މޫސުމަށްއަންނަ ބަދަލުތަކާ ގުޅިގެން ފަތުރުވެރިކަމަށް ލިބިދާނެ ގެއްލުންތަކުން ރައްކާތެރިވުމަށް އެދާއިރާއަށް އަމާޒުކޮށް އުފެއްދުންތެރި އިޖާދީ، ޚިޔާލު ހުށަހަޅައިގެން ހިލޭ އެހީ ހޯދުމުގެ ޕްރޮގްރާމަށް ކުރިމަތިލުމުގެ ފުރުސަތު ހުޅުވާލައިފި އެވެ.
މި ޕްރޮގްރާމް ހިންގުމަށް ހަމަޖެހިފައިވަނީ ޔޫއެސްއެއިޑުން ކުރިއަށްގެންދާ ކްލައިމެޓް އެޑަޕްޓޭޝަން ޕްރޮޖެކްޓުގެ ދަށުންނެވެ. އެ ޕްރޮޖެކްޓުގެ ދަށުން ޔޫއެސްއެއިޑުން ވަނީ މޫސުމަށް އަންނަ ބަދަލުތަކަށް އީޖާދީ ހައްލުތައް ހޯދަން އަމާޒުކޮށް ކޮންސެޕްޓު ޕޭޕަރު ތައްޔާރުކޮށް ހުށަހެޅުމުގެ ފުރުސަތު އޯގަސްޓު މަހުގެ ނިޔަލަށް ހުޅުވާލާފައެވެ.
މި ފުރުސަތުގައި ކަރުދާސް ހުށައަޅާ ފަރާތްތަކުގެ ތެރެއިން ގިނަވެގެން ފަސް ފަރާތަކަށް، ކޮންމެ ފަރާތަކަށް 50،000 - 200،000 އެމެރިކާ ޑޮލަރާ ދެމެދުގެ އަދަދަކަށް ގްރާންޓު ދޭގޮތަށް ވަނީ ހަމަޖެހިފައެވެ.
މި ފުރުސަތު އަމާޒުކޮށްފައިވަނީ މޫސުމަށް އަންނަ ބަދަލުތަކުގެ ސަބަބުން ލިބޭ ގެއްލުންތައް ކުޑަކުރުމަށް ރާއްޖޭގެ ފަތުރުވެރިކަމުގެ ދާއިރާއަށް އީޖާދީ އާ ހައްލުތަކެއް ހޯދައިދިނުމަށެވެ. އޭގެ ތެރޭގައި، ޓެކްނޮލޮޖީ އާއި ހިދުމަތް ފޯރުކޮށްދީ ލިބިދިނުމުގެ ދާއިރާ އިތުރަށް ހަރުދަނާ ކުރެވިދާނެ އާ ގޮތްތައް ވެސް ހިމެނެއެވެ. އަދި، މި ދާއިރާއިން އިންސާނީ ވަސީލަތް ބިނާކުރުމުގެ ފުރުސަތު ވެސް ހިމެނެ އެވެ.
ޔޫއެސް.އެއިޑުން ކުރިއަށްގެންދާ ކްލައިމެޓް އެޑަޕްޓޭޝަން ޕްރޮޖެކްޓަކީ މޫސުމަށް އަންނަ ބަދަލުތަކުގެ ސަބަބުން ލިބޭ ގެއްލުންތައް ކުޑަކޮށް، އެފަދަ ގެއްލުންތަކަށް ހޭނި، ޖަމިއްޔާ ޖަމާއަތްތަކާއި، އަދި ވިޔަފާރިވެރިންގެ ބައިވެރިވުން އިތުރުކޮށް، ދެމެހެއްޓެނިވި "މާކެޓް-ޑްރިވަން" ހައްލުތަކެއް ހޯދައިދީ ތަރައްގީކޮށް، ފޯރުކޮށްދިނުމަށް ހިންގާ ޕްރޮޖެކްޓެކެވެ.
މިޕްރޮޖެކްޓް އިފްތިތާހު ކޮށްފައިވަނީ މިއަހަރުގެ މާޗް މަހު އެވެ. އަދި، މި ޕްރޮޖެކްޓް ކުރިއަށްއޮތް ފަސްއަހަރު ދުވަހަށް ހިންގާނެއެވެ.
ހުށަހެޅިދާނެ އީޖާދީ ހައްލުތައް
- "ކެޓަލިޓިކް ސީޑް ފަންޑިން" މެދުވެރިކޮށް އިންވެސްޓްމަންޓް އިތުރުކުރުމުގެ ފުރުސަތު ފަހިކުރުން
- މޫސުމަށް އަންނަ ބަދަލުތަކަށް ނާޒުކު ސަރަހައްދުތަކުގައި ދިރިއުޅޭ މުޖުތަމައުތަކަށް އެޑަޕްޓޭޝަން ޕްރޮޖެކްޓުތައް ހިންގުން
- މޫސުމީ ހިރާސްތަކާ ބެހޭ މައުލޫމާތު ފުޅާދާއިރާއެއްގައި ފެތުރުމާއި ފޯރުކޮށްދިނުން.
ރަށު ކައުންސިލުތަކާއި އަންހެނުންގެ ތަރައްގީއަށް މަސައްކަތް ކުރާ ކޮމިޓީތަކުން ކޮންސެޕްޓު ހުށަހެޅުމަށް ޔޫއެސްއެއިޑުން ބާރު އަޅައެވެ. މީގެ އިތުރުން، ބައިނަލްއަގުވާމީ އަދި ރާއްޖޭގެ މަދަނީ ޖަމްއިއްޔާތަކާއި، ޕްރައިވެޓް ސެކްޓަރުގެ ހަރަކާތްތެރިންނާއި ޕަބްލިކް ޕްރައިވެޓް ޕާޓްނަޝިޕްތަކަށްވެސް ކޮންސެޕްޓު ހުށަހެޅޭނެ އެވެ.
