ވެރިކަންކުރާ ކޯލިޝަނުގެ މައިޕާޓީ އެމްޑީޕީއަށް ދައުލަތުން ދޫކުރާ ފައިސާގެ 60 ޕަސެންޓު، އެޕާޓީގެ އެކި ދާއިރާތަކާއި ގޮފިތަކަށް ދޫކުރަން ރޭ ފާސްކޮށްފި އެވެ.
އެމްޑީޕީގެ ގައުމީ މަޖިލީހުން ރޭ ބޭއްވި ބައްދަލުމުގައި ފާސްކުރި ގަރާރުގައިވާ ގޮތުން ދާއިރާ ތަކަށް ދޫކުރާ ފައިސާގެ 25 ޕަސެންޓް ބަހާނީ ދާއިރާތަކަށް ހަމަހަމަކޮށެވެ. އަދި، ދާއިރާތަކަށް ދޫކުރާ ފައިސާގެ 20 ޕަސެންޓް ބަހައިލާނީ ދާއިރާގެ ރަށްތަކަށް ހަމަހަމަކޮށެވެ. އެކަމަކު ދާއިރާތަކަށް ދޫކުރާ ފައިސާގެ 45 ޕަސެންޓް ބަހާނީ ދާއިރާތަކުގައި މެމްބަރުން ތިބި ނިސްބަތުންނެވެ.
ދާއިރާތަކަށް ދޫކުރާ ފައިސާ (އެމްޑީޕީއަށް ދައުލަތުން ދޫކުރާ ފައިސާ)ގެ 60 ޕަސެންޓުގެ ތެރެއިން 10 ޕަސެންޓް ބަހައްޓާނީ އެގަރާރުގައިވާ ގޮތުން ވަކި ދާއިރާއަަކަށް ހާއްސަ ނުކޮށެވެ. އެއީ ދާއިރާއެއްގައި ކުރަން ޖެހިދާނެ، ކެމްޕޭން ފަދަ ހަރަކާތްތަކަށް ހަރަދުކުރުމަށެވެ.
އެމްޑީޕީގެ ގައުމީ މަޖިލީހުން ރޭ ބޭއްވި ޖަލްސާގައި ބައިވެރިވި 71 މެމްބަރުންގެ އިއްތިފާގުން ފާސްކުރި އެ ގަރާރަކީ އެޕާޓީގެ ޗެއާޕާސަންގެ ނައިބު (އިދާރީ)ގެ މަގާމަށް ކުރިމަތިލައްވާނެ ކަމަށް އިއުލާނު ކުރައްވާފައިވާ އިބްރާހީމް ވަހީދު (އެންސްޕާ އިބްރެ) އާއި އެޕާޓީގެ ޗެއާޕާސަންގެ ނައިބު (މާލީ) އަދި ރައްޔިތުންގެ މަޖިލީހުގެ ބާރަށު ދާއިރާގެ މެމްބަރު އަހުމަދު އަބްދުﷲ ގުޅިވަޑައިގެން ހުށަހެޅުއްވި ގަރާރެކެވެ.
އިބްރާހީމް ވަހީދު "އަދަދު" އަށް ވިދާޅުވީ ރޭ ފާސްކުރި ގަރާރު ފާސްކުރުމުން، އެ ޕާޓީއަށް މިއަހަރު ދޫކޮށްފައި ހުރި ފައިސާ، ގަރާރުގައިވާ އުސޫލުން ދާއިރާތަކަށް ދޫކުރާނެ ކަމަށެވެ. އިލެކްޝަންސް ކޮމިޝަނުން ވަނީ މިއަހަރު 15.02 މިލިއަން ރުފިޔާ އެމްޑީޕީއަށް ދޫކޮށްފަ އެވެ.
" އެ [ފައިސާ] ދޫކުރާނެ އުސޫލެއް ރޭ ފާސްކުރީ. ދެން މިއަހަރު ލިބިފައި ހުރި ފައިސާވެސް ދޫކުރަން،" އޭނާ ވިދާޅުވި އެވެ.
އެމްޑީޕިއަށް ދައުލަތުން ދޫކުރާ ފައިސާއިން ބަައެެއް އެޕާޓީގެ ދާއިރާތަކަށް ދޫކުރުމަކީ އެޕާޓީގެ ޗެެއާޕާސަން އިކޮނޮމިކް މިނިސްޓަރު ފައްޔާޒް އިސްމާއީލް އެމަގާމަށް ވަޑައިގަންވަން ކުރެއްވި ކެމްޕޭނުގައި ވެވަޑައިގެންނެވި ވައުދެކެވެ. އިބްރާހީމް ވަހީދަކީ އެ ކެމްޕޭންގައި ކެމްޕޭން މެނޭޖަރެވެ.
ފައްޔާޒު އޭރު ވިދާޅުވީ އެމްޑީޕީއަށް ދައުލަތުން ދޫކުރާ ފައިސާގެ 60 ޕަސެންޓް ރަށްރަށަށް ބަހާލައިފި ނަމަ ރަށްރަށުގައި ޕާޓީގެ ހަރަކާތްތައް ހިންގަން ކޮންމެވެސް ވަރެއްގެ އެހީތެރިކަމަކަށް ވާނެ ކަމަށެވެ. އެއީ އެޕާޓީއަށް ދައުލަތުން އަހަރަކު 12 މިލިއަން ވަރު ލިބޭތީ ކަމަށް ވެސް އޭނާ އޭރު ވިދާޅުވި އެވެ.
