މިއާމީ، ޔުނައިޓެޑް ސްޓޭޓްސް (ޖުލައި 21) - އެމެރިކާގެ ވިސާ ހޯދުމުގައި ދިމާވި މައްސަލަތައް ހައްލުކޮށް، ބާސެލޯނާގެ ކޯޗު ޒަވީ ހެނާންޑޭޒް އެމެރިކާ އަށް ދަތުރުކޮށް، ބާސެލޯނާ ޓީމާ ގުޅިއްޖެ އެވެ.
ޕްރީ ސީޒަން ޓުއާއެއްގައި މީގެ ފަސް ދުވަސް ކުރިން އެމެރިކާ އަށް ބާސެލޯނާގެ ޓީމު ފުރިއިރު، ޒަވީ އަށް ޓީމާއެކު ފުރޭ ގޮތެއްނުވި އެވެ. ޒަވީ އަށް އެމެރިކާގެ ވިސާ ނުލިބުނީ، ގަތަރުގެ އަލް ސާދުގެ ކޯޗުގެ މަގާމުގައި އޭނާ ހުރިއިރު، އޭ ޓީމާއެކު އީރާނަށް ދަތުުރުތަކެއް ކޮށްފައިވާތީ އެވެ. އެހެންކަމުން، އެމެރިކާ އަށް އެތެރެވުމަށް ޒަވީ އަށް ހާއްސަ ހުއްދައެއް ބޭނުންވެ އެވެ.
ޓީމާއެކު ޒަވީ އަށް ނުފުރުނީ އެމެރިކާގެ ކަމާބެހޭ އިދާރާތަކަށް ބޭނުންވާ ލިޔެކިއުންތައް ހަމަނުވާތީ އެވެ. އެއީ ޒަވީ އީރާނަށް ކުރި ދަތުރުގައި ކުރި މަސައްކަތް އަންގައިދޭ ލިޔެކިޔުންތަކާއި އެހެނިހެން މުހިންމު މައުލޫމާތު ބޭނުންވާ ލިޔުންތަކެވެ.
ވިސާ ހޯދުުމުގައި ދިމާވެފައިވާ މައްސަލަ ހައްލުކުރުމަށް، ޒަވީ ވަނީ މި ހަފުތާގެ ތެރޭގައި މެޑްރިޑަށް ދަތުރުކޮށްފަ އެވެ. އަދި ވިސާގެ މައްސަލަ ހައްލުވުމާ އެކު، އޭނާ ވަނީ މިހާރު އެމެރިިކާ އަށް ދަތުރުކޮށް، ޓީމާ ގުޅިފަ އެވެ.
ވިސާގެ މައްސަލަތަކާ ގުޅިގެން ޒަވީ އަށް ވަނީ ޕްރީ ސީޒަން ޓުއާގެ ފަސް ދުވަސް ގެއްލިފަ އެވެ. އޭގެ ތެރޭގައި މަޔާމީ އެފްސީއާ ދެކޮޅަށް ބާސެލޯނާ ކުޅުނު މެޗު ވެސް ހިމެނެ އެވެ. މި މުއްދަތުގައި، ބާސެލޯނާ އަށް އިރުޝާދު ދިނީ ޒަވީގެ ކޮއްކޮ އަދި ޓީމުގެ އެސިސްޓަންޓް ކޯޗު އޮސްކާ ހެނާންޑޭޒް އެވެ.
