ރަަޝިއާގެ ރައީސް ލެޑިމިއަަ ޕުޓިން އުޅުއްވަނީ އާލާސްކަންފުޅާ ކަމަށް ބެލެވޭނެ އެއްވެސް ހެއްކެއް ނެތް ކަމަށް އެމެރިކާގެ ޖާސޫސީ އިދާރާ ސީއައިއޭގެ ވެރިޔާ ވިދާޅުވެއްޖެ އެވެ.
މި އަހަރު 70 އަހަރު ފުރިވަޑައިގަަންނަވާ ޕުޓިންގެ ސިއްހީ ހާލުކޮޅު ގޯސް ކަމަށް އަޑު ފެތުރޭތާ ދުވަސްތަކެއް ވެއްޖެ އެވެ. އެގޮތުން, ކެންސަރު ޖެހިފައިވުން އެކަށީގެންވާ ކަމަށް ބައެއް ރިޕޯޓުތައް ބުންޏެވެ.
ނަމަވެސް, ސީއައިއޭގެ ޑިރެކްޓަރު ވިލިއަމް ބާންސް ވިދާޅުވީ ޕުޓިންގެ ސިއްހީ ހާލުކޮޅު ގޯސްކަަމުގެ އެއްވެސް ހެއްކެއް ނެތް ކަމަށާއި "ފެންނަ ފެނުމަށް ޕުޓިން މާ ބޮޑަށް ވެސް ސިއްހަތު ރަނގަޅު" ކަމަށެވެ.
އެސްޕެން ސެކިއުރިޓީ ކޮންފެރެންސްގައި ބާންސް ވިދާޅުވީ ޕުޓިންއަކީ "ކޮންޓްރޯލާއި ބިރު ދެއްކުމާއި ބަދަލަށް އިސްކަންދެއްވާ ލީޑަރެއް ކަމަށާއި ފަަހަކަށް އައިސް ޕުޓިންގެ ގާތް ބޭފުޅުންގެ އަދަދު މަދުވެއްޖެ ކަމަށެވެ.
އެމެރިކާއިން ރަޝިއާއަށް ކަނޑައަޅާފައި ހުންނަ ސަފީރުކަން ކުރިން ކުރެއްވި ބާންސް ވިދާޅުވީ ފާއިތުވި 20 އަހަރު އޭނާ ހޭދަކުރީ ރަޝިއާގެ ލީޑަރުގެ ކަަންކަން ބަލައި އޮބްޒާވް ކުރުމުގައި ކަމަށެވެ.
"ޕުޓިން ގަބޫލުކުރައްވަނީ ރަޝިއާގެ ލީޑަރުގެ ގޮތުގައި އަދާ ކުރަން ޖެހޭ ދައުރަކީ ރަޝިއާ ގަދަ ބާރަކަށް ހެދުން ކަމަށް. އެކަން ކުރެވޭނީ ރަޝިއާ ވަށައިގެންވާ ނެއިބާހުޑަށް ނުފޫޒު ފޯރުވައިގެން. އެހެންވީމާ ޔޫކްރެއިންގެ ކޮންޓްރޯލް އެހާ މުހިއްމު ވަނީ،" ބާންސް ވިދާޅުވި އެވެ.
