލްއަގުވާމީ ޔޯގާ ދުވަސް ފާހަގަކުރަން ޖޫން 21، ގައި ގަލޮޅު ދަނޑުގައި ބޭއްވި ހަރަކާތަށް ހުރަސް އަޅައި ހަމަނުޖެހުން ހިންގި މައްސަލައިގައި ހައްޔަރުކުރި ޝެއިހު ފަޒްލޫން މުހައްމަދު ޝަރުތުތަކަކާ އެކު ދޫކޮށްލަން ކްރިމިނަލް ކޯޓުން މިއަދު އަމުރުކޮށްފި އެވެ.
އެ ހަމަނުޖެހުން ހިންގުމުގައި އިސްކޮށް ހަރަކާތްތެރިވި ކަމުގެ ތުހުމަތުގައި ހައްޔަރުކޮށް ޝެއިހް ފަޒްލޫންގެ ބަންދަށް އެކި ފަހަރު މަތިން މުއްދަތު ދިނެވެ. އެންމެ ފަހުން ފަޒްލޫންގެ ބަންދަށް ދިން 16 ދުވަސް ހަމަވެގެން ކޯޓަށް ހާޒިރުކުރުމުން ޝަރުތުތަކާ އެކު ދޫކޮށްލަން ނިންމީ އެވެ.
ކޯޓުން ކުރި އަމުރުގައިވާ ގޮތުން މާލޭންނާއި ރާއްޖޭން ބޭރަށް ދާނަމަ ކޯޓަށް އެންގުމަކީ ފަޒްލޫންގެ މައްޗަށް ކޮށްފައިވާ ޝަރުތެކެވެ. އަދި، ފުލުހުންގެ ތަހުގީގަށް އެއްބާރުލުންދީ، ހާޒިރުވާން އެންގުމުން ހާޒިރުވުމަކީ ކޯޓުން ކޮށްފައިވާ ޝަރުތެކެވެ.
ޝައިހް ފަޒްލޫން ދޫކޮށްލަން ކޯޓުން އަމުރު ކުރުމުން ދޫކޮށްލާފައިވާ ކަން ފުލުހުން ވެސް ކަށަވަރުކޮށްދެ އެވެ.
ޝައިހް ފަޒްލޫން ޝަރުތުތަކާއެކު ބަންދުން ދޫކޮށްލި އިރު މި މައްސަލާގައި ޝައިހް އާދަމް ނިޝާން ވެސް ވަނީ ހައްޔަރުކޮށްފަ އެވެ. އޭނާ ބަންދުން އަދި ދޫކޮށްލާފައި ނުވާއިރު އެ މައްސަލަ ހައި ކޯޓުގައި ވެސް އިސްތިއުނާފް ކޮށްފައިވެ އެވެ.
މައްސަލައިގެ ފަސްފަހަތް
ޖޫން 21 ވަނަ ދުވަހުގެ ހެނދުނު 6:30 ގައި ފެށި އެ ހަރަކާތާ ދެކޮޅަށް އަޑުއުފުލި މީހުންގެ ތެރެއިން ބަޔަކު ގަލޮޅު ދަނޑަށް ގަދަކަމުން ވަދެ ތަކެއްޗަށް ގެއްލުންދީ އެއްވެފައި ތިބި މީހުންނަށް ހަމަލާ ދިނެވެ. އެ ހަރަކާތް ފެށުމަށް ބޭއްވި ރަސްމިއްޔާތުގައި ޔޫތު މިނިސްޓަރު އަހްމަދު މަހްލޫފް ވާހަކަ ދައްކަވަން ހުއްޓައި ބަޔަކު ދަނޑަށް ވަދެގަނެ އަޑު ގަދަކުރަމުން އެ ހަރަކާތް ހުއްޓުވި އެވެ. އދ. އިން ރާއްޖެއަށް ކަނޑައަޅާފައި ހުންނަވާ ދާއިމީ މަންދޫބާއި ބައެއް ގައުމުތަކުގެ ޑިޕްލޮމޭޓުން ވެސް އޭރު ދަނޑުގައި ތިއްބެވި އެވެ.
ގިނަ އަދަދެއްގެ ޑިޕްލޮމެޓުން ތިއްބައި, ފުލުހުންގެ ސަފުތައް ފޫއަޅުވައި އެ ބޭފުޅުންނާ ހަމައަށް ހަމަލާ ދޭން ބަޔަކަށް ވަދެވުމުން ފުލުހުންނަށް ވެސް ފާޑުކިޔުންތަކެއް ވަނީ އަމާޒުވެފަ އެވެ. އަދި, އެ ހަރަކާތުގެ މައުލޫމާތު ކުރިން ލިބިފައިވާއިރު, އެކަމަށް ފުލުހުންނަށް ތައްޔާރުވެފައި ނެތް ކަމަށް ބުނެ ވެސް ގިނަ ބަޔަކު ދަނީ ފާޑުކިޔަމުންނެވެ.
އެ މައްސަލައިގައި ފުލުހުން އަމަލުކުރި ގޮތާ މެދު ޕޮލިސް ކޮމިޝަނަރު މުހައްމަދު ހަމީދު ވެސް ވަނީ ކަންބޮޑުވުން ފާޅުކުރައްވާފަ އެވެ. އަދި އެކަން ހިނގައިދިޔަ ގޮތް ބަލަން ކުރިޔަށް ގެންދާ ރިވިއުއަކަށް ފުރިހަމައަށް އެއްބާރުލުން ދެއްވާނެ ކަމަށް ވިދާޅުވި އެވެ.
ގަލޮޅު ދަނޑަށް ވަދެގަތް މީހުންގެ ހަމަލާ އަމާޒުވި މީހުންގެ ތެރޭގައި އިންޑިއާ ހައިކޮމިޝަނުގެ މުވައްޒަފަކު ވެސް ހިމެނެ އެވެ. ނަމަވެސް، އެއްވެސް ޑިޕްލޮމެޓަކަށް އަނިޔާ ވެފައެއް ނުވެ އެވެ.
އެ މީހުން ދަނޑަށް ވަދެގަތީ ދަނޑުގެ ބޭރުގައި ޖަހާފައި ހުރި ފެންސް ވެސް ހަލާކުކޮށްލުމަށް ފަހު އެވެ. އެ ތަނުގައި ޖަހާފައި ހުރި ބައެއް ބޯޑުތަކަށް ވެސް ގެއްލުން ދިނެވެ. ފުލުހުންނަށް އެ މީހުން ބޭރުކޮށްލެވުނީ 40 ވަރަކަށް މިނެޓު ފަހުންނެވެ. އަދި، އެއްވި މީހުން ފޮނުވާލަން ކަރުނަ ގޭސް ވެސް ޖެހި އެވެ.
އެ މައްސަލައިގައި ޖުމުލަ 21 މީހަކު ހައްޔަރުކުރި އެވެ.
